ORANJESTAD (AAN): Ministerio Publico a confirma cu Diaranzon autoridadnan a detene Franklin Abath, kende ta ex-director di Departamento di Infrastructura y Planificacion (DIP),
relaciona cu Caso Avestruz. Basa riba su capacidad como director di DIP, Abath por tabatin un rol hopi grandi den ortogamento di terenonan.
DIARIO tambe a haya confirmacion cu otro persona involucra den e caso, Ninosca Nuñez a wordo laga liber.
Algun siman pasa, Ministerio Publico a indica cu nan no ta descarta e posibilidad cu mas detencion lo tuma lugar den Caso Avestruz. Por lo menos 6 sospechoso a wordo deteni, incluyendo Leoncita Arends.
Manera ta conoci, investigacion Avestruz ta relaciona cu posible delitonan di corupcion y otro hechonan castigable durante Gobierno di Mike Eman, particularmente riba e pregunta si un of mas compania a wordo otorga incorectamente (un opcion riba) derecho di erfpacht riba terenonan di pais Aruba den e añanan 2009 te 2017.
