Fiscal a reacciona den Corte --- ORANJESTAD (AAN): Tratamento di e caso penal contra e homber M., kende a viola su dos yiunan, un di 5 y e otro di 6 aña, a tuma basta tempo.
Ta asina cu Hues a confirma e exigencia di Fiscal cu ta 4 aña di prison, di cual 3 luna ta condicional y 3 aña di prueba bou guia di ReclaSsering. Tambe cu M. mester paga 10 mil florin na daño inmaterial. Den e articulo aki DIARIO ta concentra riba e exigencia di Fiscal, e defensa di abogado mr. G. Sjiem Fat y decision di Hues. Den un otro articulo ta publica tur loke a sosode durante tratamento di e caso.
FISCAL
Fiscal a bisa Hues cu casonan di inmoral ta hopi fastioso. Aki ta trata di un tata cu ta haci actonan inmoral cu su mesun yiunan. Fiscal a bisa cu segun M. esey ta door di uso di cocaina. Esey no ta un excuus. E ta haya esey e falta di e tata. E tata no mester a usa cocaina. Fastioso ta cu esaki a sosode tempo e muchanan tabata chikito. E dos muchanan a declara separa cu nan mester chupa nan tata su parti intimo. E mucha muher ta bisa cu e tata a penetr’e di atras.
VIOLACION DI MUCHANAN
Fiscal a bisa Hues cu segun hurisprudencia, laga chupa ta wordo considera violacion. M. a bay den e camber, tene cabez di cada mucha y pone su parti intimo na nan boca. Fiscal a bisa Hues cu e no ta kere cu M. a keda te eynan y despues a kita. E muchanan a bisa cu nan mester a chupa. Fiscal ta haya cu aki por papia di violacion.
Fiscal ta haya cu tin mucho poco informacion pa determina si tabatin penetracion di patras. Pesey el a pidi Hues pa declara M. liber di penetracion. Pa loke ta e demanda di daño inmaterial di 5 mil florin pa cada mucha, e ta haya cu e muchanan ta bou di tratamento. Pesey Fiscal ta haya e demanda na su lugar.
EXIGI CASTIGO
Fiscal a bisa Hues cu ta M. mes a bay usa cocaina mientras su yiunan tabata drumi. Fiscal ta haya cu M. a abusa di su mesun yiunan. Na opinion di Fiscal, M., a viola e integridad di e muchanan. Ta un hecho cu victimanan di abuso ta keda afecta pa hopi tempo. Tin biaha ta ora nan ta adulto, nan ta bay papia di loke a pasa nan.
Fiscal a mustra cu Hof ta duna 4 aña di prison pa viola mucha menor di edad. Abuso di mucha ta hopi na Aruba y hopi ta keda keto. Fiscal ta haya cu mester denuncia esakinan. Mester manda señal bon cla cu no por tolera.
Pa cu e castigo, Fiscal a bisa cu mester tene cuenta cu M. ta keda tata di e muchanan y den futuro e mester tin contacto cu su yiunan. Mester busca forma con esaki lo mester sosode. El a exigi 4 aña di prison di cual 3 luna ta condicional y 3 anja di prueba bou guia di Reclasering.
ABOGADO
Mr. G.Sjiem Fat a bisa Hues cu M. a bisa cu e tabata bou influencia di cocaina y el a actua robez pa cu su yiunan. E tin berguenza pa loke a sosode. E ta realisa cu e mester para responsabel pa loke el a haci. Abogado a cuestiona cu no tin un raport cu ta mustra e estado di e muchanan. E ta haya cu e muchanan ta bou tratamento di psicologo y pakico no tin raport riba nan estado.
E abogado a mustra cu M. tin problema emocional y no sa con pa atende cu esaki. M. ta compronde cu e mester haya castigo y e kier mantene su yiunan.
CUESTIONA MEDIA
E abogado, cu potretnan cu a sali publica di M. den media, a cuestiona e hecho cu den media a actua no profesional door di pone tur informacion di M. cual ta afecta e famia. E ta haya cu Fiscal lo mester tuma un postura pa cu esaki.
Fiscal a reacciona cu e no por duna informacion encuanto media. El a bisa mr. Sjiem Fat cu si e ta sinti cu e publicacionnan a afecta e famia, e lo por haci denuncia.
SENTENCIA HUES
Hues a sera tratamento di e caso y a bay pensa un rato pa tuma un decision. Hues a bolbe y a bisa cu e ta haya legalmente proba cu M. a abusa di su dos yiunan menor di edad. Hues a bisa cu e ta comparti punto di bista di Fiscal, cu no ta kere cu M. a djis pone su parti intimo so na boca di e muchanan. Hues a bisa cu segun ley, un tiki movecion so ta cay bou calificacion penetracion. Hues a bisa cu e ta comparti punto di bista di Fiscal cu mester mira esaki como penetracion. Esakinan ta casonan hopi serio.
Hues a bisa cu no por tolera cu un tata ta haci esaki cu su yiunan. M. a mustra cu e ta arepenti y tin berguenza cu el a haci.
Hues a mustra cu segun castigo di Hof, ta condena 3 aña di prison pa cada mucha. El a bisa cu Fiscal a splica pakico el a mantene 4 aña di prison y no mas halto. Esaki, pa asina duna M. e ayudo cu M. mester haya. Hues ta haya e exigencia di Fiscal na su lugar. Pa loke ta e demanda di daño inmaterial e ta haya e ta acceptable.
Hues a condena M. na 4 aña di prison di cual 3 luna ta condicional cu 3 aña di prueba bou guia di Reclassering. Tambe Hues a condena M. pa paga 10 mil florin di daño inmaterial y a pone e medida di pago. Tambe Hues a bisa cu e no ta haya e gastonan di abogado exagera y ta wordo aproba esaki pa M. tambe paga.
