Aunke cu e sospechoso ta para riba cu e ta inocente
ORANJESTAD (AAN): E homber Colombiano biba na Aruba, di inicial D. di 57 aña di edad, a scucha Fiscal exigi 6 aña di prison p’e. D. ta para riba cu e ta inocente di a abusa di e muchanan K. y R., entre 2015 y 2018.
Fiscal a acusa D. cu entre 2015 y 2018 a haci actonan inmoral y a viola e muchanan K.y R.
Abusa di muchanan: Hues bisa cu e homber K., tata di e mucha K. di 14 aña a haci denuncia na Polis. El a bisa miembronan di KZP cu tempo K. a bis’e cu tempo e tabatin 8 pa 9 aña, el a wordo viola door di D. cu ta casa di abuela di K. E abuela tin un creche y ta asina cu despues di school e tabata keda cerca e abuela hunto cu su prima R. Nan tabata keda den e camber caminda e babynan ta drumi.
Segun K., ora cu e abuela tabata ocupa den creche, D. tabata bay den camber mishi cu nan partinan intimo y tabata saca su parti intimo y frega riba nan. Ora e tata K. a yama su ex pa bis’e y e ex a bisa cu e sa pero tin miedo cu su mama lo bira malo y cu lo bin problema den famia. E ex a pidi K. pa no bay Polis. Na dado momento e mucha K. a bay biba serca su tata .K. E ora ey e tata a dicidi di haci denuncia contra D. pasobra awor su yiu K. ta sigur serca dje.
Muchanan ta papia: Oficialnan di KZP a interoga K., kende a conta cu tempo e tabatin 8 of 9 aña e tabata bay keda despues di school na e cresh di su abuela na Nuñe hunto cu su prima R. D., casa di abuela ta bin for di trabao 4 pm. Nan tabata keda den camber unda e babynan ta drumi. El a bisa cu un biaha el a bay den camber y mira D. tabata mishi cu pecho di su prima R. cu tabata full sunu. Nan tabata den baño. D. a spanta y a stop di biaha. El a puntra D. kico e tabata haciendo y D. a bisa cu nan tabata hunga.
E dia siguiente K. tabata atrobe cu su prima R. na e creche. Na dado momento D. a yega y a pidi R. pa bay cu ne. K. a sigui nan caminda D. a bay cu nan den un camber. D. a cuminsa mishi cu nan na nan parti intimo. Segun K. e tabatin miedo di D. y no a bisa nada. Esaki a keda sosode tur atardi. Despues e cos a bira mas serio. Den camber el a pidi K. y R. pa kita nan paña. K. a bisa cu D. a abusa di nan. Di miedo nan no a grita di dolor cu nan tabata sinti. Segun K., D. tabata keda haci’e practicamente tur dia.
Omo a sorprende abusador: Segun K., despues di 1 aña, ora e tabatin 10 aña, D. kier a abusa di dje pero e omo J. di K. a sorprende. E momento ey D. a haci manera ta hunga e tabata hunga. E dia ey e mama di K. y e omo J. a bay reclama D. Ora nan a bay cas, K. a conta su mama tur cos. El a conta su maestra di school tambe. E maestra a pidi e mama pa bay school pa papia riba e asunto. Despues K. a conta su tata. K. a bisa cu el a keda den trauma.
E mucha R. tambe a declara na KZP, cu D. a bay mishi cu nan den e camber di baby. E tabata pusha nan riba cama y tabata haci actonan inmoral. R. a bisa cu D. nunca a penetra nan. E no sa pakico K. a bisa asina.
Sospechoso ta nenga: Hues a bisa cu D. a wordo interoga door di KZP y confronta cu e declaracionnan di e muchanan pero D. ta nenga di a abusa di e muchanan. Ta asina cu e abuela a tuma parti pa D. y a bisa cu e muchanan ta gaña pasobra nan no kier pa e abuela ta cu D. Segun KZP, den cellular di D. a haya potretnan di muchanan menor di edad y tambe pornografia.
Demanda di daño: Abogado mr. Hart a representa e tata di K., cu a presenta demanda di daño. E abogado a bisa cu cu ainda e hoben K. ta afecta mental. E abogado a menciona sentencianan di violacion cu ta 5 mil florin pa hendenan grandi. Den e caso aki ta un mucha y el a demanda 7500 florin y otro pagonan esta di su trabou y e carta di psicologo. E tratamento di K. no ta wordo exigi pasobra e mama ta pagando esey.
Victima a manda carta pa hues: A bogado a lesa e carta di e mucha K. cu awor tin 15 aña. E mucha ta bisa: “Ora mi tabata chikito mi a wordo abusa door di D. Esaki ta causa mi hopi dolor pero mi ta cabez na halto. Tin biaha mi ta sinti vies di mi mes y mi ta yora pa saca tur loke mi ta sinti. Cu mi 12 aña mi a papia kico tur a pasa. Despues di esey, e mama no a haci nada pasobra e no kier afecta e abuela. Ora mi a conta mi tata, el a actua pa mi. Mi ta pidi pa tin husticia pa D. bisa e berdad cu el a haci cu mi y R.
Fiscal: Fiscal a bisa cu e dos muchanan entre 8 y 10 aña a duna declaracion detaya con D. a abusa di nan. D. ta nenga di a abusa di e muchanan. Nan a bisa cu nan no a papia nada promer pasobra nan tin miedo di D. Pa cu e demanda di daño, Fiscal ta haci cu esaki ta bon argumenta y a pidi Hues pa aproba esaki y pone medida di pago.
Castigo: Fiscal ta haya cu pa satisface su gusto, D. a abusa di e muchanan sin pensa ki consecuencia esaki tin pa e muchanan. Na cas di e abuela unda e muchanan mester sinti nan mes sigur, D. a abusa di nan. Fiscal ta haya cu D. a afecta e muchanan cu su actonan cu lo por laga nan keda afecta. Na opinion di Fiscal, comunidad ta preocupa cu casonan di abuso.
Den e caso aki ta durante un periodo largo, D. a abusa di dos mucha menor di edad. Fiscal a menciona sentencia di Corte na Hulanda cu ta 10 aña di prison pa un caso parecido. El a menciona tambe cu recien Corte di Aruba a condena un homber na 5 aña y 6 luna pa abuso. Den e caso aki Fiscal a exigi 6 aña di prison.
Abogado: mr. Maldonado a bisa Hues cu D. ta nenga di a abusa di e muchanan. E muchanan a gaña riba D. E ta haya cu e declaracion di e mucha K. y R. ta diferencia di otro. K. ta papia di penetracion mientras cu R. ta bisa cu nunca tabatin penetracion. Na opinion di abogado, e dos declaracionnan aki ta trece duda si a sosode algo of no. E ta haya cu no tin prueba di sosten. E unico incidente cu tin mas, ta e omo J. lo a mira D. ta frega riba K. Na opinion di abogado, hasta esaki tin diferencia di declaracion entre K. y J. riba esaki. Esey ta haci cu no sa kico realmente a pasa. E abogado ta haya cu e risico ta hopi grandi pa D. a abusa di e muchanan den e camber di e babynan pasobra un ora pa otro e abuela por drenta e camber. E declaracion di e muchanan no ta cuadra. Pa loke ta demanda di daño, e abogado ta haya cu e no ta suficiente argumenta. El a pidi Hues pa declara esaki no admisible. Abogado ta conclui cu no tin prueba legal contra D. y pesey e mester wordo declara liber. El a bisa cu D. a haci un operacion grandi di curason y mester haci controlnan medico.
Fiscal a reacciona cu e no tin motibo pa duda den declaracion di e muchanan. E ta haya cu e muchanan lo por a duna diferente declaracion pero den lineanan grandi ta mesun cos. E controlnan medico lo por tuma lugar den KIA.
Segun D., tur e muchanan ta gaña contra dje. E ta para riba cu nunca el a abusa di e muchanan. Por bien ta cu e yiunan di e abuela no kier pa e ta cu e abuela.
Hues a bisa cu e ta bay studia e caso y 17 November 2023 lo tin sentencia.
