Fayo di investigacion di Polis a causa
ORANJESTAD (AAN): Diahuebs mainta Hues di Corte di Husticia a dicta sentencia den e caso penal cu Ministerio Publico a cuminsa contra e Arubiano Militar K.F.V. di 22 aña. Dia 18 April 2024 tratamento di e caso a tuma lugar caminda Fiscal ta haya K.F.V. culpabel di a ocasiona e accidente caminda e homber Ruiz a fayece. Abogado mr. J. Tromp a cuestiona e investigacion haci pa Polis, mustrando cu segun ley militar, un militar ta cay bou leynan Hulandes y como tal ta Marechaussee mester a haci e investigacion.
E acusacion di Fiscal contra K.F.V. ta cu riba 14 Juli 2023 el a core un sedan BMW color blanco bao influencia y a causa un accidente fatal den Havenstraat. E tabata pusta auto, pasa auto na forma peligroso, manda su auto na man drechi den direccion di e vehiculo di e persona Ruiz, dal contra su auto cu consecuencia cu Ruiz a perde su bida.
Exigencia di Fiscal: Fiscal durante tratamento di e caso a bisa Hues cu e ta haya cu K.F.V. ta culpable pa morto di Ruiz. E ta haya cu K.F.V. tabata core pa loco. Na opinion di Fiscal, Polis por a haci e investigacion y no necesariamente Marechaussee. El a bisa cu ora ta papia di pusta, ta papia di core pa loco. Testigonan a mira con nan tabata core. K.F.V. tabata bright-deem constantemente cu ta mustra cu lo tabata pusta.
Door di impacto, Ruiz a worde saca for di e auto. Fiscal a mustra cu a base di ley tin un diferencia grandi entre culpa y intencional. Pa hopi esaki no ta comprendibel. Pa cu castigo, Fiscal a tene cuenta cu ta promer biaha cu K.F.V. ta cay den man di husticia. Fiscal a exigi 12 luna di prison y 3 aña sin rijbewijs. Pa loke ta e demanda di daño, Fiscal a pidi pa aproba e gastonan di entiero cu ta den careda di 11 mil Florin. Pa loke ta e otro demandanan, e ta laga esaki na decision di Hues. Pa loke ta daño inmaterial, Fiscal ta conciente cu esaki ta hopi duro pa famia y ta laga na decision di Hues. El a exigi pa e auto BMW keda confisca.
Ausente: Diahuebs mainta por a nota cu K.F.V. no a presenta. Su abogado mr. Tromp a bisa Hues cu K.F.V. no kier a presenta pasobra e no ta sinti su mes bon.
Fayo den investigacion di polis: Hues a bisa cu e ta comparti e punto di bista di abogado mr. Tromp cu e promer acusacion, esta core bou influencia, no por worde proba. Hues a bisa cu K.F.V. ta un militar y mester aplica ley Hulandes. E investigacion cu a sigui caminda a constata 542 micro gram di alcohol den su rosea, no a sosode conforme e reglanan Hulandes. Hues a bisa cu e agentenan di Polis no tin e autorizacion pa haci investigacion di grado di alcohol. Miembronan di Marechaussee si.
E agentenan mester a notifica Marechaussee di biaha ora di e accidente. Hues a sigui bisa cu e aparato di Marechaussee tin e aparato reconoci pa ley Hulandes mientras cu esun di Polis di Aruba no. Hues a declara K.F.V. liber di e promer acusacion.
No a core bao influencia: Hues a mustra cu Fiscal a bisa cu K.F.V. tabata core bao influencia. Aki tambe Hues ta comparti punto di bisa di abogado mr. Tromp, cu no por bisa cu e tabata bou influencia. Ningun caminda Polis a mustra cu tin sintomananan cu K.F.V. tabata bou influencia, ademas di e test.
Hues a sigui bisa cu e declaracion di K.F.V. cu el a bebe, esaki no ta suficiente pa deteremina cu e no ta apto pa core auto. Hues a declara K.F.V. liber.
No sa con accidente a sosode: Pa cu e acusacion di cu K.F.V. a core irresponsabel, Hues a mustra cu tanto Fiscal como abogado mr. Tromp a bisa cu no a core irresponsabel. No por papia cu lo tabatin pustamento. Aki tambe Hues a declara K.F.V. liber.
Pa cu e pregunta, kende a ocasiona e accidente, Hues a bisa cu mester determina si den Havenstraat ta door di culpa di K.F.V. a causa e accidente.
Hues a bisa cu Fiscal ta acusa K.F.V. di lo a core duro diferente caminda pero no den Havenstraat. No por determina cu K.F.V. tabata core velocidad halto den Havenstraat. Hues a bisa cu den LG Smith Boulevard, K.F.V. a core duro ora el a pasa un auto. Hues ta haya cu no tin suficiente indicacion kico a causa e accidente. No por bisa cu K.F.V. a bay core riba e rail di Tram y dal contra e auto di e difunto Ruiz. Hues a remarca cu no tabatin camera net dilanti Boolchand’s unda e accidente a sosode.
Sospechoso declara liber: Hues a conclui cu e ta declara K.F.V. liber. El a ordena pa e auto BMW worde debolbe. Pa loke ta e demanda di daño, esaki ta keda rechaza ya cu K.F.V. no ta culpabel.
Por a ripara cu famia di e victima no tabata contento cu e sentencia.
