E sospechoso ta para riba cu e no a hinca
ORANJESTAD (AAN): Diabierna di mainta te den oranan di merdia, den Corte di Husticia a trata e caso penal cu Ministerio Publico a cuminsa contra e hoben homber J.M.H.(18), kende Fiscal ta acusa di riba 21 Augustus 2022 a purba di asesina e hoben homber I.M.D. Fiscal ta haya J.M.H. culpabel di a hinca I.M.D. cinco biaha y a exigi 3 aña di prison, di cual 6 luna ta condicional cu un tempo di prueba di 2 aña y bou guia di Reclassering.
Acusacion: E acusacionnan cu Fiscal a presenta den sala di Corte contra e sospechoso J.M.H. ta, cu el a hinca e victima I.M.D. den lomba y of pecho. Subsidiario Fiscal ta acusa J.M.H. di bringamento riba caminda publico y causa maltrato severo riba I.M.D.
Scucha testigo menor di edad: Promer cu tratamento di e caso mes a cuminsa, Hues a bisa cu e kier scucha e hoben homber J. (di 13 aña) como testigo. Ta asina cu J. tambe tabata envolvi den e bringamento y lo a dal e victima. Hues a bisa cu e scuchamento di J. lo ta cu portanan sera.
Tanto e sospechoso J.M.H., tur su famia cu tabata presente y prensa mester a sali for di sala. Solamente abogado di J.M.H., mr. Marchena a keda cu Fiscal y Hues.
Hincamento: Despues di e interogacion di e testigo, a sigui cu e tratamento di e caso caminda Hues a puntra J.M.H. si e ta compronde e acusacionnan. J.M.H. a bisa Hues cu ningun momento el a hinca I.M.D. El a bisa cu si mira e video di seguridad bon, lo mira cu el a bringa cu I.M.D. cu man bashi. El a bisa cu ta e homber B.R. cu tambe a bringa contra I.M.D. ta esun cu a hinca I.M.D.
Segun J.M.H. na un club caminda e tabata, el a topa cu hendenan di un gang, kendenan ta blo molesti’e. El a splica Hues cu e tabatin relacion cu un chick R. pero a kibra cun’e. I.M.D. tin relacion cu R. y e ta anda cu e guynan di e gang. J.M.H. a yama su ruman cu a bin busk’e. Ora nan a sali, J.M.H. a topa cu I.M.D. y a cuminsa bringa cu ne.
Despues ora cu I.M.D. a cay, segun J.M.H., B.R. a hinca I.M.D. El a bisa cu e no conoce B.R. pero sa cu e ta un hende problematico.
Hues a bisa cu a scucha testigonan y tambe B.R. Ta asina cu tres testigo a bisa cu B.R. a hinca e victima pero B.R. mes ta desmenti. Abogado mr. Marchena a haci J.M.H. un serie di preguntanan y J.M.H. a bisa Hues cu e no tabata sa cu su ruman homber a bay busk’e cu B.R. E no tabata sa tampoco cu B.R. tabatin un cuchio. El a bisa cu el a scucha B.R. bisa den auto, cu el a hinca I.M.D. y a mustra e cuchio.
Fiscal: Fiscal a bisa Hues cu un caso lamentable sosode. Un hoben a haya 5 hinca. Danki Dios el a haya atencion medico di biaha cu a evita cu el a fayece. Polis a cuminsa investiga y a haya video di seguridad y tambe a papia cu testigonan. I.M.D. na hospital a bisa cu 4 homber a atak’e y J.M.H. a dal’e promer. Un otro a dal’e un skop y ora e cay riba suela e otronan a atak’e.
E momento ey I.M.D. tabata hunto cu e chick R. E dama R. a bisa cu J.M.H. a hinca I.M.D. 4 biaha cu un cuchio grandi. E ta bisa cu e ta sigur cu ta J.M.H. Despues el a declara cu e no a mira J.M.H. hinca pero cu el a mira J.M.H. cu un cuchio den su man. Fiscal a bisa cu e dama R., ora el a mira cu I.M.D. a wordo hinca, el a core bay na e club pa busca ayudo. Fiscal a sigui bisa cu B.R. ta nenga rotundamente di a hinca. El a bisa cu e no tabatin cuchio.
Fiscal a bisa Hues cu e testigo J. cu a scucha den Corte ta bisa cu ta B.R. a hinca pero promer biaha cu el a wordo scucha pa Polis, el a bisa cu ta J.M.H. a hinca. Fiscal a bisa cu el a no ta kere e declaracion di e testigo.
Video pasa den corte: Fiscal a bisa cu e imagennan ta for di un distancia un poco leu. A manda imagennan NFI na Hulanda cu a ‘enhance’ y haci e imagennan mucho mas mihor. El a splica cu a pidi Polis evalua e imagennan y a traha un relato kico tur a sosode. Fiscal mustrando e imagennan riba pantaya grandi den Corte, a splica cu e pelea a cuminsa despues di 2:35’or di marduga.
Via imagen Fiscal a mustra tambe cu J.M.H. a drenta hunto cu B.R. den e club y nan tur dos a wordo controla pa seguridad. Segun e relato di Polis, J.M.H., durante e pelea cu e victima tabata riba suela, a haci 5 movecion cu su man cu ta parce di tabata hinca y cu B. tabata dal I.M.D. cu mokete. Abogado mr. Marchena tambe tabata haci remarkenan pa cu e imagennan, mustrando cu ta J.M.H. tabata dal I.M.D. cu mokete mientras cu B.R. tabata dobla y tabata haci movecion di hinca.
Fiscal a bisa cu e unico 2 hombernan cu por a hinca I.M.D. ta J.M.H. of B.R. E ta haya cu ta J.M.H. ta esun cu a haci. Na opinion di Fiscal, J.M.H. tin problema cu e gang di Madiki y Bushiri pasobra I.M.D. ta cu nan. Fiscal ta haya cu for di e imagennan y e relato di Polis cu ta evalua e imagennan di NFI, ta mustra cu J.M.H. a hinca. El a mustra potret di e victima cu tin 5 herida di hinca. Fiscal a sigui bisa cu B.R. tabatin 8 biaha contact cu e victima mientras cu J.M.H. tabatin 5 biaha contact. E amiga di I.M.D., R., tabata eynan para y a mira con I.M.D. a wordo hinca.
Castigo: Fiscal ta haya legalmente proba cu J.M.H. ta culpable di intento di asesinato. E hincanan tabata den lomba di e victima a afecta su pulmon. El a keda 14 dia hospitaliza caminda e pulmon di e victima a collapse y sangramento paden na pecho. Tambe e mester a haya transfusion di sanger. Fiscal ta haya cu e sospechoso J.M.H. a tuma e chens cu I.M.D. por a muri.
Fiscal a bisa Hues cu casonan asina ta crea sentimento di inseguridad den comunidad. Hende tin miedo di sali. Fiscal a bisa cu e momento cu e incidente sosode, J.M.H. tabatin 17 aña y mester uza castigo hubenil. El a exigi 36 luna di prison (3 aña) di cual 6 luna ta condicional cu 2 aña di prueba, bou guia di Reclassering.
Abogado: mr. Marchena a bisa Hues cu e ta haya cu riba videonan por mira cla cu e movecionnan di B.R. tabata movecionnan di hinca, mientras cu J.M.H. tabata manda mokete. Na opinion di mr. Marchena, por a mira cla cu B.R. tabata busca movecion pa hinca e victima den lomba. Tur hende ta bisa cu B.R. a hinca. Ta solamente e dama R. ta bisa cu J.M.H. a hinca. El a mustra cu e victima tabata drumi den banda y J.M.H. no por a hink’e e forma con J.M.H. tabata para mientras cu B.R. si. E abogado a bisa cu e testigo menor di edad, J., cu tambe a bringa cu I.M.D., a declara na Polis cu ta B.R. a hinca y den Corte el a bisa cu el a mira B.R. cu e cuchio y cu B.R. a bisa nan den auto cu el a hinca y cu el a mira sanger riba e cuchio.
E abogado a bisa cu J.M.H. no tabatin cuchio cu ne. E abogado a mustra cu e dama R., menor di edad, ta bunita pero ta problematico. E ta uza droga. E tabata presente na diferente hincamento y hasta un drive by shooting. El a bisa cu algun dia despues di e incidente aki, el a wordo hinca. E ta haya cu R. lo a gaña cu J.M.H. a hinca 4 biaha I.M.D.
E abogado a remarca cu despues R. mes ta bisa cu e no a mira J.M.H. hinca y cu tabata scur. E abogado ta haya cu no por proba cu J.M.H. a hinca e victima. No por considera J.M.H. complice di e hincamento tampoco. El a pidi Hues pa duna J.M.H. castigo mescos cu e ta sera caba cu ta 6 luna y bou guia di Reclassering pa 1 aña.
Hues a sera tratamento di e caso y a bisa cu 17 Maart 2023 lo tin sentencia.
