Huez den caso di hoben di 17 aña haya cu arma ta señala
ORANJESTAD (AAN): E hoben homber P.K. di 17 aña di edad, a presenta dilanti Hues pa duna cuenta pa e malo cu el a haci. E ta worde acusa di posesion di arma di candela.
Durante tratamento di e caso P.K. a admiti di tabatin un arma di candela y bala. El a bisa cu el a busca esaki pa defende su mes. Ta asina cu durante su detencion den KIA, el a percura pa sigui su estudio y a gradua.
Requisitorio di Fiscal: Fiscal a bisa Hues cu e ta haya legalmente proba cu P.K. a haci su mes culpabel pa posesion di arma di candela cu bala. Fiscal a bisa cu esaki ta un caso serio. El a mustra cu ultimo aña tabatin hopi caso di posesion di arma di candela y hasta caso di tiramento cu herido.
Castigo di Corte: Na opinion di Fiscal, por bien ta cu ainda P.K. no ta realiza ki peliger un arma di candela ta. Pa cu e castigo, Fiscal a bisa cu e ta tene cuenta cu P.K. ta un first offender, esta promer biaha cu e ta cay den man di husticia y mester presenta dilanti Hues.
Fiscal a aplaudi e hecho cu P.K., apesar di ta sera den Prison di KIA, a sigui studia. Tambe Fiscal a tene cuenta cu P.K. kier haya guia di Reclassering.
Fiscal a exigi 360 dia di prison, kitando e 147 dia cu e ta sera y e resto, 213 dia ta bira condicional cu un tempo di prueba di 2 aña y esaki bao guia di Reclassering.
Esey ta nifica cu e mesun dia, P.K. a sali liber.
Problema di gang un molester: Hues a dicta sentencia di biaha. El a bisa cu e ta haya legalmente proba cu P.K. tabata den posesion di arma di candela y bala. A cumpra esaki pa defende su mes. Na opinion di Hues, tur esaki tin di haci cu problema di gang cu ta causa hopi molester na Aruba. Esaki ta trece turismo na peliger.
Castigo combina: Hues ta haya e exigencia di Fiscal na su lugar. El a condena P.K. na 360 dia di prison, di cual 213 dia ta condicional cu un tempo di prueba di 2 aña y esaki bao guia di Reclassering.
