ORANJESTAD (AAN): Un grupo di 5 acusado via video conference a scucha nan sentencia den e caso penal cu Ministerio Publico a cuminsa contra nan.
Ta trata aki di e hombernan I.A.C., L.E.C., P.L.D., J.F.G., F.M.B. Ta asina cu Hues a declara F.M.B. liber, mientras cu e otronan si a wordo haya culpable.
DEMANDA
Na Januari 2022, tratamento di e caso a tuma lugar caminda Fiscal ta acusa e grupo di diferente asalto. Esun mas serio tabata 3 Juli 2021 caminda a asalta un pareha den forma brutal. E pareha tabata presente den Corte y a haci un demanda di 200 mil florin. E dama A. t H. a mustra cu actualmente e ta bou tratamento di psicologo.
El a bisa cu tabatin 200 mil florin y masha hopi dollar cu a wordo horta. Hues a bisa cu den caso penal solamente por demanda 50 mil y e resto lo por haci un caso civil. E homber R.K. a bisa Hues cu el a keda afecta. Cada vez cu e subi den su auto e ta corda kico el a pasa aden. E dama a bisa cu cada vez cu yega cas e ta corda bon cla con e asalto arma brutal a sosode.
FISCAL
Fiscal ta haya legalmente proba e asalto arma riba 19 Juni 2021 na Yanana Supermarket caminda e asaltantenan a bay cu mas o menos 600 florin. Via camera di seguridad a mira e auto Picanto y asina a bin haya sa kendenan ta e asaltantenan. Fiscal ta haya proba cu L.E.C. ta envolvi.
E caso 3 Juli 2021, ta caminda e pareha a wordo asalta forma brutal. Nan a wordo mara y pone riba suela di cas bou construccion. E homber R.K. a wordo mara y hiba na nan cas, caminda a bay cu suma grandi di placa y aparatonan electronico. Aki I.A.C., P.L.D., a bay cu 16 mil dollar. A reparti e placa den 5. Na opinion di Fiscal, door di declaracion di I.A.C. y P.L.D. por papia di complice di e otronan. El a bisa cu L.E.C. ta desmenti pero a hay’e cu 1500 dollar y 2300 florin. I.A.C. a duna declaracion cu ta compromete L.E.C. El a bisa cu ta L.E.C. a bin cu e plan y auto. P.L.D. no ta menciona L.E.C.
Segun Fiscal, e ta mustra cu P.L.D. kier tene L.E.C. for di e caso. J.F.G. a bisa cu ta F.M.B. a bis’e cu tin hende cu hopi placa. Despues L.E.C. a dun’e 500 dollar. El a bisa tambe cu L.E.C. tabata observa e cas. Fiscal ta considera L.E.C. complice di e asalto arma. F.M.D. ta esun cu a bin cu e idea y ta papia di 400 mil dollar cu J.F.G. Despues J.F.G. a bisa P.L.D. pa haci e asalto.
Pa loke ta demanda di daño. Fiscal a bisa cu ta hopi lamentable loke a sosode cu e pareha. Ta dificil pa calcula daño emocional. Mester demostra cuanto e daño material ta. Segun ley, te na un maximo di 50 mil florin por demanda. Fiscal a pidi Hues pa honra 50 mil florin y e resto declara no admissible y e pareha lo por haci un caso civil. Fiscal ta haya cu e grupo lo mester paga esaki y ta exigi pa pone e medida di pago.
CASTIGO
Fiscal a bisa cu e forma con e asaltonan aki a sosode a sacudi henter comunidad. El a mustra con e pareha ta wordo asalta den nan propio cas, mara y laga atras. Fiscal ta haya cu mester manda señal bon cla cu no ta tolera esaki.
Fiscal a baha pisa riba e grupo aki. En especial e hecho cu a haci asalto arma riba un pareha na nan cas. El a bisa cu e ta tene cuenta cu cooperacion di I.A.C. Segun Fiscal, P.L.D. ta admiti pero no ta bisa nada. El a exigi pa P.L.D. 11 aña, I.A.C. 8 aña, L.E.C. 6 aña, J.F.G. 30 luna, F.M.B. 20 luna.
SENTENCIA
Hues recientemente a dicta sentencia caminda e ta haya cu I.A.C., L.E.C., P.L.D., J.F.G., F.M.B. ta envolvi den e asalto arma cu violencia na cas di un pareha. Hues ta haya esaki un acto cobarde caminda a mara e pareha y maltrata nan. E homber K. a wordo secuestra hiba na cas di e pareha. Dos di e grupo aki a bay cu e homber. Pa e pareha tabata un acto hopi duro y traumatico. Nan mester a haya tratamento psicologico.
Hues a mustra cu F.M.B. a bisa J.F.G. cu e pareha lo tin 400 mil florin na cas. E kier a haci un asalto pero no ta envolvi. Na dado momento el a bisa J.F.G. cu e no kier pa e asalto sosode mas. J.F.G. conoce P.L.D. cu ya caba a haci asalto. El a bisa P.L.D. di e asunto. F.M.B. despues a haya placa di L.E.C. pa e informacion. Hues a bisa cu P.L.D. a admiti di a planea e asalto y ehecuta esaki. El a admiti di a haci asalto na un supermercado y a haci asalto na Cinemas. I.A.C. a admiti di a haci e asalto na e supermercado y na e cas.
El a basha abao riba e otronan L.E.C., P.L.D. y J.F.G. Segun I.A.C. ta L.E.C. a planea y percura pa armanan. L.E.C. ta nenga pero a base declaracionnan ta mustra cu e ta envolvi. P.L.D. a haci 3 asalto arma, I.,A.C. 2 asalto arma, L.E.C. ta envolvi den e asalto arma na e cas, J.F.G. a duna informacion importante di e cas pa haci asalto arma. E ta complice. Pa loke ta F.M.B. el a hala atras promer cu e asalto arma. Pesey Hues a declara F.M.B. liber.
Pa loke ta e demanda di daño, Hues a bisa cu 11 mil dollar y 2500 florin a wordo horta. Nan a reparti e placa y F.M.B. a haya 500 dollar y resto 3 mil dollar. Ta deduci cu 15500 dollar a horta. Hues a bisa cu e ta haya cu e dama v.H. su demanda ta keda proba pa un total di 42.467 florin. E demanda di K. tambe ta keda aproba. Hues a bisa cu e lo pone medida di pago. E placanan confisca di I.A.C. y L.E.C. cu ta algo mas cu 7 mil florin lo no keda confisca manera Fiscal a exigi. Hues a bisa cu di e placa aki, 600 florin lo debolbe e supermercado y 7200 florin na v.H.
CASTIGO
Hues a condena P.L.D. na 9 aña di prison, kitando e tempo cu e ta sera den KIA. I.A.C. a wordo condena na 6 aña di prison, kitando e tempo cu e ta sera den KIA. L.E.C. a wordo condena na 4 aña di prison, kitando e tempo cu e ta sera den KIA. J.F.G. a wordo condena na 2 aña y 6 luna di prison, kitando e tempo cu e ta sera den KIA.
