Hues ta haya cu e dama solamente mester paga un multa pa remedinan no registra
ORANJESTAD (AAN): Hues den su sentencia recien, a bari for di mesa e mayoria di acusacionnan cu Ministerio Publico a presenta contra e dama Venezolano A.M.S. E unico acusacion cu Hues a haya legalmente proba ta e importacion di remedinan no registra.
E acusacionnan cu Fiscal a presenta contra A.M.S. ta cu entre 29 Maart 2019 y 6 November 2020 a traha como dentista falso. No tabata cumpli cu exigencianan di Direccion di Salubridad Publico. Su abogado mr. Arendzs Marchena. No tabata duna tratamento manera ta exigi den ley di salubridad. Tambe lo a importa, bende y suministra remedinan cu no ta registra.
FISCAL
Fiscal a bisa cu un persona cu ta duna tratamento medico, e mester cumpli cu exigencianan di DVG. E aparatonan mester cumpli cu exigencianan y remedinan mester wordo duna via dokter di cas. El a mustra cu kehonan a drenta na Maart 2019 cu lo tin un consultorio dentista. A haci control na un lugar. Despues na November 2020 a drenta otro keho cu lo tin un dentista trahando ilegal. A bay controla na e cas y a haya M.S. tratando hende. Fiscal a remarca cu apesar cu na 2019, A.M.S. a wordo avisa cu e no por trata hende na Aruba, el a sigui tog. Fiscal a bisa cu un diploma di exterior mester wordo aproba pa Inspeccion di Medicina. AM.S. tabata sa cu e mester sigui curso pa wordo aproba y apesar di sa cu e no por traha, e tabata traha. E hecho cu den temporada di Covid a yuda hende, no ta un excusa.
Na opinion di Fiscal, A.M.S. tabata yuda hopi ilegal riba isla. Esaki no por. El a mustra cu A.M.S. no tabata traha na forma higienico y no tabatin aparato di sterilizacion. Fiscal tambe a mustra cu A.M.S. tabata usa remedinan cu no ta registra na Aruba. Ademas tin remedinan cu a caduca. Algo mas cu 1100 florin a confisca. Fiscal a pidi pa laga esaki confisca y tambe e remedinan. Fiscal a bisa cu A.M.S. lo a atende 204 pacient.
Fiscal a exigi multa total di 6 mil florin of 10 dia sera. Pa loke ta castigo, Fiscal ta haya cu mester manda un señal bon cla cu no ta permiti trahamento den salubridad ilegal. Fiscal a menciona sentencianan na Hulanda pa hendenan cu tabata traha ilegal den salubridad pa hustifica su exigencia. El a exigi 18 luna di prison di cual 8 luna ta condicional cu 5 aña di prueba.
HUES A BARI ACUSACIONNAN FOR DI MESA
Hues a bisa cu pa cu e promer acusacion cu A.M.S. lo tabata traha ilegal, e ley cu ta trata e profesion di dentista, ta bisa cu ta prohibi pa trata paciente si no tin e titulo. Hues ta haya cu mester declara A.M.S. liber pasobra e ley aki no ta aplicable pa A.M.S. Hues a bisa cu no por prueba cu A.M.S. no tabata autoriza a base di ley pa traha como dentista y ortodontologo. El a bisa cu A.M.S. tin su diplomanan.
Pa loke ta e di dos acusacion, esta di no tabata cumpli cu exigencianan di Direccion di Salubridad, Hues a bisa cu e ta bay di acuerdo cu e defensa di mr. Arendsz Marchena, esta cu A.M.S. no tabata un persona cu ta ofreci cuido. Hues a bisa tambe cu e ta di acuerdo cu e punto di bista di mr. Arendsz Marchena, esta cu e exigencianan para den ley, no ta aplicable pa A.M.S. pasobra e ley ta dirigi na esnan cu a pasa cu exito nan examen na Aruba. Hues ta haya cu mester declara A.M.S. liber pa e acusacion aki.
Pa loke ta e acusacion di lo tabata suministra remedinan no registra, Hues a bisa cu e ta haya A.M.S. culpabel di esaki. Pa a importa remedinan no registra, Hues a condena A.M.S. na un multa di 1 mil florin. Hues a bisa cu for di e 1 mil florin mester desconta e tempo cu A.M.S. tabata sera, na razon di 50 florin pa dia. Hues a duna orden pa tur e remedinan importa lo mester destrui y e otro cosnan cu a confisca mester debolbe.
