Corte Superior a mira urgencia pa kima ‘medical waste’
ORANJESTAD (AAN): E incinerator cu mester percura pa kima cierto tipo di desperdicio toxico ta inactivo pa casi seis luna. A stop su funcion debi na sentencia di un Huez den Corte di Prome Instancia, na December aña pasa, conforme deseo di un activista.
Pero e siman aki, Hof di husticia a indica cu e huez e tempo ey no a evalua tur cos debidamente y cu Gobierno mester por haci uzo di e incinerator.
Ministerio di Naturalesa ta satisfecho cu Hof a mira e impacto negativo cu tin den medio ambiente na momento cu prohibi Gobierno di haci uzo di e incinerator. Na momento cu a cera e dump na Parkietenbos y a paga e candela grandi riba dump, a scoge pa sigui uza e incinerator. Esaki pa motibo cu tin cierto tipo di desperdicio, e asina yama ‘desperdicio critico’, pa cual e unico solucion responsabel y sostenibel ta pa kima esakinan.
Desperdicio critico ta inclui slib cu ta bin di RWZI, carcas di bestianan morto, desperdicio medico y cierto productonan confisca cu conforme ley mester worde destrui. Esaki ta cuater tipo di desperdicio for di un total di mas di 20 otro tipo di desperdicio cu nos comunidad ta produci diariamente. Pa tur otro tin solucion, pero e grupo di cuater aki mester pasa den incinerator.
Hof den su veredicto ta mustra cu di berdad no por otro. E alternativa pa kima riba dump den aire liber manera a haci historicamente no ta aceptabel y ta causa mucho mas daño. Ministerio di Naturalesa a haci esfuerso grandi pa paga e candela y ta den proceso awo pa paga e otro candela cu tin den sub-suelo na dump. Esaki ta e candela cu tin den e cero y cu ainda ta produci holo desagradabel.
E proceso pa paga un candela asina mester worde haci pa profesionalnan y e proyecto aki ta andando.
Desde 2022 ta trahando ariba e procesamento adecua di tur e tipo di desperdicionan. Den e grupo di 4 por lo pronto no tin otro solucion cu kima den incinerator. Sinembargo, tin speranza cu den futuro lo tin cierto tecnologia nobo cu lo haci incineracion tambe obsoleto. Mientrastanto mester sigui uza e incinerator, conforme decision di Hof.
Ministerio di Naturalesa ta aprecia tambe cu Hof a duna instruccion hopi concreto riba e forma con mester anda cu e incinerator. Esaki awor ta duna guia na tur instancia envolvi cu lo mester respeta y traha conforme e uitspraak den corte, pa asina evita cu e forma con ta opera e incinerator bira un peliger pa salud y bienestar general, algo cu kizas por hasta bira un crisis nacional.
