Kizas Polis di Aruba tin di core busca otro
- Hues a cambia panorama pa esnan aresta coriendo burachi
- Pa awor ta Marechaussee na Aruba so tin e aparato corecto
ORANJESTAD (AAN): Siman pasa ora cu Corte di Prome Instancia na Aruba a dicta sentencia den e caso di accident fatal cu a socede den Havenstraat (unda tin un militar Arubiano envolvi), e sentencia a ocasiona un ola similar cu temblor den henter seno Policial y Hudicial na Aruba. Hues den palabranan cla y raspa, a bisa cu e aparatonan di Alco-Sensor IV cu Cuerpo Policial KPA ta usando fielmente tur dia pa hopi aña caba, lo no ta aceptabel pa condena un hende.
Na opinion di Hues, e aparatonan di Alco-Sensor IV no ta cumpli cu ley Hulandes, pues no por wordo usa.
Den un rato di ora, henter e panorama pa tur chauffeur gara ultimo añanan na Aruba a cambia cu 180º di direccion. Y e lo por ta suficiente pa Polis y tambe Ministerio di Husticia core pone placa disponibel pa manda busca decenas di e aparatonan corecto aproba pa Hulanda, y cu si ta acepta pa Huesnan.
Esaki ta e sentencia: Siman pasa, DIARIO a trece en extenso e sentencia di Hues den e caso penal entabla contra e militar K.F.V. di 22 aña di edad. Y basa riba defensa di Abogado, e conclusion a bin como lo siguiente:
“Hues a bisa cu e ta comparti e punto di bista di abogado mr. Tromp cu e promer acusacion, esta core baou influencia, no por wordo proba. Hues a bisa cu K.F.V. ta un militar y mester aplica ley Hulandes. E investigacion cu a sigui caminda a constata 542 µg/l di alcohol den su rosea, no a sosode conforme e reglanan Hulandes.”
“Hues a bisa cu e agentenan di Polis no tin e autorizacion pa haci investigacion di grado di alcohol. Miembronan di Marechaussee si. E agentenan mester a notifica Marechaussee di biaha ora di e accidente.”
E parti cu a cay como sorpresa: “Hues a sigui bisa cu e aparato cu Marechaussee tin, esey ta e aparato reconoci pa ley Hulandes, mientras cu esun di Polis di Aruba no. Hues a declara K.F.V. liber di e promer acusacion.”
Reaccion: Por a tende varios reaccion di personanan den fin di siman riba e sentencia aki. Hopi di nan ta kere cu Polis di Aruba no ta usando e aparato corecto, siendo cu tin algun cu ta kere cu djis kizas ora ta trata di casonan militar, mag di test solamente cu aparato Hulandes y no cu Alco-Sensor IV. E aparatonan di Alco-Sensor IV ta di fabricacion Mericano. Pero nan ta wordo usa pa varios Cuerpo Policial na Europa, y tambe na Inglatera.
Sinembargo, si acaso e ta necesario, kizas e momento a yega pa cuminsa usa exclusivamente esnan permiti pa Hulanda so? E ora ta evita cualkier discrepancia den futuro den Corte.
Manda order aparato di biaha: E reaccion ta mustra cu Polis y Ministerio di Husticia tin di tuma e caso aki na serio, y tuma un decision inmediato pa manda busca aparatonan for di Hulanda, pa asina Polis di Aruba por ta funciona full segun exigencia di Madre Patria.
Na Hulanda tin diferente distrito di Polis cu ta usando e asina yama “Alco-Sensor Vxl” cu ta un topmodel di intoximeters, dirigi pa mercado Europeo en general. E indicacion ta cu Alco-Sensor Vxl aki ta diferente cu e Alco-Sensor IV cu ta wordo usa na Aruba.
Contrario na Alco-Sensor IV, esun nobo di “Alco-Sensor Vxl” si ta cumpli cu e regla hulandes di “Besluit Alcohol, Drugs en Geneesmiddelen in het verkeer”, como tambe “Regeling middelenonderzoek bij geweldplegers”, y “Regeling voorlopig ademonderzoek”.
Ademas di esey, na Hulanda ta usa tambe e otro modelo cu yama “Alco-Sensor FST”.
Di otro banda diferente hende ta puntra cu esnan cu den pasado a wordo condena pa coremento burachi, nan lo por busca forma pa reta nan sentencia, a base di e decision di Corte di siman pasa, pa asina nan lo por haya nan rijbewijs bek?
