ORANJESTAD (AAN): Corte di Husticia recien a dicta sentencia den e caso penal cu Ministerio Publico a cuminsa contra e mama S.S. di 65 aña, e yiu muher S.S.A. di 30 aña y e yiu homber S.J.A. di 31 aña. E trio aki a worde haya culpabel pa bendemento di droga pa basta tempo. Fiscal a baha pisa riba e trio y Hues via video conference a confirma e exigencianan di Fiscal.
Fiscal a baha pisa: Tratamento di e caso aki a sosode na luna di November 2022, caminda Fiscal a bisa cu e ta
haya legalmente proba cu e trio aki tabata bende droga.
El a cuminsa cu S.S.A., caminda el a bisa cu dia 16 Maart 2019, e sospechoso S.S.A. lo a destrui windshield patras di auto di un persona. Tambe 1 Mei 2019, e mesun muher S.S.A. a maltrata un dama door di dal’e cu mokete y ranca su cabey.
Exigi 6 aña di prison pa yiu muher: Fiscal a bisa cu e ta haya legalmente proba e bendemento di cocaina, marihuana, ecstasy (XTC). Tambe cu a haya un arma di candela den lachi di cashi cerca e muher S.S.A.
Fiscal a mustra cu S.S.A. mes a bisa cu e tin un arma pa defensa propio door cu el a worde atraca na December 2020. Fiscal a sigui bisa cu Polis a haya na e apartamento di S.S.A. na Rooi Koochi, total di 13.4 gram di cocaina, 18.7 gram di marihuana, 2 pildora di XTC y na e cas na Sero Alejandro a haya 131 gram di cocaina, 980 gram di marihuana.
Pa loke ta e periodo di bende, Fiscal a bisa cu S.S.A. ta insisti cu ta durante 1 aña y 6 luna, tempo di Covid, e tabata bende. Fiscal a bisa cu e mesun mama S.S. a bisa na Polis cu su yiu S.S.A. tin 6 aña ta bende. E ruman muher di S.S.A. a declara cu S.S.A. tin 8 aña ta bende. Diferente comprador di droga a bisa cu entre 3 y 10 aña a cumpra for di S.S.A. Fiscal a mustra cu S.S.A. mes a bisa Polis cu e tin 7 pa 8 aña ta bende. Tres aña na Rooi Koochi y promer cu esey na su mama S.S. na Sero Alejandro. Pa cu e periodo Fiscal a conclui cu e ta 6 aña. El a exigi 6 aña di prison y placanan haya lo keda confisca.
Exigi 10 aña di prison pa e mama: Fiscal a sigui bisa cu e mama S.S. tambe ta worde acusa di bende droga. Na e cas na Sero Alejandro a haya 131 gram di cocaina y 980 gram di marihuana. S.S. a declara cu e tin 20 aña ta bende pero no constant. El a bisa cu ultimo tempo e no ta bende mas sino su yiunan S.S.A. y S.J.A. El a bisa cu e yiu homber S.J.A., tin 3 aña ta bende.
Fiscal a bisa cu tin diferente testigo a bisa cu a cumpra 10, 12, 15 aña for di e mama S.S. kende ta worde yama Chichimona. Fiscal a conclui cu S.S. tabata bende pa 10 aña. Fiscal a bisa cu bendemento di droga ta causa hopi tristeza den famianan. El a exigi 10 aña di prison.
Exigi 3 aña di prison pa yiu homber: Fiscal a bisa cu e yiu homber S.J.A. tabata den exterior ora Polis a haci investigacion. E tambe ta worde acusa di bendemento di droga. Fiscal a mustra riba declaracion di e mama S.S., kende a bisa cu su yiu homber S.J.A. ta bende pa 3 aña. Tambe cu e ruman muher S.S.A. a bisa cu el a haya sa 2 aña pasa, cu su ruman homber S.J.A. ta bende.
Ademas tin testigonan ta bisa cu entre 2, 3, 8, 10, 12 y 15 aña a cumpra for di S.J.A. Fiscal a conclui cu e periodo di bendemento ta 3 aña. El a exigi 3 aña di prison pa S.J.A. y e mas cu 7 mil Florin cu a haya lo keda confisca.
Sentencia: Via video conference Hues a bisa cu e ta haya legalmente proba e bendemento di droga. Hues a bisa cu na S.S. y S.S.A. a haya droga na cas. S.S.A. tambe ta worde acusa di maltrato di un dama na un pizzeria.
Hues no kere storia di bendemento di droga: Hues a mustra cu S.S.A. a bisa cu apenas desde e pandemia di Covid-19, el a cuminsa bende droga. Hues a bisa cu e no ta kere esaki.
El a mustra cu e mama S.S. a bisa cu S.S.A. ta bendiendo droga pa basta tempo. Tin testigonan cu a declara cu S.S.A. tabata bende pa hopi tempo. A scucha e agentenan di droga cu a bisa cu S.S.A. a firma su declaracion y no ta asina cu S.S.A. no a firma y cu e firma no ta di dje. Hues a bisa cu no tin motibo pa duda den declaracion di e agentenan di droga.
Diez cu 6 y 3 aña di prison pa trio: Hues a bisa cu den razia na Rooi Koochi a haya droga y arma di candela. A haya marihuana, cocaina y XTC. El a sigui bisa cu Fiscal a exigi 6 aña di prison pasobra Fiscal a conclui cu S.S.A. durante 6 aña a bende droga. Abogado a bisa cu S.S.A. tin 4 yiu y ta soltera.
Hues a remarca cu droga ta un hecho serio. E ta pone salud di hende na peliger y ta crea criminalidad. Hues ta haya cu e mama y su dos yiunan a concentra riba nan propio ganashi. Hues a condena S.S.A. igual na exigencia di Fiscal, 6 aña di prison.
Pa e ruman homber S.J.A., Hues a confirma e exigencia di Fiscal, 3 aña di prison. Pa e mama, S.S., Hues a bisa cu na Savaneta, S.S. ta conoci como Chichimona y ta bende pa hopi tempo. Hues a confirma e exigencia di Fiscal, 10 aña di prison.
Yiu muher a reclama: Despues cu e sentencia a wordo duna, e yiu muher S.S.A. a reclama Hues cu e castigo di 10 aña lo mata su mama.
