Hues a hala su atencion y miembronan di CEA a actua
- Tata a menaza e abusador di su yiu muher chikito
- Abusador ta un homber di edad grandi
ORANJESTAD (AAN): Diabierna mainta den sala di Corte a presenta un situacion, caminda tata di un mucha muher, victima di abuso, a menaza e sospechoso homber W. di 74 aña, di lo a mat’e. E miembronan di CEA tabata atento y ora cu Hues a hala e homber su atencion cu e no por haci menaza asina den sala di Corte, di biaha e dos miembronan di CEA a bay riba e homber y mustr’e riba su comportacion.
E acusacion cu Fiscal a presenta contra e sospechoso W. (74) ta cu entre 2015 y 2018, mas cu un biaha el a penetra e mucha muher J. (di 16 aña), kende e tempo ey tabata menor di edad. Fiscal a acusa W. di abuso di un menor di edad, caminda mas cu un biaha W. a penetra e mucha cu su dede. Tambe Fiscal a bisa cu den e mesun periodo, W. a mishi na partinan intimo di e mucha J. Ta asina cu famia di W. a presenta den Corte y e mayornan di e victima J.
Homber ta admiti di a mishi pero no penetra: Hues a puntra W. si ta berdad e acusacionnan y W. a desmenti di tabatin penetracion cu e mucha. El a bisa cu el a mishi cu e mucha J.. Segun W., e mucha J. a provok’e. Segun W., el a pasa man na e mucha su pecho y na parti intimo pero no tabatin penetracion. Hues a mustra cu e mucha a declara cu for di tempo e tabata chikito e tabata bay keda serca W. y su señora cu tabata wak pa e y su otro ruman muher, mientras cu e mayornan tabata traha.
Den su declaracion na e miembronan di KZP, e mucha a describi con W. tabata mishi na su curpa. E tempo ey, segun e mucha J., e tabatin 5 aña. Segun W., e mucha ta gaña y cu e no a mishi cu e mucha na su cas sino na cas di e mayornan. El a bisa Hues cu tempo e mucha tabatin entre 13 y 14 aña, el a mishi cun’e. Hues a bisa cu e mucha J. a bisa cu ora W. tabata mishi cun’e, e tabata bisa W. pa stop y cu W. a bis’e pa no bisa nada. W. a reacciona cu esey no ta berdad. El a bisa Hues cu J. ta gaña hopi. El a bisa cu e mucha no a bis’e nada.
Hues a puntra W. cuanto biaha el a mishi cu J. y W. a bisa cu e no ta corda. E ta kere entre 2 y 4 biaha. Hues a bisa bisa cu J. a declara cu W. tabata pasa man y penetra cu dede. Segun W. esey no ta berdad. Hues a haci W. pregunta si W. a pidi J. pa pasa man na W. su parti intimo. W. a bisa cu el a pidi e mucha pa mishi cu su parti intimo y e mucha haci’e cu su man. Hues a mustra cu e mucha a declara na KZP, cu e tabata yora cada vez cu e pensa cu W. tabata mishi cun’e. Segun W. esey no ta berdad.
Hues a mustra cu e mucha J. a declara na KZP cu mas cu 30 biaha W. a mishi cun’e. W. a reacciona cu esey no ta berdad.
Tata y welo tambe lo a mishi: Na dado momento Fiscal a haci pregunta na W. riba un declaracion di testigo cu a hala W. su atencion cu si e sigui haci asina cu J., e lo bay sera. W. a adimiti cu el a bisa e testigo cu si e bay sera, otronan tambe lo mester bay sera . Fiscal a puntra W., kico e kiermen cu esey. W. a bisa Fiscal cu e tata di e mucha J. y e abuelo tambe tabata mishi cu J.
Tata di victima a menaza sospechoso: E aña aki a keda introduci e ley cu e victima of familiar di e victima por hiba palabra den sala di Corte. Tata di e victima, e homber B. a haci uso di esaki. El a bay para tras di un microfono den sala di Corte y a bisa Hues cu e ta lesa, loke su yiu J. a expresa den e carta. Hopi emociona el a bisa cu J. ta bisa cu e no kier mira W. mes y cu e tin hopi miedo di W. El a pidi pa Hues laga W. keda sera den prison te dia e muri.
E tata B., cu wowo na awa, a bira wak W. y bis’e cu e unico motibo cu W. ta na bida ta pasobra B. tin yiu cu ta depende di dje. El a bisa W. cu e lo a mata W. E tabata mustra dede riba W. y ripiti cu rabia cu e lo mata W. Hues e momento ey a reacciona y a bisa B. pa midi su palabranan y cu no ta permiti pa menaza hende den sala di Corte.
Di biaha por a mira cu e dos miembronan di CEA den sala di Corte a bay riba B. y a bis’e cu e no por haci menaza. Un di e miembronan di CEA a cana hiba B. bek na su stoel y a papia cun’e pa e calma su mes.
Fiscal a exigi 5 aña di prison: Fiscal a bisa Hues cu e caso a bin na claridad ora cu na school, maestra a constata cu e mucha J. tabata actua straño. A yama e mama pa bay school y e mucha a conta cu for di tempo cu e tabatin 7 aña, te cu 9 aña, W. tabata mishi cun’e. El a bisa cu W. tabata su bisiña. Tempo cu e mucha J. a bisa esaki, e tabatin 14 aña. Fiscal a mustra cu durante interogacion na KZP, J. tabata yora ora puntr’e si W. a penetr’e. Fiscal ta haya cu W. ta confirma di a mishi cu J. na su pecho y parti intimo. Na opinion di Fiscal, esaki ta wordo considera como prueba di sosten. Fiscal ta haya cu a keda legalmente proba tur dos acusacion. Fiscal a bisa cu esaki ta un caso hopi serio caminda W. a abusa di su funcion pa cuida mucha, pa satisface su mes. Fiscal a remarca cu, den su cas caminda J. mester sinti su mes sigur, el a wordo abusa door di W., kende tabata tin cu wak pa J. Fiscal a mustra cu J. a keda afecta y ta hayando tratamento. Fiscal a bisa cu W. a abusa di e confianza cu e mayornan a pone den W. cu nan yiu. Fiscal a exigi 5 aña di prison pa W. Pa loke ta e demanda di daño di 10 mil florin, Fiscal a mustra cu psycologo a constata cu e mucha a keda afecta. Fiscal ta haya e demanda ta na su lugar. Tambe Fiscal a pidi Hues pa impone e medida di pago.
Abogado: mr. Mohamed a bisa Hues cu W. a admiti di a mishi cu J. pero no a penetr’e. E abogado a mustra cu e mucha J. mes a declara na diferente persona cu no tabatin penetracion. Na opinion di mr. Mohamed, esey ta haci cu no por prueba penetracion y mester condena W. pa solamente actonan inmoral. E abogado ta haya cu e exigencia di Fiscal ta dobble castigo pasobra no tabatin penetracion.
El a mustra cu e sospechoso W. mes ta bisa cu ta 2 pa 4 biaha el a mishi cu e mucha J. E abogado ta haya cu e exigencia di Fiscal ta demasiado halto.
Hues a bisa cu e lo bay studia e caso y 4 Juli 2025 pa 8.15 am lo tin sentencia.
