ORANJESTAD (AAN): Otro siman un grupo di periodista lo mester presenta den Corte di Husticia pa
e caso penal cu Ministerio Publico a cuminsa contra nan relaciona cu scuchamento di Tetra-Radio di Polis via e ex-agente Vos.
Caso Penal: Por a compronde cu e caso lo ta Dialuna awor 24 Juni 2024, caminda e 5 sospechosonan: “Speed” Andrade, Koolman, Lacle, Giel y Ponson, lo mester presenta.
Tabatin interogacionnan cu a tuma lugar luna pasa y awor Ministerio Publico a dicidi cu ta cuminsa cu e caso penal. E scuchamento di Tetra-Radio di Polis no ta cos di awor sino ta data di 2018. Ta varios agente di Polis a perde nan trabao door di esaki.
Por tin mas sospechoso: Luna pasa tabatin interogacionnan a tuma lugar y tin indicacion cu a base di declaracionnan aki, lo por tin mas sospechoso. Ta asina cu Ministerio Publico no kier bisa nada riba e caso aki. A busca manera pa haya mas informacion pero e contesta tabata cu no ta duna ningun informacion riba e caso aki te ora cu e ta den Corte.
Na December 2023, durante tratamento di e caso penal contra e ex-agente Vos, Fiscal a mustra cu desde 2018, tres di e Tetra-Radionan tabata destina pa Vos como Polis di Bario. Investigacion a mustra cu Vos tabata suministra informacion na Lacle, Giel y Andrade. Asina a haci investigacion na cas di Vos y a haya tres laptop instala riba 3 Tetra-Radio riba canal KPA-1, cu ta e canal general di Polis. Tabata usa e programa Zello pa asina manda re-transmiti informacion di Tetra-Radio automaticamente pa cierto media cu tambe ta usa Zello pa ricibi e audio, estilo walkie-talkie electronico.
Pero ora cu Recherche a bay traha cu 2 di e Computer Laptops aki, via remote control nan a worde ‘desactiva’ di distancia pa daña investigacion. A logra habri un laptop caminda a haya 9.572 informacionnan di Polis manda pa cierto media. A haya uno cu un SIM-Card conecta na 24 ora.
E sentencia di Vos a worde apela door di Ministerio Publico, pasobra no ta di acuerdo cu e decision di Hues. Ta asina cu Fiscal a exigi 36 luna di prison (3 aña) di cual 8 luna ta condicional cu un tempo di prueba di 3 aña. Fiscal a exigi tambe cu pa 5 aña, Vos no por eherce e trabao di Polis.
Hues a pospone e caso pa 45 minuut y despues a dicta sentencia. Hues ta haya Vos culpabel di algun di e acusacionnan. Hues a condena Vos na 16 luna di prison, di cual 8 luna ta condicional cu un tempo di prueba di 3 aña. Hues a bisa cu e ta prohibi Vos di traha como Polis pa un periodo di 3 aña. E decision aki a haci cu e dia ey mes Vos a haya su libertad.
Dialuna awor lo bira interesante pa mira si ta cinco sospechoso so lo presenta of tin mas. Tambe lo ta interesante pa scucha e acusacion(nan) cu Fiscal lo presenta.
