ORANJESTAD (AAN): Luna pasa tratamento di e caso Avestruz a tuma lugar y Fiscal di Ministerio Publico a exigi pa Harms, 100 ora di trabao y 25 mil Florin multa.
Diahuebs mainta su abogado mr. Carlo a bisa Hues cu dia 10 November 2022, Fiscal a pidi pa
declara Harms liber di labamento di placa. E abogado a bisa cu esey ta corecto y cu e no ta di acuerdo cu e acusacion cu Harms a cumpra Sevinger.
No a cumpra Sevinger: E abogado a bisa Hues cu Harms a realisa hopi proyecto na Aruba, sin aprobacion di minister Sevinger. A dura mas cu 4 añas pa Harms a haya erfpacht comercial na Island Estate. Harms a mira cu Sevinger y partido AVP ta trahando pa drecha economia na Aruba. Pesey e kier a haci proyectonan. E no ta simpatisante di ningun partido politico. Cada temporada di eleccion e famia ta evalua pa cual partido lo bay haci donacion.
Harms no tabata amigo di Sevinger pero a uni cu vision di AVP na 2009 cu kier inverti den economia. Pesey a haci donacion na AVP pa asina bin un cambio den e economia cu tabata deporable, turismo a cay y Gobierno a bandona hopi edificio. AVP a bin cu programa di inversion den economia. Harms a haci donacion haci na 2009 y na 2013. Esun na 2009 tabata menos compara cu na 2013.
E abogado a bisa cu Ministerio Publico ta conclui cu Harms a cumpra Sevinger door di haci donacion na Fundacion Cuazon Berde pa haya proyectonan. Esey na opinion di mr. Carlo no ta berdad. El a mustra Hues cu proyectonan cu Harms kier a realisa a worde rechaza. Otro grupo a haya esakinan.
E abogado a menciona diferente di e peticionnan cu Harms a haci pa haya erfpacht comercial pero a keda rechaza. E abogado a bisa cu Harms tabata bishita edificio di Gobierno pa convence Gobierno pa renova caya grandi den Playa. A dura añanan y esaki no a keda realisa. E abogado a menciona un articulo di ley penal y cu ora cu esey a drenta na vigor ta hopi despues cu e peticion cu Harms a haci na 2013. Pesey 5 di e 7 acusacionnan cu Ministerio Publico a haci ta caduca.
E abogado a bisa cu Harms a haci donacion na Fundacion Curazon Berde di Sevinger pero no na Sevinger. E intension ta cu e placanan ta destina pa campaña politico. E abogado ta haya cu no por bisa aki cu Harms a cumpra Sevinger pa asina haya erfpacht comercial. El a mustra cu e companianan Milero y Marlin a haci donacionnan na 2009 y 2013. Tabatin palabracion haci cu ta pone un limite pa donacion pasobra tabata dona di mas. E abogado a bisa cu famia Harms a haci donacion na diferente otro politiconan tambe.
Ministerio Publico a bruha: E abogado a bisa Hues cu Ministerio Publico ta kere cu door di donacion, companianan di Harms a haya tereno erfpacht comercial. El a remarca cu Ministerio Publico a laga afor, tur e proyectonan cu Gobierno a nenga Harms.
Abogado mr. Carlo a mustra cu dos di e tereno ta di Harms su yiu homber. E otronan tabata di e yiu homber mas bieu. E abogado a bisa cu Harms no ta envolvi den e companianan di su yiunan.
E ta haya cu mester declara Harms liber. Na opinion di mr. Carlo, aparentemente Ministerio Publico a bruha den Harms junior y Harms senior.
El a bisa Hues cu dia 9 November 2022 tabatin sentencia di Corte, den caso cu Harms a cuminsa contra Gobierno cu a kita un erfpacht di dje. Harms a haya erfpacht comercial pero e Gobierno cu a sinta a nenga di duna permiso pa construccion.
Corte a condena Gobierno paga na daño mas cu 200 mil Florin na Island Estate pasobra a rechaza permiso di construccion riba un erfpacht comercial cu Harms cu tin Island Estate a haya di Gobierno anterior. Na opinion di mr. Calo, esaki ta mustra cu Harms no ta afilia cu Sevinger.
