Hof a dicta sentencia
ORANJESTAD (AAN): Diahuebs merdia Hof di Corte Superior a dicta sentencia den e apelacion di Paul Croes contra e sentencia di 2 December 2021, caminda el a worde condena pa labamento di placa.
Den e sentencia di 2 December 2021, Hues a hay’e culpable di labamento di placa y a ordena cu Paul Croes mester paga mas cu 183.489 Florin of 1 aña di prison.
Paul Croes no a presenta: Por a constata cu Paul Croes no a presenta Diahuebs merdia den Corte pa scucha su sentencia.
Dia 21 Maart 2024 ora di tratamento di e caso di apelacion, Paul Croes a presenta y e dia ey Paul Croes kier a lesa un carta cu el a skirbi pero su emocionnan a subi y wowonan a yena cu lagrima. El bisa Hof cu ta keda na Hof pa determina cuanto mas e lo “mester keda sufri den KIA”.
Culpabel di labamento di placa: Un Hues a lesa e sentencia di Hof y a resumi cu e decision di Hof ta cu Paul Croes ta culpabel di labamento di placa. Hof a rechaza e ponencia di abogado mr. D. Croes, cu mester declara Procurador General no-admisibel.
Hof a mustra cu a keda legalmente proba cu Paul Croes a malversa 55.023 Florin y cu a laba 126.466 Florin. Hof a splica cu door cu den e caso penal a keda dicidi cu Paul Croes a laba e 128.466 Florin, Hof ta mara na esaki. Si conta e sumanan hunto ta yega na 183.489 Florin, cu ta e suma cu Corte den Promer Instancia a dicidi cu Paul Croes mester paga.
Hof a bisa cu e ta tene cuenta cu e periodo cu a pasa promer cu e caso a bin dilanti y ta desconta 20 mil Florin for di e 183.489 Florin.
Paul Croes mester paga of bay cera: Hof a dicidi cu e suma cu Paul Croes mester paga ta bira 163.489 Florin y si Paul Croes no paga esaki, e lo mester bay 18 luna cera.
Ainda Paul Croes tin mas o menos 6 luna di e castigo di e sentencia cu e ta sintando. Manera e sentencia di Hof ta bisa, si Paul Croes no paga e 163.489 Florin, e lo mester sinta 18 luna di prison. Loke no ta conoci, si a stipula un periodo di tempo den cual Paul Croes mester paga e suma aki.
