E abogado a pidi pa laga e sospechoso liber pasobra e pareha ta bon cu otro
ORANJESTAD (AAN): E peticion cu abogado mr. Tromp a presenta Diabierna mainta den sala di Corte, a trece un vuelta di 180 grado den un caso di violacion.
E abogado a pidi Hues pa su cliente, e homber P., worde laga liber pasobra no tabatin violacion. El a bisa cu loke a sosode riba dia di e incidente, ta cuestion di jaloersi y no violacion. El a bisa cu e pareha ta bon-bon cu otro y cu nan tin tres yiu.
Esaki a pone cu Hues awor kier scucha e dama O. den Corte ora di tratamento di e caso pa haya claridad kico ta kico.
HOMBER A VIOLA SU PAREHA:
Diabierna mainta via video conference a cuminsa trata e caso penal cu Ministerio Publico a cuminsa contra e homber P.
Den un oficina den KIA, e sospechoso P. tabata mientras cu den sala di Corte tabata Hues, Fiscal y abogado mr. Tromp di e sospechoso. Mayornan di P. tambe tabata presente.
Fiscal ta acusa P. cu riba 14 April 2021, a viola su pareha, e dama O. Tambe Fiscal ta acusa P., cu riba e mesun 14 April 2021, el a maltrata e dama O., door di tene cu forza, ranca su cabey y dal’e diferente biaha cu mokete na su cabez y pianan.
Ta asina cu e caso tabata pro forma o sea cu no a trata e caso sino cu lo stipula un fecha pa tratamento. Fiscal a propone 21 October 2021. Hues a bisa cu el a repasa henter e caso y a dicidi cu e mes lo trat’e riba 29 October 2021, 10.15 di mainta.
E PAREHA TA BON CU OTRO:
Abogado mr. Tromp a pidi Hues pa laga P. liber pendiente di e caso. El a bisa cu no tin motibo di peso pa sigui detene P. E abogado a mustra cu e pareha tin basta aña cu otro y tin yiunan. El a splica cu loke a sosode 14 April 2021 ta cu tabatin palabracion pa topa cu e dama O. na oficina di Notario. P. a busca O. y nan a bay hunto den auto. Door di jaloersi di parti P., O. a bay di acuerdo pa tin relacion sexual den auto. P. tabata jaloers cu O. lo tin un otro y a dal O. algun biaha pero no tabatin violacion.
E abogado hasta a mustra Hues cu e pareha tabatin relacion via cellular, mientras cu P. ta sera den KIA. P. mester a sufri e consecuencianan pa tabatin cellular ilegal den KIA. E abogado ta haya cu e pareha nan relacion ta bon-bon y cu no tin motibo pa P. keda sera.
Fiscal a reacciona cu e ta contra pa laga P. liber. Fiscal a bisa cu tin biaha tin caso cu den pareha tin violacion. E ta haya cu tin motibo di peso.
HUES KIER SCUCHA PAREHA:
Hues a bisa cu Hof a rechaza e peticion caba. Hues a bisa cu tin indicacion cu P. a haci violacion. Na opinion di Hues, ta durante tratamento di e caso lo mira si tin suficiente prueba pa haya cu P. ta culpable of no.
Hues ta haya cu tin motibo di peso. El a bisa cu esaki ta un caso serio y pueblo lo no compronde cu ta laga P. liber promer cu e caso.
Mirando loke abogado a bisa, Hues a bisa cu e kier scucha e dama O. durante tratamento di e caso. Hues kier claridad, si tabatin violacion of no.
E decision di Hues ta cu P. ta keda sera den KIA te dia 29 di October 2021 ora cu ta trata e caso y lo scucha e dama O. como testigo.
