Seis luna di prison y 2 aña sin rijbewijs exigi pa chofer cu a ocasiona accident fatal na Malmok

Hoben a bin cu storia cu su auto no kier a stop

• Security video a proba cu e hoben ni tabata primi brake mes
• Famia di e dama hoben cu exigencia grandi di daño perhuicio 

ORANJESTAD (AAN): E homber hoben N.T. di 20 aña di edad, a presenta dilanti Hues pa e caso penal cu Ministerio Publico a cuminsa contra dje. Fiscal ta acusa e hoben N.T. cu dia 7 Juli 2024 a causa accidente na e birada di Malmok pa bay Westpunt, door di cual e dama hoben Dariana Heredia Perez di 17 aña a fayece.

   E auto Nissan Skyline a bolter y parti den dos door di velocidad halto. Den sala di Corte tabata presente famia di e defunto y mayornan di N.T. Durante tratamento di e caso, e acusado a bisa Hues cu nan tabata na Arashi ta come y na dado momento e defunto Heredia Perez a bisa cu e ta mira ‘spiritonan’. Esey a pone cu nan a core bay for di e lugar pero na dado momento e velocidad di e auto a sigui subi y N.T. no por a para e auto. El a bisa Hues cu e tabata primi duro riba e pedal di brake pero e auto no kier a para. Fiscal ta haya N.T. culpabel di tabata core irresponsabel cu a causa morto di e defunto. Fiscal a exigi 6 luna di prison y 2 aña sin rijbewijs.

   Loke a pasa: Hues a bisa cu un accidente tragico a sosode na Malmok. E pregunta ta si N.T. ta culpabel di loke a sosode. Hues a puntra N.T. kico a sosode. Segun N.T., e auto no kier a para y e velocidad tabata blo subi. E tabata hunto cu e defunto hoben. Tabata 12’or di anochi. El a bisa cu nan tabata banda di laman na Arashi sinta den auto ta papia. E dama a bisa cu e ta mira ‘spiritonan’ rond di e auto y cu na banda di N.T. lo tin ‘un spirito ta wak’. N.T. a bira wak pero no a mira nada. Sinembargo na dado momento el a sinti un ril y su cabeynan a para. E y e defunto a spanta. E ora ey, el a bay for di eynan cu velocidad. Hues a puntra N.T., di con nan a bay Arashi. N.T. a bisa cu e defunto a yam’e pa bay busk’e pa e busca cuminda na Chines. Pero a resulta cu ta e defunto kier a sali cun’e.

   Nan a bay Wendy’s cumpra cuminda y a bay sinta come banda di laman na Arashi. N.T. a bin cu e storia cu el y e victima “a conoce otro apenas 1 siman”. Ta asina cu N.T. tin un amiga y entre tanto a haya yiu. E tempo ey e amiga tabata na estado y N.T. a bisa e defunto cu e relacion no por sigui. Segun N.T., e defunto no tabata contento y kier a sigui mira y papia cu N.T.

   Hues a bisa cu Polis a haya smartphone di e hoben defunto den auto di N.T. y a mira mensahenan WhatsaAp entre e defunto y N.T. caminda N.T. ta bisa e defunto cu nan mester stop e relacion pasobra e ta bira tata. E defunto no tabata kier y tabata rabia cu N.T.

   Hues a mustra cu ora N.T. a core bay for di Arashi, el a hera dal contra un patruya di Polis. N.T. a bisa cu el a core bay cu velocidad y a mira un auto pero no sa cu tabata Polis. Hues a bisa cu e agentenan Policial a declara cu nan a haya nan ta core desvia nan unidad, pues kita pa evita cu N.T. lo a dal contra nan. N.T. a bisa Hues cu e “no a mira cu e auto mester a kita”.

   Auto no kier a para: E no sa con duro e tabata core pero despues e tabata core normal. Segun N.T., na dado momento e auto a subi di velocidad y no kier a para. N.T. a bisa cu el a cuminsa primi brake duro pero e e auto no kier a para. El a bisa cu el a keda primi brake duro. Hues a bisa cu Polis a busca videonan di seguridad den vecindario y por a mira cu ta un vez so e luz di brake a cende. Polis tabata core tras di e auto cu luznan di alarma sendi. Segun N.T., e no a mira nada. El a bisa Hues cu el a bira panico pa para e auto.

   N.T. a splica Hues cu el a yega di haya problema cu e throttle body di e auto y a cambia esaki. El a bisa cu e throttle body nobo tambe tabatin problema. Hues a mustra cu Polis a haci investigacion riba e throttle body. Segun N.T., normal e auto ta para na cas pero door cu e defunto a yam’e, el a sali cu e auto. E ta kere cu ta e throttle body a causa e problema. El a bisa cu e no tabatin problema cu brake di e auto. El a bisa cu na dado momento el a perde control riba stuur di e auto. Esey a causa cu e auto a bolter y parti den dos cu consecuencia cu e defunto a fayece.

   Bao tratamento: Ta asina cu e accidente tragico aki a afecta N.T. masha hopi y te ainda e ta bou tratamento di psicologo.

   Hues a puntra N.T. si el a bay papia cu e famia di e defunto. N.T. a bisa cu el a tende cu e famia tabata busk’e. El a bisa Hues cu e kier papia cu e famia pero e no sa con pa cuminsa. Te ainda e no a papia cu e famia.

   Demanda di daño: Abogado mr. Faarup cu ta representa e famia di e defunto, a bisa Hues cu e famia a keda afecta ora nan a tende cu nan yiu a fayece. E rumannan di e defunto a keda afecta. E famia a keda cu hopi pregunta kico lo a pasa. E abogado a bisa cu e auto tabata core duro y irresponsabel. E auto a parti den dos cu consecuencia fatal. E famia ta puntra si tabatin un pustamento? Na opinion di abogado, e declaracion di e acusado no ta cuadra cu loke ta mira riba videonan di security. E abogado a bisa Hues cu te dia di e caso, e acusado no a pidi disculpa, no a duna condolencia.

   Na opinion di e abogado, mirando N.T. su actitud, e ta haya cu N.T. falta di compasion. El a remarca cu te ainda, e famia no a scucha N.T. bisa sorry. E dos rumannan di e defunto ta bao tratamento di psicologo door cu nan a keda afecta. E muchanan chikito ta blo puntra ki dia e defunto ta bin cas bek.  E abogado a bisa Hues cu ningun placa di mundo lo por alivia e dolor. Por a mira cu e mayornan tabata yora ora e abogado tabata papia.

   E abogado a bisa cu e tata ta demanda gastonan di entiero cu ta algo mas cu 17 mil florin. El a bisa cu tempo cu e defunto tabata traha, e tabata contribui cu 300 Florin pa luna. Te cu awor e ta 12 mil florin cu e famia no ta haya. A tata a keda afecta, ora el a bay mira su yiu na funeraria. E tata ta demanda 10 mil florin. E mama a keda den shock ora cu e mester a bay hospital pa identifica su yiu. E mama ta demanda 30 mil florin. E 4 rumannan tambe a demanda 10 mil florin.

   Fiscal: Fiscal a bisa cu e caso ta hororoso caminda un dama hoben a perde su bida. E pregunta ta, kico mester acusa N.T. di dje. Fiscal a bisa cu e patruya di Polis por poco a dal frontal contra e auto cu tabata bin riba nan. Nan mester a kita y por poco a drenta laman na Arashi.

  Nan a bira y persigui e auto y den un birada na Malmok pa Westpunt, e auto a bolter y parti den dos. Investigacion forensico a mustra cu e auto Nissan Skyline tabata core mas cu 150 km/h. Fiscal a bisa cu N.T. a declara na Polis cu e auto su trot a pega. Anterior e tabatin un accidente caminda e throttle body bieu a pega. A cambia esaki pero esun nobo tambe no tabata funciona bon. Polis a haci investigacion riba videonan di seguridad y a mira cu N.T. tabata core mas cu 150 km/h y no tabata ni primi brake. Segun Polis, N.T. tabata drift riba e caminda di santo. Fiscal ta convenci cu door di N.T. mes, e auto tabata core asina duro.

   Na opinion di Fiscal, N.T. ta bisa cu door di ‘spirito’, el a core duro. Fiscal ta kere cu por bien ta cu door cu N.T. a hera dal contra Polis y Polis a core su tras cu luznan di alarma cendi, N.T. tabata core duro. Fiscal a mustra cu segun N.T. a declara, e “no a mira e auto di Polis”. Fiscal a bisa cu tur chofer mester sa cu core riba di 150 km/h ta peligroso. N.T. tabata sa cu e auto tabatin problema y core mas cu 150 km /h ta un riesgo. Fiscal ta haya cu N.T. a core irresponsabel cu a causa morto di e defunto. El a bisa cu N.T. a keda afecta y ta hayando tratamento. Fiscal a exigi 6 luna di prison pa N.T. y 2 aña sin rijbewijs. Tambe Fiscal a exigi pa confisca e auto.

   Pa loke ta e demandanan di daño, Fiscal a bisa cu e gastonan di entiero ta acceptable. Fiscal a bisa cu e no ta haya suficiente argumenta e placa cu e defunto tabata contribui. Fiscal a sigui bisa cu e ta haya cu tin diferente cos cu no a wordo splica bon pa cu e demandanan. Pa loke ta e demanda di e mama di 30 mil, Fiscal a bisa cu e ta laga na decision di Hues. E placa di pasashi di ruman muher, ta acceptable. E demanda di e rumannan, Fiscal ta laga na decision di Hues y a exigi pa pone medida di pago.

   Abogado: mr. Edwards a bisa Hues cu ta acusa N.T. di a core irresponsabel cu a causa accidente cu consecuencia fatal. E abogado a mustra cu N.T. tabata cu un amiga y cu N.T. a scapa milagroso. N.T. a logra sali for di e auto y a bisa Polis cu e throttle body a pega y e no por a para e auto. E abogado a mustra cu cada vez N.T. a declara na Polis kico a pasa. El a perde control riba e auto cu su velocidad tabata keda subi y brake no tabata traha.

   E abogado a bisa Hues cu N.T. tabata concentra pa purba controla e auto y nada mas. Apesar di tabata den un trauma di loke a sosode, e tabata duna declaracion na Polis. E ta bao tratamento di psycologo. E abogado ta haya cu falta mas investigacion riba kico realmente por a spera ora cu e throttle body a daña y cual otro partinan di e auto lo a keda afecta door di esaki. 

   E abogado a bisa Hues cu N.T. tabata keda primi brake pero e auto no kier baha velocidad. E abogado ta haya cu e accidente no tabata door di culpa di N.T. sino cu ta e mecanismo di e auto a daña y N.T. no por a para e auto mas. Na opinion di abogado, N.T. a haci tur loke ta posibel pa controla e auto y no a dal contra ningun auto of cura. E ta haya cu mester conclui cu N.T. no por a controla e auto mas door cu e mecanismo a daña y no por papia aki di cu N.T., a core iresponsabel. E abogado a pidi Hues pa declara N.T. liber di e acusacion di culpa. Mr. Edwards a bisa Hues pa tene cuenta cu N.T. a keda afecta y pa resto di su bida e lo mester carga cu el a perde un amiga. El a mustra cu ainda N.T. ta bou tratamento di psicologo y no ta asina cu e no kier papia cu e famia sino e no ta cla ainda pa por papia cu e famia.

   Pa loke ta demanda di daño, e abogado a bisa cu e no kier bagataliza pero e ta haya cu mester splica e demandanan mas. El a bisa cu e ta comparti mas o menos punto di bista di Fiscal. El a pidi Hues pa reduci esakinan.

   Pidi disculpa:  Na final di tratamento di e caso, N.T. a bisa Hues cu e accidente no tabata su culpa. El a keda den trauma. El a pidi disculpa na e famia den Corte.

   Hues a sera tratamento di e caso y dia 6 November 2025 lo tin sentencia.