El a wordo laga liber sin cu a sigui procedura legal
- Con por ta posibel cu Fiscal a laga H.R. liber sin cu Hues a ordena esey
ORANJESTAD (AAN): Diahuebs mainta e homber H.R. (Flint) di 57 aña mester a presenta den Corte pa e caso penal cu Ministerio Publico a cuminsa contra dje.
Ta asina cu H.R. no a presenta pero su abogado mr. Mohamed si tabata presente. Hues a puntra e abogado si e sa di H.R. E abogado a splica Hues cu H.R. no tin lugar di biba fiho y e no por a hay’e pa papia cu ne.
Acusacion: Fiscal a bisa Hues pa trata e caso sin cu H.R. ta presente. E acusacion cu Fiscal a presente contra H.R. ta cu riba 24 Juni 2024, el a purba mata un homber y subsidiario e ta wordo acusa di maltrato pisa. Ta asina cu H.R. lo a hinca un homber cu cuchiu.
Con sospechoso por ta liber: Hues a remarca na Fiscal, con por ta posibel cu H.R. ta liber. Ta asina cu H.R. ta un conoci di Polis cu un carchi di castigo largo y hasta tin un condena pa a mata hende den pasado.
Fiscal a bisa Hues cu esey ta un procedimento cu ta siguiendo na KIA. Hues a remarca cu con por ta posibel cu Fiscal a laga H.R. liber sin cu Hues a ordena esey. Hues a mustra cu segun e ley Penal nobo, Fiscal por pidi pa laga un sospechoso liber pero ta Hues ta dicidi si e sospechoso ta bay liber of no. Den e caso aki esey no a sosode. Sin cu Hues a tuma un decision, a laga H.R. liber y awor e no ta presente den Corte pa para responsabel pa loke el a haci.
Orden pa detene sospechoso: Hues a bisa cu e ta haya cu e caso aki ta serio y mirando H.R. su carchi di castigo largo, lo ta mihor pospone e caso. Hues no kier trata e caso sin cu e sospechoso ta presente. Hues a bisa cu den e caso aki e lo pidi Polis pa busca H.R., detene, pa asina trece H.R. Corte pa tratamento di e caso.
Hues a dicidi cu ta pospone e caso pa 23 October 2025, caminda el a duna orden di detencion di H.R. y hiba H.R. dilanti Mesa Berde den Corte.
