ORANJESTAD (AAN): Diaranson merdia den Corte di Husticia a trata un interesante caso.
Ta trata aki di e caso penal cu Ministerio Publico a cuminsa contra tres persona, kendenan ta wordo acusa di a menaza Promer Minister señora Evelyn Croes cu morto.
Ta asina cu tur tres a wordo haya culpable y Fiscal a exigi trabao pa comunidad contra tur tres. E tres personanan ta e homber J.A.B., e muhernan J.G. y L.M.
MENAZA CONTRA PROMER MINISTER
E acusacionnan cu Fiscal a presenta den Corte contra J.A.B., J.G. y L.M. ta :
- Riba 29 di December 2020, J.A.B. y J.G. a menaza Promer Minister cu morto y/of cendemento di candela.
- Riba mesun fecha 29 December 2020, L.M. a menaza Promer Minister cu morto.
Ta asina cu via Facebook e trio aki a haci e menaza door cu Promer Minister a anuncia cu e reglanan pa cu prevencion di contagion di Covid ta bin bek.
CASTIGO
Fiscal a condena e actitud di e trio aki. El a mustra cu esaki ta un asunto hopi serio pa ta menaza e Promer Minister cu ta responsabel pa henter comunidad y ta tuma medida pa garantiza bienestar general. Fiscal a exigi 30 ora di trabao pa comunidad y si nan no cumpli lo mester bay 15 dia sera den prison.
Hues a sera tratamento di e caso y a dicta sentencia di biaha. Hues a cuestiona e menaza aki cu ta hopi serio contra e Promer Minister di nos isla. Hues a haya e castigo exigi pa Fiscal na su lugar y a confirma esaki. Hues a condena J.A.B., J.G. y L.M. na 30 ora di trabou pa comunidad of 15 dia sera den KIA.
