Nan a bin Aruba special pa haci esaki
ORANJESTAD (AAN): E hombernan di Bulgaria di inicial G.K.D. di 41 aña, y T.P.D. di 35 aña riba Diabierna a worde condena na castigo di prison pa a purba horta diferente ATM Machine door di instala aparato skim den esakinan. Hues a haya e castigo di 8 luna exigi pa Fiscal mucho abao y a subi esaki na 10 luna di prison pa cada un.
Fiscal a acusa G.K.D. y T.P.D. di riba 26 Juli 2025 a hinca aparatonan di skim den diferente ATM Machine di RBC Bank. Ta asina cu el a keda “un intento”, pasobra e ATM Machine moderno ta detecta cualkier malintencion na e aparatonan, y di biaha ta manda alerta via smartphone di empleadonan atento di e banco, cu a mobilisa mesora na ATM Machine y a haya e skimmernan aki poni.
Traductor for di Hulanda: Via video conference, Corte di Husticia a haci uso di un traductor na Amsterdam (Hulanda) kende ta papia Bulgaro. Di e forma aki por a trata e caso ya cu e dos Bulgaronan no por papia otro idioma bon.
Purba skim ATM Machines: Hues a cuminsa cu G.K.D. Segun G.K.D. el a bin cu e storia di “a worde deteni y no sa pakico”. Hues a mustra cu dos empleado di RBC Bank kendenan a bisa cu riba nan smartphone a ricibi alerta cu tin problema cu e machinenan. A constata problema na e ATM Machine den Avenida Nelson Oduber y nan a bay check. Nan a mira cu a instala aparatonan skim den e machinenan. Nan a actua normal, sali bek pafo y a dicidi di keda vigila di leu y a mira cu un auto di huur cu dos homber a yega y a bay. Nan a sigui su tras y mira cu nan a bay na un otro ATM Machine na Oranjestad. Nan mira e dos hombernan tabata konkel riba e ATM Machines.
Nan a yama Polis y keda sigui tras di auto. Na dado momento Polis a para nan y detene nan. Hues a bisa cu tin potretnan di aparatonan di seguridad caminda por mira ora cu G.K.D. y T.P.D. tabata pone aparatonan skim na e ATM Machine.
Security Video di e ATM Machine na Avenida Nelson Oduber por a mira cu un di nan tabata instala y e otro tabata vigila y na e otro ATM Machine nan a cambia o sea esun cu tabata vigila a bay instala y esun cu tabata instala a bay vigila.
G.K.D. a bisa Hues cu ta corecto pero e no tabata sa kico e otro tabata haci. Hues a mustra G.K.D. potret y el a reconoce su mes bisti cu flanel berde para na e ATM Machine. Hues a mustra cu na otro ATM Machine tabata turno di e otro. Segun G.K.D. e promer biaha el a hinca su Debit Card pa lanta placa pero e ATM Machine no tabata traha. Hues a bisa cu den auto cu nan tabata, Polis a haya mas cu 3 mil Dollar. Segun G.K.D. tur e placa tabata di T.P.D. y e tabatin solamente 100 Dollar den su cartera. Hues a puntra pakico a bay otro ATM Machine. Segun G.K.D., esey ta normal pasobra el a bay pa saca placa y no tabata sa kico T.P.D. tabata haci.
Hues a remarca cu ta G.K.D. tabata traha na e ATM machine y T.P.D. tabata vigila. Segun G.K.D. ta T.P.D. a bise cu e ATM Machine no tin placa y pa nan bay na un otro. Hues a remarca cu e ta haya e declaracion di G.K.D. dudoso.
Hues a mustra cu den apartamento di hospedahe di T.P.D. a haya aparatonan di skimming. El a admiti na Polis cu el a bin Aruba pa haci esey. El a bisa cu e tabata saca informacion di clientenan cu uza e ATM Machine pa saca placa di nan. T.P.D. a bisa cu el a cumpra aparatonan di skimming for di internet y e mester a busca mas informacion y aparato pa sa con pa saca placa for di e cuentanan cu el a copia. Hues a puntra ki intencion T.P.D. tabatin.
T.P.D. a bisa cu e intencion tabata pa amiganan bin Aruba pero esey no a logra. Hues a puntra pakico a bin Aruba. El a bisa cu segun informacion cu el a haya, e mester bay special Aruba na RBC pasobra e ATM Machine di e banco no tabata upgraded pa ultimo version. El a bisa Hues cu nunca mas e lo bay haci algo asina.
Fiscal a bisa cu segun empleadonan di RBC, riba camera por a mira cu tanto G.K.D. como T.P.D. a instala aparatonan di skimming den e ATM Machinenan. Fiscal a remarca cu esey no ta cuadra cu loke G.K.D. a bisa cu el a bay saca placa cu su carchi. A constata cu a bora un buraco chikito den un ATM Machine. Hues a remarca cu G.K.D. no a declara na Polis cu el a purba uza su carchi pa saca placa. Segun G.K.D. ta berdad pasobra e ta papia masha poco Ingles y no por a splica bon na Polis.
Hues a bisa cu ambos tin 133 dia sera den KIA pa e caso aki.
Fiscal a exigi 8 luna di Prison: Fiscal ta haya legalmente proba cu nan a purba skim e ATM Machinenan di RBC. Na opinion di Fiscal, for di pruebanan ta mustra claramente cu G.K.D. y T.P.D. a purba saca placa for di e ATM Mahcinenan. A uza aparatonan di skimming pa logra esaki. Fiscal a bisa cu tur hende mester por confia cu e ta uza ATM Machine den forma sigur. Fiscal a tuma e dos acusadonan na malo cu a scoge Aruba pa bin usa aparatonan di skimming cu ta perhudica turismo pa Aruba. Pa cu e castigo, Fiscal a bisa cu e ta tene cuenta cu ta promer biaha cu G.K.D. y T.P.D. ta cay sera y cu a purba pero no a logra.
Fiscal a exigi pa ambos 8 luna di prison. Pa loke ta e placanan confisca, Fiscal a bisa cu no tin indicacion cu esakinan ta procedente di algo criminal y pesey mester debolbe nan. Tur e aparatonan di T.P.D. cu a uza pa skimmimg lo keda confisca.
Abogado: mr. Hernandez a bisa Hues cu T.P.D. a admiti tur cos y ta laga na decision di Hues. E abogado a pidi Hues pa tene cuenta cu T.P.D. tin casi 5 luna for di su pais Bulgaria. E abogado a bisa cu door cu no tin ningun daño haci, el a pidi pa duna castigo igual na loke T.P.D. a sinta caba. Pa loke ta G.K.D., mr. Hernandez a bisa cu e no ta haya cu por prueba cu G.K.D. ta complice den e caso aki. No tin suficiente prueba cu ta mustra cu G.K.D. ta complice.
E abogado a remarca cu un di e empleadonan ta bisa cu lo a bora un ATM Machine. Esaki lo a mira via Security Video. E abogado a remarca cu no tin ningun video den e documentonan di e caso y ta solamente un declaracion so. E abogado ta haya cu G.K.D. a bay purba saca placa cu su carchi y un empleado di banco ta considera cu nan dos lo tabata pone aparatonan skim den e ATM Machinenan. E abogado a sigui bisa cu e unico cos cu tin, ta potret di nan dos para na ATM Machine pero esey no ta bisa nada. Ademas no a haya G.K.D. cu nada cu ta duna indicacion cu e lo ta envolvi den e ponemento di e aparatonan pa skimming. E abogado no ta haya cu tin intencion di G.K.D. di haci un delito. G.K.D. no a admiti na Polis sino a bisa cu e tambe tabata sospecha algo malo. E abogado a bisa cu T.P.D. tambe a bisa cu G.K.D. no tabata sa kico e tabata haci y no tin nada di haci cu e caso aki. E abogado a conclui cu mester declara G.K.D. liber di e acusacion. El a pidi Hues si tog ta haya G.K.D. ta culpable, duna castigo igual na e tempo cu e ta sera caba.
Sentencia: Hues a sera tratamento di e caso y a pospone e caso un rato pa evalua. Ora el a bolbe, el a dicta sentencia di biaha.
Hues a bisa cu ta legalmente proba cu T.P.D. a pone e aparatonan di skimming. El a bisa cu T.P.D. a admiti. Pa loke ta G.K.D., Hues ta haya cu aki tambe ta proba. El a mustra cu dos empleado di banco a bay na e ATM Machine pasobra tin señal di error. Nan a mira cu na un ATM Machine tin un buraco. E otro aparato tin un aparato di skimming aden. Nan a mira cu ta G.K.D. y T.P.D. tabata na e vestibulonan di ATM Machine. Un di e empleadonan a mira cu ta un di e hombernan a bora na un ATM Machine. Hues a sigui bisa cu tambe tin potretnan caminda ta mira G.K.P. y T.P.D. Hues ta conclui cu G.K.D. tambe a participa den e skim di e ATM Machine. Despues nan a bay na e otro ATM Machine na Oranjestad.
Eynan tambe por mira nan para y Hues ta kere cu ta e mesun procedimento a sosode. Eynan tambe a haya un aparato di skim. Hues a bisa cu e no ta kere e storia di G.K.P. cu el a bay pin pa saca placa. Hues a bisa cu skimmimg ta un acto criminal serio pero a keda na purba so y no a crea daño na clientenan y banco. Hues ta haya cu esaki a worde planea y a worde haci intencionalmente. El a bisa cu e dos acusadonan a bin special Aruba pasobra a haya informacion cu e aparatonan di RBC Bank di Aruba no ta upgraded. Hues ta haya e exigencia di Fiscal mucho abao mirando e seriedad di e caso.
El a bisa cu el a tene cuenta cu sentencianan den casonan similar. Hues a condena G.K.P. y T.P.D. na 10 luna di prison kitando e tempo cu nan ta sera. Hues a bisa cu e placanan confisca lo worde debolbi pasobra no tin indicacion cu nan ta bin for di criminalidad. E aparatonan entre otro laptop lo keda confisca. E aparatonan di skimmimng lo worde destrui.
