Mientras cu Fiscal a exigi 7 aña di prison
ORANJESTAD (AAN): E hombernan J.H.(21), C.M. (24) y U.F.(24) a presenta dilanti Hues den Corte di Husticia pa duna cuenta pa e delitonan serio cu nan a haci. Fiscal a acusa nan di importacion di droga (marihuana y cocaina) y un revolver cu balanan riba 12 Juni 2022.
IMPORTACION DROGA
Hues a puntra U.F. si ta berdad cu nan a importa droga y un revolver cu balanan. U.F. a admiti. Hues a remarca cu anterior U.F. a desmenti tur cos. U.F. a bisa Hues cu awor e ta bisa e berdad.
60 KILO DI DROGA Y ARMA CONFISCA
Hues a mustra cu Guarda Costa via radar a mira e boto yega na awa territorial di Venezuela y un boto for di Venezuela a yega eynan. Nan a para banda di otro despues e boto a bay bek Venezuela y e otro boto a bin Aruba. Guarda Costa a intercepta e boto y a bin haya barinan di plastic carga cu droga. En total a confisca 40 kilo di cocaina y 20 kilo di marihuana. Tambe a haye den un di e barinan un revolver y balanan.
20 KILO DI MARIHUANA
Hues a puntra U.F. pakico el a haci’e. Segun U.F. su yiu muher tin problema di salud y mester a bay Colombia pa su tratamento. El a bisa Hues cu e mester a fia placa y ta debe hopi placa y tabata atrasa den pago. El a dicidi di haci esaki. Segun U.F. e ta usa marihuana y ta traha medicina. Hues a bisa cu ta 20 kilo di marihuana a confisca y cu esaki ta hopi. Segun U.F. e marihuana ta pa propio uso hunto cu C.M. y J.H. y e ta traha remedi di marihuana.
40 KILO DI COCAINA
El a sigui bisa cu e cocaina ta loke nan kier a busca pa bende pa yega na placa pa asina su yiu por bay Colombia pa sigui tratamento. El a desmenti di tabata sa di e revolver cu balanan. El a bisa cu e arma tabata scondi den un bari di gasoline hunto cu e droganan y e no por a mira esey. Hues a bisa cu ta 40 kilo di cocaina. Pa e 40 kilo di cocaina lo mester paga 120 mil dollar. Segun U.F. den su desesperacion pa cu situacion financiero y su yiu, el a cay den e asunto aki. El a bisa cu nan a acerk'e pa haci esaki, mirando cu e ta pisca. U.F. a bisa cu e tabatin contacto cu Venezolano y nan a palabra pa bende e droga y despues paga na dollars. U.F. a bisa cu nan a menace cu si e no paga den un periodo di 6 luna, nan sa kendenan ta su famia. Segun e palabracion, di e mesun forma lo mester hiba e placa pa nan riba laman.
Hues a sigui haci pregunta riba e revolver cu balanan y U.F. a para riba cu e no tabatin ningun palabracion riba arma di candela. Segun U.F., awor e tin hopi mas problema di loke e tabatin.
COS A BAY ROBEZ
Hues a puntra C.M. si ta berdad y el a bisa cu ta berdad cu nan a bay busca droga. El a bisa cu nan kier a purba un cos y mira con e lo resulta. Pero e cos a bay robez. El a bisa Hues cu si no a logra bende e droga, lo mester debolbe e cocaina. Hues a puntra si no a pensa con lo bay bende e lote aki. Segun C.M. a pensa cu ora haya e droga lo mira con lo bay haci. El a bisa cu e intension lo tabata cu e marihuana ta pa propio uso y traha remedi pa bende. C.M. tambe a bisa cu nan no tabata sa di e arma di candela. El a bisa cu ora Guarda Costa a intercepta, nan a keda sorprendi cu a haya un arma di candela.
HUEZ NO TA KERE
J.H. a admiti di cu a importa e droganan y e intension tabata manera e otro dos a bisa. Hues a bisa cu e ta haya e declaracionnan aki straño.
Ta asina cu e droganan tabata scondi den barinan di plastic. Segun Fiscal, U.F. lo a bisa e miembro di Guarda Costa pa duna un chens pa lag’e pasa manera nada a pasa. U.F. promer a bisa Fiscal cu el a busca un chens pasobra nan ta corupto. Despues U.F. a bisa Fiscal, ora e miembro a puntra pa e papelnan di e boto, el a bisa cu e no tin e certificado di por navega e boto y pa dun’e un chens pa e pasa.
MENOR DI EDAD CONDENA PA ARMA
Hues a mustra cu J.H. a haya condena tempo e tabata menor di edad pa posecion di arma di candela. J.H. a desmenti pero Hues a mustra cu e condena tabata na 2017.
EXIGENCIA FISCAL
Fiscal a bisa Hues cu e ta haya legalmente proba cu e trio aki a importa marihuana y cocaina y un arma di candela cu balanan. Fiscal a mustra cu for di un analisis recien cu autoridadnan a haci ta mustra cu islanan den Caribe ta wordo usa como trampoline pa exportacion di droga. Den e caso aki, mirando 40 kilo di cocaina y 20 kilo marihuana, e droga aki lo ta destina pa exportacion pa exterior. Fiscal a bisa cu tin imagen di radar caminda ta mira tur movecion riba laman loke e boto a haci. Tur tres ta desmenti di sa di e arma di candela y bala pero Fiscal ta haya cu nan tabata sa of a tuma e riesgo cu lo tin arma di candela.
CASTIGO
Pa cu e castigo, Fiscal a bisa cu droga ta pone salud di hende na peliger y ta crea criminalidad. Arma di candela ta un menaza pa comunidad. El a mustra cu diaranzon un persona a wordo asesina cu arma di candela. El a exigi pa U.F., C.M. y J.H. 7 aña di prison y confisca e boto.
ABOGADONAN A CUESTIONA E CASTIGO
Mr. Maldonado di U.F. a bisa cu tur a admiti di a importa e droga. U.F. a splica cu pa motibo di malesa di su yiu y situacion financiero a haci esaki. El a remarca cu e ta haya e castigo mucho halto. El a mustra cu e siman aki Hof a condena un persona na 6 aña di prison pa importacion di 110 kilo di cocaina y Fiscal ta exigi 7 aña pa 60 kilo.
Mr. Kock di C.M. a bisa cu ta promer biaha cu C.M. a haci esaki. Tabatin 25 paki di droga den tres bari. Nan no tabata sa cu tin un arma den un di e barinan. E ta haya cu mester declara C.M. liber pa posecion di arma. Mr. Kock tambe a cuestiona cu e exigencia di Fiscal ta mucho halto.
Mr. Paesch di J.H. tambe a uni na e abogadonan y a mustra riba e decision di Hof pa 110 kilo di cocaina.
SENTENCIA
Hues a sera tratamento di e caso y a pospone e caso un rato pa pensa y despues a dicta sentencia di biaha. Hues ta haya legalmente proba e importacion di droga y arma di candela.
Hues a bisa cu e no ta kere declaracion di e trio cu nan no sa di e arma. El a sigui bisa cu tampoco e ta kere cu e marihuana ta pa propio uso y traha remedi. Ta un cantidad grandi di droga. Droga ta pone salud di hende na peliger y ta crea hopi criminalidad. Arma di candela ta forma un menaza pa comunidad. Arma di candela ta un problema serio aki na Aruba. Pesey ta baha pisa riba droga y arma di candela. Hues a condena U.F., C.M. y J.H. na 4 aña y 6 luna di prison. E boto lo keda confisca. Den sala di Corte tabata presente e doñonan di e boto. Abogado mr. Maldonado a bisa Hues di esaki pero Hues a mustra cu ya el a tuma un decision.
