Hues a pospone parti di e caso pa haya raport adicional di psychiater
ORANJESTAD (AAN): Diabierna mainta Corte di Husticia a trata e lamentable caso di asesinato contra e homber Pascual Brown di 22 aña, kende riba 12 di April 2021 a tira mata su amigo Richi Henao Tavarez.
E difunto Richi riba e Dialuna anochi ey tabata sinta den patio cu su pareha na su cas na Brazil y Pascual a yega den auto, baha scondi y tira Richi den cabez. E pareha L. a tende un sonido y a keda cu lo ta un klapchi. Despues el a bira y mira Richi morto cu un tiro den cabez. Polis a haya yamada pa 9:21 pm cu e tiro a socede, y cu el a wordo transporta pa Hospital. Mas laat pa 11:50 pm, a notifica Polis cu e victima a fayece.
Den sala di Corte tabata presente e pareha L. y familiar.
POSPONE PARTI DI CASO: Abogado mr. Carlo a pidi Hues pa pospone e caso pasobra e kier raport di psychiater. El a bisa cu el a mira e raport di Reclassering caminda psychiater kier papia cu e mama. Esey no a logra pasobra e psychiater a yama number robez. E abogado a bisa cu e mama kier papia cu psychiater. E abogado a mustra cu psychiater ta haya cu Pascual Brown no ta responsabel pa su actonan.
Fiscal a bisa cu el a yama e psychiater pa mira con liher por haya un raport adicional riba e situacion mental di Brown.
El a pidi pa pospone e caso 2 siman. Hues a bisa cu ta pospone e caso solamente pa e parti di raport di psychiater. E ora ey lo papia riba e raport y exigi castigo y defensa. 11 November 2021 pa 10’or di mainta lo bay sigui cu e caso despues di trata e otro partinan. Fiscal a bisa cu e lo bay papia cu e psychiater pero si e no logra e caso lo bin dilanti pro forma.
ASESINATO CRUEL: Huez a bisa cu segun e raport di Polis, riba Dialuna 12 April 2021 anochi a pidi asistencia na un cas na Brazil caminda un hende a sufri tiro den cabez. Polis a yega na e cas y haya Richi sinta den patio pero no ta duna señal di bida. Hues a bisa cu autopsia ta mustra cu door di tiro den cabez, Richi a fayece.
A haya e bala den su cabez. Investigacion a mustra cu e bala ta di un revolver Cal. 38. Bisiña di Richi tin camera di seguridad y Recherche a haya imagennan di camera pa investiga. Nan a mira un Nissan March righthand drive para banda di e cas y por a mira e chofer.
E persona tabatin un pechi y cabey largo y a baha for di auto cu algo parecido na un arma den su man drechi. E tabata cana gebuk den direccion di cas di Richi. Despues e ta core bek gebuk drenta den auto y core bay.
PASA VIDEO DI ASESINATO DEN CORTE: Fiscal a pasa video di Security Camera den Corte riba pantaya grandi caminda por mira con e asesinato a tuma lugar. Hues a puntra Pascual si ta e ta esun den auto. Pascual a bisa Hues cu ta e tabata den e auto. El a splica Hues cu ora el a cay sera den KIA, el a corta su dread logs y awor ta practicamente pelon. Abogado mr. Carlo a remarca cu riba imagennan no ta mira cu Pascual a bolbe na e auto cu arma.
Recherche a bay investiga via Facebook di Richi y mira potret di Pascual como friends. E ta parce esun cu nan a mira riba e camera di seguridad. A detene Pascual.
E pareha di Richi, e dama L. a bisa cu nan tabata sinta den patio di cas. Na dado momento el a tende un sonido duro y a kere cu ta un klapchi. El a bira cara na banda drechi y mira un persona ta canando bay na un auto. El a bira pa wak Richi pa puntr’e si el a mira loke el a mira y a constata cu Richi a wordo tira den cabez.
HOMBER TA TIRA SU AMIGO MATA: Hues a mustra cu Pascual a duna diferente declaracion na Recherche. El a bisa cu di chikito e cu Richi a lanta na Brazil. Na cierto momento e dama L y Richi a drenta relacion. Na dado momento Richi a cuminsa bende droga y usa cocaina. Pascual no ta di acuerdo y el a bisa Richi pa stop.
Segun Pascual, door di e usamento di droga, e relacion Richi y L. no tabata bon. Segun Pascual el a intermedia y papia cu Richi pa drecha su bida. Na cierto momento Pascual a haya menaza di Richi riba facebook. Segun Pascual el a compronde e mensahe cu Richi ta acuse di lo ta papia cosnan secreto di nan relacion y lo bay regla cune. Pascual a bisa na Recherche cu un dia un homber Vato lo a bay na su cas riba scooter y blo keda wak.
El a bisa cu el a bay na lighthouse pa medita cu auto Nissan March di su mama y na dado momento el a sinti algo malo. El a bay pa cas di Richi pa regla e problema y e tabatin un cuchio. Na Pos Chiquito el a mira auto di persona Venezolano cu e conoce y a pidi pa un arma. E persona a facilita e arma pero cu e lo mester paga mil Dollar.
Pascual a tuma e arma y na caminda pa cas di Richi e tabata haya pensamentonan pisa di menaza di Richi, e homber Vato cu a yega na su cas, e dama L. cu tabata conta con Richi tabata haci. El a bay na cas di Richi, para e auto, bay na muraya, mik riba Richi. El a bisa cu el a mira L. y nan tabatin contacto visual. E momento ey el a perde cabez y un tiro a cay. El a laga e arma cay y bay. Segun Pascual, ta culpa di L. cu a bay cont’e con Richi tabata trat’e. E cosnan ey a keda traha riba dje.
PROBLEMA MENTAL: El a bisa cu na caminda pa cas, el a tira tur su pañanan afor. El a yega cas sunu. El a bisa cu e lo a tira e arma afor. Segun Pascual e ta bao tratamento di Respaldo y mester ayudo pa trata su emocionnan. El a admiti di a tira Richi cu un revolver Cal. 38. El a bisa cu nunca e tabatin un arma y nunca a tira. E no sa kico ta e diferencia di un revolve y pistol.
Segun Pascual el a bay na e cas pa resolve e problema. Pero na caminda pa e cas, yen di cos a bin den su cabez entre otro e menazanan. El a bisa Hues cu Richi ya a yega di menace di lo tir’e. Na e cas di Richi el a perde cabez y a primi e gay di e revolver. Segun Pascual, Richi a menace pasobra e ta kere cu Pascual lo tin relacion cu L. El a bisa cu e tabatin relacion cu e ruman muher di Richi. Segun Pascual e cu Richi tabata usa Ecstasy (XTC) pero el a stop y Richi a bay mas pisa.
Hues a mustra cu desde 16 April 2021, Pascual ta sera.
Hues a mustra cu desde 2018, Pascual ta hayando tratamento na Respaldo. E tabata hopi depresivo y pensamentonan paranoid. Hasta pensamento di mata curpa. E tabata pensa malo ora hende keda wak e. Psychiater ta haya cu Pascual ta hopi ocupa cu e problema di Richi cu L. y a perde realidad. Psychiater ta haya cu Pascual tin problema mental paranoid y esey a causa cu el a tira mata. Haya cu e no ta responsabel pa su actonan.
Psychiater ta recomenda pa Pascual haya tratamento pa e keda den realidad y no paranoid. Raport di Reclassering ta mustra cu tin chens cu lo por ripiti y ta haya cu Pascual mester guia di Reclassering y posiblemente guia di psychiater.
Hues a pospone e caso pa 11 November 2021.
