Ta wardando riba raport di psychiater
ORANJESTAD (AAN) – E homber P.B. (22), via video conference a presenta dilanti Hues pa e caso penal cu Ministerio Publico a cuminsa contra dje. Ta asina cu e caso a bin dilanti pro forma o sea e no a wordo trata completo. Ainda falta e raport di psychiater y Hues a dicidi di pospone e caso pa October 2021.
ASESINATO
Den sala di Corte tabata presente Hues, Fiscal y abogado di P.B., mientras cu P.B. mes tabata den un oficina den KIA. E acusacion cu Fiscal a presenta den sala di Corte contra P.B. ta cu riba 2 April 2021, intencional el a tira mata L. van den Berg.
Tambe Fiscal a acusa P.B. cu riba e mesun dia 2 April 2021, e tabatin un arma di candela cu ne.
CASO POSPONI
Hues a informa P.B. cu e caso ta pro forma caminda no ta bay trata e caso sino lo bay pone un dia caminda lo trata esaki.
Fiscal a bisa cu ainda falta raport di psychiater. E procesverbaal di Polis si ta cla. Fiscal a propone 22 October 2021 pa tratamento di e caso.
Hues a bisa cu e ta prefera di trata e caso e mes, ya cu el a repasa henter e caso caba. El a bisa cu e ta pospone e caso pa dia 29 October 2021 pa 8.30 mainta. Hues a bisa cu e ta spera cu pa e dia ey e raport di psychiater lo ta cla.
