Fiscal ta cuestiona violencia publico den restaurant yen di turista
ORANJESTAD (AAN): Dialuna mainta, te den oranan di merdia, a trata e caso penal cu Ministerio Publico a cuminsa contra e dos yiunan homber di Michael Williams, N.W. (33) y D.A.W. (34), e yiu homber di Promer Minister Wever Croes, K.W. (27) y e swa di K.W., esta T.M. (22). E cuater sospechosonan ta worde acusa cu riba 14 November 2021 a causa violencia publico den Azia Restaurant caminda a destrui un cantidad di glas y tambe a herida un chef cook severamente na su man drechi. Ta asina cu T.M.
Den e articulo aki ta publica e punto di bista di Fiscal y e defensa di e abogadonan. Den un otro articulo lo publica kico e sospechosonan a bisa den Corte. Ta asina cu a pasa den Corte e videonan di seguridad di Azia, caminda por a mira con henter e pelea a sosode.
Fiscal: Fiscal a bisa cu e ta haya legalmente proba cu dia 14 November 2021 den oranan di anochi, tabatin e violencia publico den e restaurant Azia na Palm beach, caminda e chef cook a resulta herida y diferente glasnan den e restaurant a kibra.
Fiscal a bisa Hues cu e caso aki a causa un impacto den comunidad y a haya hopi atencion den media. Loke a sosode a causa un impacto negativo riba tur e turistanan presente den e restaurant. Fiscal a bisa cu Azia Restaurant a sufri daño grandi pero gerencia no kier haci denuncia. El a bisa cu Polis a bay pa violencia publico y Recherche a tuma over e investigacion. A detencionnan a sosode den December 2021 y Januari 2022. Fiscal a splica cu den December tabatin receso. 25 Februari 2022 procesverbaal a keda cla.
Caso penal envez di Tomzitting: Fiscal a splica cu door cu e sospechosonan no a admiti loke nan a haci, no a bin cu un Tomzitting. A avisa tur sospechoso na October 2022 cu lo cuminsa un caso penal. Door cu K.W. a opone contra e citacion, esey a haci cu no por a sigui cu e tratamento di e caso na November 2022 manera tabatin planea.
Un otro motibo cu no por a sigui cu e tratamento na November 2022, ta cu T.M. a bay biba na Hulanda. Dia 23 Maart 2023 a pospone e caso pasobra N.W. no tabata tey.
Incidente den club nocturno: Fiscal a bisa cu promer cu e incidente na Azia, tabatin un incidente na Gusto Nightclub caminda tabatin intercambio di palabra entre K.W. y N.W. den baño.
Ora cu K.W. a dicidi di bay cu su grupo for di Gusto, e homber C. a dal K.W. cu un boter den lomba. Fiscal a bisa cu e homber C. a worde persigui den Tomzitting y a haya 40 ora di trabao pa comunidad.
Incidente na Azia Restaurant: K.W. a bay Azia cu e grupo pa celebra cumpleaños di su pareha. Despues di un rato N.W. y D.A.W. a bay Azia tambe. Nan a declara cu nan a bay pa come. Fiscal a bisa cu riba imagennan di camera di seguridad di Azia por mira tur loke a sosode.
E supervisor a bisa cu un di nan a bisa cu nan a bin cerca un amigo. El a pensa cu nan lo ta hunto cu e grupo di K.W. den VIP. A resulta cu N.W. a bay dal K.W. y despues a sigui tiramento di mokete y tiramento di boter. N.W. a tira boter riba K.W. y K.W. ta tir’e cu un stoel.
Despues N.W. na salida ta tira un glas y kibra un lampi den Azia. Fiscal a sigui bisa cu por a mira tambe cu D.A.W. a tira mokete y a tira un glas den direccion di e area di VIP. El a sigui bisa cu e homber T.M., ora cu N.W. a dal K.W., a dal N.W. cu mokete. Despues el a pasa man pa un boter y a tira e boter cu a dal un koki na su braza. E koki e momento ey tabata purba gara N.W. El a sufri 4 corta serio na su man drechi y en total mester a haci 22 cosi na hospital. Un di e cortanan a afecta un ader cu tabata spuit sanger profusamente. Mester a pone verband cu presion pa controla e sangramento pisa.
Castigo combina exigi pa tur sospechoso: Fiscal ta considera esaki un violencia publico den un restaurant cu hopi hende y turista. El a mustra cu hopi hende a sali core di panico. E ta haya cu e grupo aki, a stroba orden publico y pesey a pidi asistencia di Polis. Fiscal a bisa cu e trahadornan, a dura 2 ora pa haci full e restaurant limpi di tur glasnan cu a worde kibra.
Na opinion di Fiscal, den e violencia publico aki no por papia cu e sospechosonan a actua den defensa propio. E ta haya cu N.W. y D.A.W. a bay ataca K.W. N.W. a bay dal K.W. di sorpresa y sin ningun motibo.
Fiscal a bisa cu e accion di K.W., door di tira un stoel den direccion di N.W. no ta worde considera como defensa propio. El a mustra cu di biaha despues cu K.W. a haya mokete, pelea a start. Amigonan di K.W. a tira mokete.
Fiscal ta haya cu D.A.W. y N.W. a cuminsa sali for di e restaurant y K.W. a bay nan tras pa tira e stoel y T.M. a tira un boter. Na opinion di Fiscal, e momento ey K.W. y T.M. tabata ataca N.W. y D.A.W. Fiscal ta haya cu e tiramento di boter di T.M. no tabata na su lugar. Fiscal ta haya tur culpable di violencia publico den restaurant. El a bisa cu T.M. a ocasiona herida severo na e koki A.L., cu a keda afecta.
Fiscal a bisa cu tin imagennan di camera cu ta mira con e koki a resulta herida y T.M. mes a declara cu el a tira e boter.
Pa cu e castigo, Fiscal a bisa cu e ta tene cuenta cu e tempo cu a pasa promer cu e caso a bin dilanti. Fiscal a exigi pa T.M. castigo di 230 ora di trabao pa comunidad, 3 luna di prison condicional cu 2 aña di prueba. Tambe Fiscal a exigi pa T.M. paga e demanda di daño di parti di e koki di 13 mil Florin.
Pa N.W., Fiscal a exigi 176 ora trabao, 1 luna di prison y 2 aña di prueba. Pa K.W. y D.A.W., Fiscal a exigi 148 ora di trabao, 1 luna di prison cu 2 aña di prueba.
Abogadonan: Abogado mr. Mohamed a bisa Hues cu e no ta haya legalmente proba cu N.W. a tira boternan y stoel. El a pidi Hues pa declara N.W. liber di esakinan.
Abogado mr Rozenstand ta haya cu e castigo pa D.A.W. no ta husto. El a mustra cu pa K.W. y D.A.W., Fiscal a exigi e mesun castigo siendo cu D.A.W. a tira solamente 2 mokete y un boter y a sali bay. E abogado ta haya cu si compara esaki cu loke K.W. a haci. E no ta husto.
Abogado mr. Reinkemeyer a bisa cu e problema a cuminsa na un club nocturno caminda tabatin discusion entre N.W. y K.W. Ora a dicidi di bay, K.W. a haya boter di cerbez den lomba, tira door di e homber C. Na opinion di e abogado, N.W. no a laga e asunto na solamente un discusion sino a bay tras di K.W. na Azia. Segun e abogado, K.W. a purba evita tur cos. El a bay cu su grupo Azia sinta te patras. Pero N.W. y D.A.W. a bay Azia y N.W. a dal K.W. di trincion.
E momento ey pelea a cuminsa. K.W. a mira N.W. coy un boter grandi y menaza di tira. K.W. a dicidi di coy un stoel y tira esaki riba N.W. Esey tabata momento cu e trahadornan di Azia a gara N.W. y sak’e for di restaurant. E abogado ta haya cu K.W. no ta culpable di violencia publico. E ta haya cu K.W. a tira e stoel pa defende su mes y e hendenan cu tabata cun’e. E ta haya cu e stoel no a worde kibra pues no por papia di destruccion tampoco. El a bisa Hues cu un condena lo por perhudica K.W. su trabao di Seguridad na Aeropuerto.
Abogado Reinkemeyer a bisa cu T.M. tabata presente na e club nocturno tambe y a mira tur loke a pasa. T.M. a mira N.W. a coy un boter y kier tir’e den direccion di K.W. y otronan di VIP. Pesey el a tira boter pa defende su swa.
Abogado mr. Ruiz a cay aden y bisa cu no por mira riba video, si loke T.M. a tira ta esun cu a dal e chef di koki. E abogado ta haya cu mester declara T.M. liber. Nan a mustra cu un castigo lo perhudik’e den su estudio. mr. Ruiz ta haya cu ta dificil pa determina un daño inmaterial. No tin raport psycologico y tampoco tin relato medico. E ta kere cu den un caso mas profundo lo por bay determina esey.
