ORANJESTAD (AAN): Hof di Corte Superior no a bay di acuerdo cu e exigencia di Procurador General (PG) pa subi e castigo pa e homber M.S.
Ta asina cu tanto M.S. como Procurador General a apela e sentencia di 26 Juni 2020, caminda Hues a condena M.S. na 6 aña di prison. Ta asina cu Fiscal a exigi 10 aña.
Den Corte Superior, Procurador General (PG) a mustra cu e acusacionnan contra M.S. ta:
- Riba 30 Mei 2019 hunto cu su yiu homber q.e.p.d. Marlon, a viola e dama F., cu ta e amiga di Marlon;
- Na Februari 2019 hunto cu su dos yiunan homber, M.S. a viola su partner cu tabata bou influencia y inconciente drumi riba cama.
- Dia 11 November 2018, el a haci acto inmoral cu su yiu muher bao di 18 aña; Diferente biaha entre October 2018 y December 2018 a saca potret di su yiu muher su partinan intimo.
PG a bisa Hof cu e motibo cu a apela e sentencia ta pasobra, PG no ta haya cu e castigo duna ta suficiente. PG a bisa cu M.S. ta culpable di tur e acusacionnan y e ta exigi 8 aña di prison.
CASO TA UN DRAMA
Recientemente via video conference, Hof di Corte Superior a dicta sentencia.
Hof ta mustra cu e caso ta un drama. Den un periodo di mas o menos 8 luna, M.S. a haci su mes culpable di un serie di casonan di inmoralidad hopi serio.
- M.S. a viola e amiga di su yiu homber. E violacion a sosode ora cu e yiu homber tabata cu e amiga den su apartamento. Hof ta haya cu M.S. a abusa di e situacion y obliga e victima di tin relacion sexual cun’e.
- Ademas M.S., hunto cu su yiu homber a tene relacion sexual cu e señora di M.S. E momento ey e señora tabata hopi burachi y tabata drumi inconciente riba cama.
- M.S. a haci actonan inmoral cu su propio yiu muher y a saca potretnan pornografico di su yiu muher pa satisfase su mes.
MOTIBO CU TA BAHA CASTIGO
Hof den su sentencia ta mustra cu e victimanan lo por keda afecta pa resto di nan bida. Pa cu e castigo Hof a tene cuenta cu e raport di psychiater cu ta haya cu M.S. tin problema pa pensa normal y pesey ta haya cu M.S. ta menos responsabel pa su actonan.
Hof a mustra cu un psicologo ta haya cu M.S. ta responsabel pa su actonan y ta conseha pa pone M.S. bou guia di Reclasering. Un otro psicologo ta di e mesun opinion cu su colega.
Hof ta haya cu teniendo cuenta cu e raportnan menciona, mester pone M.S. menos responsabel pa e delitonan. Esey ta encera cu mester baha e castigo. Hof a mustra cu ta sigui e orientacion pa cu castigonan di violacion di ta 3 aña di prison.
Hof a mustra cu e no ta sigui PG su punto di bista cu no por considera e matamento di e yiu homber di M.S., door di tata di e victima cu M.S. a viola, como reduccion di castigo. Hof si ta considera esaki. Hof a sigui e conseho di e psicologonan pa pone M.S. bou guia di Reclasering pa evita pa algo asina lo por bolbe ripiti.
CASTIGO
Hof su conclusion ta, cu ta condena M.S. na 48 luna (4 aña) di prison, di cual 8 luna ta condicional cu un tempo di prueba di 3 aña. Esey ta nifica cu M.S. lo mester sinta den KIA, 3 aña y 4 luna. Ademas Hof a condena M.S. pa paga 5 mil florin di daño na mama di e victima. Hof a stipula e medida di pago cu ta encera cu si M.S. no paga, e lo mester bay 60 dia di prison sera.
