Polis a uza tecnologia pa track y scucha nan
ORANJESTAD (AAN): Diabierna mainta den sala di Corte di Husticia, a trata e caso penal cu Ministerio Publico a cuminsa contra un grupo di 5 homber, kendenan ta worde acusa di a planea pa haci un atraco arma riba un oficina di number den Playa riba 29 Juli 2022.
Ta trata di e hombernan C.G.H. di 52 aña naci na Aruba, M.H. di 38 aña naci na Aruba, J.I. di 57 aña naci na Curacao, J.T. di 27 aña naci na Curacao y G.M. di 42 aña naci na Curacao biba na Aruba.
Tambe ta acusa nan di posesion di arma di candela. Tambe Fiscal a acusa e homber G.M. di a purba horta placa for di cahero di Casino. E atraco aki tabata planea pa sosode net e periodo cu tabatin e premio di 2 miyon Florin di Lotto pa Deporte.
E gang aki tabatin potret di oficina di number Lucky Numbers den Arendstraat cu nan kier a hit como cu e dia ey hendenan tabata cumprando hopi ticket pa e jackpot miyonario. Pa G.M. tin tambe intento ladronicia na casino.
Aparato scucha combersacion den auto: Hues a mustra cu desde 8 Juli 2022, Polis a haya tip cu e hombernan J. y G.M. ta planeando un asalto hunto cu otronan. Riba orden di Fiscal y permiso di Hues Comisario a dicidi di tap celularnan di e delincuentenan. Polis sa cu esnan envolvi ta papia cu cierto ‘codenan’. Door di esey, a pidi Fiscal permiso pa pone aparato di GPS Trackers na auto di J. y G.M. pa haya mas informacion y unda e autonan ta. Fiscal a duna permiso y tambe duna orden pa observa.
A base di esaki, Polis riba un Diabierna 15 Juli 2022 anochi trempan banda di 6:45 pm, a track e auto di G.M. ta bay cas di C.G.H. na Paradera. Nan dos a bay den auto di G.M. E auto aki a keda staciona riba parkinglot di Aruba Bank pa mey ora. Polis ta sospecha cu G.M. a pidi C.G.H. pa planea un atraco.
Nan a bula cu avion pa yega Aruba: Autoridad a bay na nivel mas halto e ora! Hues Comisario a duna permiso pa pone aparato wireless sofistica pa scucha combersacion den auto.
Asina a bin haya sa cu dos Curasoleño y M.H. ta envolvi den e planning. Riba Diaranzon 27 Juli 2022 a scucha combersacion entre G.M. y un persona di Curacao caminda a bisa cu mester “paga pa nan bin”.
Riba Diaranzon ey mes dia 27 Juli, e homber J.T. a yega cu vuelo for di Curacao y despues J.I. a yega. Tur esaki Polis a confirma riba camera di Aeropuerto.
Hues a mustra cu durante interogacion di Recherche, C.G.H. a bisa cu nan tabatin planea un atraco riba e rebendedor di lotto Lucky Numbers den Playa. Recherche a confronta C.G.H. cu e combersacionnan cu e tabatin den auto caminda el a papia cu dos persona mester a coy un tas for di un auto y core bay. J.T. lo mester a coy e tas y M.H. mester a bay hiba J.T.
Segun C.G.H., Diahuebs dia 28 Juli 2022 a planea e atraco hunto cu J.T. Hues a bisa cu investigacion a mustra cu otronan tambe tabata presente. Ta asina cu lo mester a ataca un homber di edad cu lo tin e tas di placa di e Rebendedor di Lotto. Ora e homber pone e tas den auto, J.T. lo mester a coy e tas y core bay. C.G.H. a duna J.T. un tas den cual tabatin un arma den candela. Segun J.T., el a laga e arma bao cusinchi den e apartamento, pasobra e no tabata kier a haci e atraco.
A cancela atraco: Hues a bisa cu J.T. y J.I. a worde acerca na Curacao pa bin haci algo na Aruba. For declaracionnan por a compronde cu ta un persona sera den prison na Curacao a acerca nan pa bay Aruba. E persona aki lo ta forma parti di un grupo hopi poderoso.
Ta asina cu M.H. a bay mustra nan e lugar unda e atraco mester sosode. E plan tabata cu J.T. y J.I. lo bay haci e atraco y core bay cu un scooter. Nan lo mester bay na veld di Cricket caminda M.H. ta warda nan pa hiba nan den auto y laga e scooter atras.
Pa un of otro motibo e atraco no a sigui. Hues a mustra cu a scucha C.G.H. tabata papia den auto cu mester busca “un coy tira”. El a bisa cu mester un mas. El a bisa cu e homber a bende e cos pa 3.200 Florin. E ta caro pero mester di dje.
C.G.H. a bisa cu for di e placa cu haya di e atraco, ta kita tur e gastonan cu el a haci y despues ta parti e placa. E palabracion ta cu e dos di Curacao lo haya mitar di e placa y e otro mitar lo parti den tres.
Polis a scucha cu J.I. ta bisa cu lo tin un Van blanco para den e parkinglot dilanti e Rebendedor di Lotto y esaki ta sospechoso. Despues a mira un bus preto ta blo pasa ey banda. C.G.H., cu tabata para den e parkinglot banda di Corte, a bay check. Na dado momento J.T., cu tabata sinta riba un banki, a lanta bay. E atraco no a sigui.
C.G.H. a bisa cu dilanti su cas lo tin un dama cu tin 30 mil Dollar na un pomp di gasoline y cu lo bay pa haci e atraco ey. E atraco ey tampoco a keda realisa.
Hues a puntra C.G.H. con el a drenta den contacto cu J.T. y J.I. Ta asina cu tur tres a bisa cu nan ta haci uso di nan derecho di silencio. Durante interogacion di Hues, J.T. y J.I. a bisa cu for di Curacao nan a planea caba cu nan lo no bin haci nada na Aruba. Nan a probecha di e oferta di haya estadia.
Hues a mustra cu durante investigacion na cas di G.M. a haya 46 paki di marihuana. E auto di C.M. a keda confisca. A confisca e auto di M.H. Tabatin discusion riba arma di candela. C.G.H. ta para riba cu no ta arma di candela sino un Taser. Hues a remarca cu e no ta kere cu un Taser ta costa 3.200 Florin. C.G.H. a bisa Hues cu el a gaña cu el a cumpra cos pa 3.200 Florin y a cumpra ticket pa J.T. y J.I. pa asina ora tin cu parti placa, e lo haya mas placa.
Purba horta Casino: Hues a mustra cu G.M. a purba coy placa for di cahera den Casino riba 9 Juli 2022. Un persona di seguridad a mira con G.M. a dobla over di toonbank di cahera y coy 7 paki di 20 Dollar. E ora ey e seguridad a grit’e y G.M. a pone back. Cada paki ta mas cu 3 mil Dollar.
Varios acusado ta conoci pa polis: Hues a mustra cu varios di e acusadonan tin carchi di castigo. El a mustra cu acusado M.H. na 2018 a worde condena na 4 aña di prison pa atraco y na 2020 a worde condena pa arma.
Acusado C.G.H. na 2015 a worde condena na 9 aña di prison pa atraco y na 2020 condena pa arma. J.T. na Curacao a worde condena pa arma di candela na 2021 y a awor ta sera den su tempo di prueba.
Acusado G.M. tin carchi castigo cu varios condena pa ladronicia y tambe caso di agresividad. Na 2015 el a worde condena na 4 aña y 6 luna di prison pa atraco.
Fiscal a baha pisa: Fiscal a bisa cu e caso aki ta diferente cu otro casonan di atraco. Aki Polis a haya tip cu lo tabatin planea pa haci un atraco. Danki na tap esaki a keda na plan so. Sinembargo esey no kiermen cu no ta haya castigo. E ta haya cu mester duna castigo pisa.
El a mustra cu dos Curasoleño J.T. y J.I. a viaha di Curacao bin Aruba pa haci e atraco. A scucha combersacionnan for den auto cu aparato special cu a pone na e autonan di C.G.H. y M.H. Fiscal ta haya cu aki por papia di preparacion pa haci atraco. Nan tabatin un arma di candela, dos auto, un scooter, paña y plan con lo mester huy bay for di e lugar ora di caba atraca e homber cu tin e tas di placa. Na opinion di Fiscal, tur tabata cla pa haci e atraco y solamente tabata falta pa J.T. coy e tas di placa. Fiscal a conclui cu e ta persigui e grupo pa preparacion di un atraco.
El a mustra cu J.T. y J.I. a hala atras na momento di haci e atraco. Esey no ta valido pa e resto di e grupo. Fiscal a mustra cu segun J.T., ora el a mira e homber di edad sali cu e tas, el a dicidi di stop pasobra tabatin varios hende ey banda. Den Corte, J.T. ta bisa cu no tabatin hopi hende. E pregunta ta, kico mester kere di loke J.T. a bisa.
Fiscal a bisa cu e no ta kere J.T. J.I. a bisa cu nan a dicidi di no haci e atraco mas. Fiscal no ta haya cu aki por bisa cu di nan mes J.T. y J.I. a dicidi di hala atras. E ta haya cu e preparacion pa cu e atraco ta keda valido pasobra esey a tuma lugar. No a haya arma cerca nan pero esey no kiermen cu no tabatin un arma di candela.
Tin declaracionnan cu ta mustra cu tabatin un arma di candela. Fiscal a bisa cu e no ta kere cu lo tabatin un Taser. El a mustra cu un di e sospechosonan a mira un arma color di nikkel.
Fiscal a mustra cu G.M. kier a horta un paki di Dollar tras di un cahera.
Fiscal a señala cu varios di nan tin condena caba pa atraco y tambe posecion di arma. E auto di G.M. lo mester keda confisca mescos pa M.H. Na opinion di Fiscal, ambos auto a worde usa pa e preparacion. E auto di C.G.H. ta worde menciona pero no tin prueba cu a worde usa. Pesey e auto ta worde debolbi.
Fiscal ta haya cu mester manda señal bon cla cu no ta tolera atraco. El a exigi pa J.I. castigo di 2 aña y 9 luna di prison. Pa J.T., G.M. y M.H, el a exigi castigo di 3 aña y 4 luna di prison. Fiscal ta considera C.G.H. e cabezante tras di e plan y a exigi 4 aña di prison.
Awor Hues ta bay studia e caso, despues di a scucha e abogadonan pa dentro di algun siman dicta sentencia.
