Ta tuma medida contra autonan cu glasnan getint
ORANJESTAD (AAN): Ta parce cu Ministerio Publico a fiha un maneho pa chofernan cu ta core cu glasnan getint dilanti y na banda. E chofer cu ocasiona un accidente fatal y e glasnan di e auto ta getint, Fiscal lo por exigi por lo menos 6 luna di prison.
Auto a dal mucha mata: Recientemente tabatin un caso penal contra e chofer cu a ocasiona un accidente fatal caminda el a dal un hoben di 20 aña mata cu auto. E lamentable accidente aki a sosode anochi riba e caminda di Tanki Leendert pa Playa, riba Kamerlingh Onnestraat, banda di T-weg net despues di Euro Kitchen. E hoben a bay cruza caminda sin paga tino y e chofer J.K. a dal e mucha mata cu auto.
Por a compronde cu e chofer di e auto J.K., no tabata bou influencia di alcohol, no tabata core hopi duro y no tabata na cellular.
Glasnan getint ta bira castigabel: Ta asina cu Fiscal a persigui J.K. pasobra e auto no tabata gekeur, e no tabatin seguro y cu e windshield y e glasnan na banda tabata getint. Fiscal a exigi 6 luna di prison pa J.K.
Ta mustra cu Ministerio Publico, ta hibando un maneho caminda ta laga pasa chofernan cu despues di keur auto ta laga tint e glasnan. Pero si un chofer ocasiona un accidente cu morto den oranan di anochi, Fiscal lo por exigi por lo menos 6 luna di prison pa core cu glasnan getint. Esaki sin conta ainda si Fiscal ta haya cu e chofer tabata core cu velocidad halto, bou influencia y a core bay. E ora ey e castigo lo bira mucho mas halto.
E maneho aki ta conta pa henter comunidad y tambe pa Polis, Gobierno, Ministernan, Parlamentarionan, autonan di seguridad. Si e chofer den e auto ocasiona un accidente fatal den oranan di anochi, Fiscal lo por exigi por lo menos 6 luna di prison.
