ORANJESTAD (AAN): Den un movimento hopi sorprendente, Dialuna atardi Ministerio Publico di Aruba a informa
cu nan a dicidi pa retira e apelacion contra e absolucion (vrijspraak) di e sospechoso A.J.R. den e asesinato di John A. ‘Poentje’ Castro riba 22 di December 2010.
Corte den Prome Instancia a duna R. vrijspraak riba 24 di mei 2022, casi 12 aña despues di morto di Castro, debi na falta di prueba.
Ministerio Publico a bay den apelacion contra e decision aki di Huez, pero awor, despues di a bolbe studia e sentencia, Ministerio Publico a dicidi pa conforma.
E motibo pa esaki ta cu e dossier actual no tin suficiente punto di referencia pa por yega na pruebanan legal y convinciente den e caso. E caso ‘Apollo’ lo keda un cold case y si na cualkier momento den tempo surgi mas prueba, lo worde habri di nobo.
Ministerio Publico a reuni Dialuna cu famia di difunto Castro y a pone nan na haltura di e decision.
E homber A.J.R. ta sintando actualmente un castigo di prison den un otro caso.
