Asunto di malversa placa na Ministerio Publico
ORANJESTAD (AAN): Diahuebs mainta Hues a dicta sentencia den e caso penal cu Ministerio Publico a cuminsa contra e muher M.G. di 52 aña. E muher aki den pasado a yega di gana un Lotto Miyonario na Aruba, y manera a ser presenta dilanti Huez, cu ora el a gasta tur su placa el a dicidi pa busca placa di otro forma. Pesey e ta worde acusa di a malversa 4.300 Florin na Ministerio Publico y falsificacion di recibo entre 1 Januari 2017 y 31 December 2021.
Requisitorio di Fiscal: Algun siman pasa tratamento di e caso a tuma lugar, caminda e Fiscal di Curacao cu a bin Aruba special pa trata e caso aki, a exigi 240 ora di trabao pa comunidad y si M.G. no cumpli cu esaki e lo mester bay 120 dia sera.
Ademas di e castigo ey, Fiscal a exigi 3 luna di prison condicional, cu un tempo di prueba di 3 aña.
No a proba malversacion na Ministerio Publico: Diahuebs mainta e muher M.G. no a presenta den Corte, pero su abogado mr. Hart si.
Hues a bisa cu e no ta haya proba cu M.G. a malversa placa cu el a haya di hende pa paga na Ministerio Publico. Hues a bisa cu M.G. no tabatin e placa como ambtenaar di Ministerio Publico. E placa nunca a yega Ministerio Publico, y como tal no por papia di “malversa placa na Ministerio Publico”. Pesey Hues a declara M.G. liber di e acusacion aki.
Malversa hendenan si: Despues Hues a sigui bisa cu e ta haya legalmente proba cu M.G. a malversa e hendenan cu dun’e placa pa paga boet. M.G. a gasta e placa na algo otro. Hues a bisa tambe cu e no ta haya proba full e periodo di 1 Januari 2017 te cu 31 December 2021.
Na opinion di Hues, investigacion ta mustra cu ta e periodo di Januari 2020 pa December 2021.
Falsificacion di data: Den computer di Ministerio Publico a constata cu M.G. a pone cu hendenan a paga. A falsifica informacion den computer door di pone cu nan a paga nan boet, siendo cu esey no a sosode.
Castigo di Hues: Pa cu e castigo, Hues a bisa cu e ta tene cuenta cu M.G. a kibra e confianza di e hendenan cu a dune placa pa paga. Tambe cu M.G. a kibra e confianza di Ministerio Publico.
Hues a tene cuenta tambe cu ta promer biaha cu M.G. ta cay sera. El a condena M.G. na 3 luna di prison condicional cu un tempo di prueba di 3 aña. Tambe Hues a condena M.G. na 200 ora di trabao pa comunidad y si e no cumpli cu esaki, e lo mester bay 100 dia sera den prison.
