E sospechoso ta para riba cu e no a viola sino tin relacion sexual
ORANJESTAD (AAN): Diabierna mainta Fiscal a exigi 4 aña di prison pa e homber Venezolano O. di 34 aña, kende Fiscal ta haya culpabel di a viola un dama turista F. durante masashi den un hotel. E sospechoso O. ta para riba cu e no a viola e dama sino cu nan tabatin relacion sexual. Tratamento di e caso aki a dura oranan largo. Den e articulo aki ta publica tratamento di e caso y loke Fiscal a exigi. Den un otro articulo ta publica loke e defensa a trece padilanti.
Victima Mericano a presenta: Diabierna mainta por a mira e victima F. acompaña pa su casa den Corte caminda na su turno a hiba palabra. Esaki di acuerdo cu e cambio di ley caminda victima por hiba palabra den Corte pa bisa kico tur el a pasa aden y con e ta sinti.
Fiscal a bisa cu ta acusa O. cu riba 28 December 2023, el a viola un dama turista F. durante cu e tabata haci masashi na un hotel.
- a bisa cu nunca el a abusa di e dama turista F. El a accepta di tabatin relacion sexual, pero nunca forzoso.
Tene relacion sexual: Hues a bisa O. pa splica kico tur a sosode. O. a bisa promer a cuminsa masashi boca abao y despues e turista F. mester a bira boca ariba y el a tap’e cu sarbete pero a bira cara pa no wak’e sunu. Segun O., ora el a cuminsa masashi e pia robez, el a ripara cu F. a cuminsa hala rosea pisa. Ora el a cuminsa masashi pia drechi, F. a cuminsa morde su lip y hala rosea mas pisa y a habri su pia un poco. O. a puntr’e si e masashi ta bon y el a bisa si. E ora ey O. a puntr’e si e por mishi na su parti intimo. E dama a bisa si.
- a bisa Hues cu el a cuminsa masashi eynan y penetr’e cu dede. Na dado momento F. a habri su pianan mas y O. a subi riba dje y a cuminsa tene relacion sexual. Segun O., na dado momento el a sinti cu e no mester haci’e pasobra ta su trabao. El a stop di tin relacion y a hala atras. Segun O., e ora ey e dama F. a hala bin mas cerca y O. a sinti cu e dama tabata kier mas. E dama F. a brasa O. y a hal’e cerca. E ora ey O. a reacciona cu no y a hala atras atrobe. El a bisa F. pa lag’e wak e ora. Tabata falta 15 pa 20 minuut pa completa e masashi. O. a bis’e pa mihor e masashi su cabez y nek. E momento di masashi nan dos a combersa normal. Despues O. a puntra F. si e ta contento cu e tratamento y el a bisa cu si.
Dama turista ta haci denuncia: Hues a bisa cu e dama F. a declara na Polis cu e masashi tabata normal pero ora el a bolter, O. a penetr’e cu su dede y despues a subi riba dje y sunchi y despues a tene relacion sexual cun’e pero a stop. F. a bisa cu O. a pone dede na boca y bisa F. pa keda keto. Segun O., ora e tabatin relacion, el a mustr’e pa keda keto y no haci desorden.
- a bisa cu el a duna O. 30 Dollar tips y a bay cumpra sun screen y a bay cu su casa den camber. Den camber el a conta su casa cu el a worde viola. Nan a bay front desk y haci denuncia. Segun F., ora el a sinti e dede di O. el a keda paralisa. Hues a lesa loke F. a skirbi riba papel na front desk caminda el a describi tur loke a sosode. Ta asina cu e turista F. a bay hospital pa haci investigacion.
Hues a bisa cu e hotel tin video y por a mira cu F. a yega e Hotel Spa y e ta worde hiba na un parti di e Spa. Despues ta mira cu F. ta bin back. Despues ta wak’e ta cana den hotel y despues ta cana cu un saco di plastic y a bay subi lift. Despues ta wak F. na front desk y Polis presente.
Ta asina cu Hues Comisario a laga O. liber pero Ministerio Publico a apela y Hof a dicidi cu no por laga O. liber promer cu e caso. Te ainda e ta sera den KIA.
Victima bao tratamento: E victima F. a manda documentonan na Ministerio Publico pa mustra cu e mester a bay psycologo pasobra el a keda cu trauma, miedo. E ta hopi depresivo cu ta strobe di tin un bida normal. Mientras cu Hues tabata lesa e documentonan medico, e victima tabata yora.
E psycologo ta haya cu F. lo mester haya tratamento di psychiater y un terapista di abuso sexual.
Victima a papia den Corte: E dama F. hopi emociona y yora, a bisa cu e ta un persona hopi reserva y no ta papia cu hopi hende. Esnan cu conoce bon sa cu e ta optimista pa traha. Awor cu el a pasa den e experencia mahos aki, e no ta sigur cu e ta optimista. El a bisa cu el a bin Aruba pa pasa vacacion cu su casa y nan a asumi cu lo ta sigur na e hotel. Su casa a hiba un lucha contra cancer y a vence. El a bisa cu den camber di masashi e tabata pensa pa sobrevivi e abusador. El a bisa cu nunca e lo bay lubida e experencia di violacion.
Loke e tabata desea, tabata di sali for di e camber. Ora el a sali, e tabata haci cosnan cu e no sa kico e tabata haci. E tabata kier a sali mas liher posibel for di e lugar. E dama a bisa Hues cu el a purba di actua normal pa ningun hende ripara kico a pasa. El a bisa cu el a sinti su mes sushi. El a bisa cu el a warda masha hopi na hospital y a bay hotel y bolbe su siguiente dia pa haci investigacion forense.
Na Merca el a isola su mes y no por haci cosnan cu e ta costumbra di haci. El a bisa cu te ainda, e tin hopi dificultad pa drumi. Su casa ta cuid’e. E tabata yora cada biaha cu e baña pa kita e sensacion cu el a sinti ora cu O. tabata sunchi e. E tabata hasta grita su casa pasobra e no por soporta. E no tabatin relacion cu su casa. Cada vez cu su casa mishi cun’e, e tabata haya un rabia y tabata grita. E tabata isola su mes hasta di su mama. E tin miedo pa ta na cas su so. E no ta sinti’e sigur mas na cas. Nan a instala extra lock y hasta camera pero esey tampoco ta yuda.
E dama F. a expresa cu nunca e homber O. lo sinti loke el a sinti. El a bisa Hues cu no mester laga O. haci esaki cu ningun hende mas. El a bisa cu e lo keda afecta pa resto di su bida y lo no ta mescos cu e tabata anterior. El a bisa cu e ta sinti falta di su mes di loke e tabata y no sa si e lo bira bon back. El a bisa cu ningun momento el a duna permiso pa O. haci esaki cun’e.
Fiscal a exigi 4 aña: Fiscal a bisa Hues, cu O. a abusa di su posicion, y di abusa di un turista. E turista a pensa promer cu O. su man a faya ora e tabata masashi su pia. Despues e ta sinti con O. a hinca dede den su parti intimo. E dama a haci denuncia di violacion contra O. Fiscal a mustra cu O. a bisa cu el a haci un fayo door di tin relacion intimo cu e turista. El a kere cu e turista a gusta y pesey a hinca dede y despues a tene relacion sexual. Fiscal a remarca cu e turista a bisa cu ningun momento el a duna autorizacion pa O. mishi cu su parti intimo y mucho menos tene relacion sexual.
Fiscal a bisa Hues cu den caso di violacion, tur hende ta reacciona diferente. Tin hende ta resisti, otro ta bay den un shock y ta sigui cu e rutina y despues ta reacciona. Na opinion di Fiscal, no ta nada straño cu e turista tabata kier pa tur cos caba y despues a bay conta su casa. El a bisa Hues cu por a scucha e turista bisa con el a keda den trauma y ta isola su mes.
Fiscal a remarca, pakico O. no a tuma e posicion professional di no tin relacion sexual cu un cliente. El a mustra cu O. a bisa cu el a mishi 2 biaha cu e parti intimo di e turista y despues a kere cu el a gusta y a tene relacion sexual cu e turista. Fiscal ta haya cu no por bisa cu e turista mes a gusta y a laga O. tene relacion sexual cun’e. Fiscal ta haya cu aki por papia di cu O. a viola e turista. Fiscal a menciona sentencia di Corte Supremo di un caso di masashi cu ta considera violacion pasobra ningun momento a duna autorizacion pa tin relacion sexual.
Na opinion di Fiscal, e hecho cu e turista no a reacciona di biaha, no kiermen cu el a gusta. Pa loke ta e castigo, Fiscal a bisa cu e ta tene cuenta cu O. tin un señora cu ta en espera di baby. E ta haya cu O. mester a tene cuenta cu esaki ora e tabata masashi turista. E turista a expresa cu nunca el a duna autorizacion pa a tene relacion sexual cun’e. Segun ley, e castigo pa violacion ta 3 aña di prison. Fiscal a sigui bisa cu ora ta trata di abusa di posecion esey ta haci e castigo bira mas pisa. E ta haya cu O. a tacha e integridad di e turista. E turista lo keda añanan largo den trauma y actual e ta hayando tratamento.
Fiscal a exigi 4 aña di prison. Tambe Fiscal a bisa cu mester proteha comunidad di cu O. lo bolbe haci algo asina. El a exigi pa prohibi O. pa 4 aña no por haci e trabao di masashi.
Hues a sera tratamento di e caso y a bisa cu 5 Juli 2024 pa 8:15 am lo tin sentencia.
