Despues cu abogado a pidi pa scucha un testigo
ORANJESTAD (AAN): Siman pasa Diahuebs mainta, Hues tabata critico riba e investigacion di Polis den un caso di violacion contra e homber di inicial M. di 37 aña di edad.
Hues ta haya cu Polis ta menciona cierto combersacionnan pero no a bay interoga e personanan concerni pa asina tin mas claridad den e caso. Hues a pospone e caso y a instrui Fiscal pa laga Polis haci mas investigacion.
Abogado a pidi pa testigo: Ta asina cu despues cu Fiscal a presenta e acusacion contra e homber M., abogado mr. Ras a haci peticion pa scucha un testigo. E acusacion contra M. ta cu riba 21 Juli 2024, el a viola e dama Z.
Abogado mr. Ras a pidi Hues pa scucha e homber L. como testigo. E abogado a bisa Hues cu L. ta un amigo di M. y L. tabata hunto cu M. rato promer cu M. a bay den auto cu e dama Z.
Fiscal a nenga pa testigo! Fiscal a reacciona na Hues cu e ta haya cu e testigo no ta relevante, pasobra e no tabata presente ora cu e violacion a tuma lugar.
Investigacion incompleto: Hues, promer cu e tuma un decision, a bisa cu el a studia e caso y ta haya cu e ta un caso serio. Hues ta haya cu e investigacion no ta completo.
El a mustra cu Polis ta bisa cu tin un homber H. cu ta bisiña di e victima, e dama Z., a bisa cu Z. a mand’e mensahe kico a sosode cun’e. Hues a remarca cu Polis no a bay interoga H. riba esaki.
Hues a mustra tambe cu M. a bisa den Corte cu ora el a tende cu e dama Z. a haci denuncia di violacion contra dje, el a yama Z. Hues ta haya cu e investigacion no ta completo.
Pospone caso pa mas investigacion: Hues a instrui Fiscal pa laga Polis scucha e homber H. riba kico e dama Z. a papia cun’e riba WhatsApp. Tambe Hues ta haya importante pa sa kico M. a papia cu e dama Z.
Hues a sigui bisa cu lo ta bon pa Polis papia cu e homber L. Hues a bisa cu e kier relato di Polis riba tur esakinan.
Hues a pospone e caso y a bisa cu ora e relatonan ta cla, lo fiha un fecha pa tratamento di e caso. Aki ta mira bon cla con Hues ta instrui Polis pa haci investigacion completo, pa asina Hues tin un bista cla riba e caso y por huzga un sospechoso corecto.
