Hof a baha pisa riba e dos acusadonan
- Acusadonan sorprendi cu enbes cu castigo baha el a subi
- Caso ta abuso di mucha muhe di 15 aña
ORANJESTAD (AAN): Hof di Corte Superior a baha pisa riba dos acusado di abuso di mucha, kendenan a apela nan condena. Ta trata aki di e hombernan M. y R. Ambos a haya e shock di nan bida ora nan a scucha Hof bisa cu nan ta subi e castigo cu nan a apela.
Subi castigo pa violador di mucha muhe: Diaranson merdia via video conference, e tres miembronan di Hof di Corte Superior a dicta sentencia den e caso di M. y R. E tres miembronan di Hof tabata den sala di Corte na Curacao, mientras cu den sala di Corte na Aruba, tabata e acusadonan y tambe por a mira e victimanan.
Hof a cuminsa cu e caso di M., kende dia 7 Juni 2024 a wordo condena na 5 aña di prison pa a abusa di un mucha muher (di 15 aña) entre Februari 2023 y October 2023. M. a apela e sentencia y durante tratamento di e caso den Corte Superior, abogado a presenta na Hof carta di psicologo cu ta mustra cu M. ta sufri di problema mental y cu M. pa un parti no ta responsabel pa su actonan.
A apelacion di M. tabata contra e acusacion viola. Hof a bisa cu e ta comparti sentencia di Corte Den Promer Instancia, esta cu M. a forza e mucha, kende e tempo ey tabatin 15 aña, tin relacion sexual. Hof ta haya cu M. a viola e mucha y haci actonan inmoral cu ne.
Hof a mustra cu durante tratamento di e caso den Corte Superior, M. a admiti di tabatin relacion sexual cu e mucha pero a base boluntario.
Hof a bisa cu e no ta kere esaki pasobra no tin prueba cu e relacion sexual tabata voluntario. Hof a bisa cu e ta kere declaracion di e mucha y cu tin pruebanan di sosten. E mucha tabata keda den weekend cerca M. pa mira pa su muchanan. Tin mensahenan di WhatsApp caminda ta mira tur e combersacionnan cu M. tabatin cu e mucha. Hof ta haya cu M. a abusa di su posesion.
Pa cu e castigo, Hof a bisa cu a tene cuenta cu seriedad di e caso. Pa mas o menos 8 luna largo, M. tabata abusa di e mucha. Hof ta haya cu M. no a tene cuenta cu e ta afecta e mucha su desaroyo.
Hof a bisa cu e ta tene cuenta cu raport di psicologo, cu ta mustra cu M. tin problema mental y pa un parti no ta responsabel pa su actonan. Psicologo ta haya cu M. mester di tratamento.
Sinembargo Hof ta haya cu M. lo por haya tratamento despues cu e sinta su castigo. Hof a bisa cu e ta haya cu e castigo no ta suficiente y a aumenta esaki di 5 pa 6 aña.
Hof a condena M. na 6 aña di prison.
Subi castigo pa abusador di dos mucha homber: Despues Hof a sigui cu e homber R., kende a apela su condena di 21 Maart 2024, caminda el a wordo condena na 6 aña di prison pa a abusa di dos mucha homber menor di edad. Tambe cu R. mester paga daño di 17 Mil Florin. R. tabata coach di un team di baseball y a abusa di e muchanan, kendenan ta famia di e defunto señora di R. E abusonan ta encera: mishimento, actonan inmoral y penetracion di e muchanan di parti patras. E casonan lamentabel aki mester a sosode entre 2014 y 2016, caminda un di e muchanan tabatin 8 aña y e otro 12 aña.
Hof ta haya legalmente proba cu R. a abusa di e dos hombernan. Hof ta haya cu mester subi e castigo y cu R. mester paga mas placa di daño. Hof a bisa cu e ta comparti hopi punto di Hues di Corte den Promer Instancia. Hof a bisa cu e ta confia declaracion di e dos hombernan. Nan a conta otronan tambe kico a pasa cu nan. Tambe nan tin declaracion haci na Hues Comisario. Hof a mustra cu como coach di baseball, R. a abusa di e dos muchanan cu tabata train cun’e.
Hof a rechaza e ponencia di abogado cu tur e cuestion di abuso, ta un plan pa saca R. for di e cas.
Pa cu e castigo, Hof a mustra cu R. como coach a abusa di su posecion y a abusa di e muchanan cu tabatin confianza den dje. Hof ta haya cu R. a tacha seriamente e integridad di e muchanan.
Hof a mustra cu segun orientacion di casonan di abuso cu Corte Superior ta atende, pa un violacion so ta 3 aña di prison. Pero aki ta trata di dos mucha!
Hof a cuestiona e hecho cu R. no ta tuma responsabilidad di loke el a haci y ta purba sconde cu ta e hombernan ta inventa cos contra dje. Hof ta tuma R. na malo pa esaki! Hof a subi e castigo di 6 pa 8 aña.
Hof a condena R. na 8 aña di prison. Tambe Hof a aumenta e daño material di 17 Mil pa 20 Mil Florin. Hof a mustra cu e dos hombernan mester sigui tratamento psicologico pa loke R. a haci cu nan.
