Castigo pisa!
ORANJESTAD (ANA): E homber Jonathan K. di 25 aña, Diabierna mainta a scucha Fiscal exigi 11 aña di prison p’e. Fiscal ta haya Jonathan K. culpabel di a purba mata un agente di Polis, menaza dos persona cu un arma y posesion di arma di candela.
Tur e incidentenan aki a sosode Diadomingo marduga dia 1 Mei 2022. Hues a mustra cu Jonathan K. a lastra un agente di Polis, M. na banda di e auto riba un distancia largo y despues a dal contra un palo di luz. Den sala di Corte tabata presente familiarnan di Jonathan K. y e agente di Polis, M. hunto cu un otro colega y su pareha.
Purba mata Polis: Hues a mustra cu ora e agente M. a wanta e auto pa ordena Jonathan K. pa para, Jonathan K. a sigui core lastr’e y despues a dal contra un palo di luz y agente a resulta herida. Jonathan K. a desmenti. El a bisa Hues cu e tabata cu dos amigo ta trip y bebe. Un dado momento un auto brake, G. y un otro a discuti cu un amigo. El a sali pa stop e discusion pa sigui trip.
Segun Jonathan K. el a subi auto pa bay cas, y aki ta unda Polis a par’e y puntr’e cu si e tin arma di candela. E momento ey el a realiza cu e tin un arma y a pensa cu e no kier bay sera. El a start e auto back y primi trot. E momento ey e agente di Polis M. a coy stuur tene. Na dado momento e auto a dal contra acera y e agente a cay y e auto a bay dal contra un palo di luz. Segun Jonathan K., el a spanta y a sigui core bay. E no sa con el a yega cas.
Segun Jonathan K., ningun momento tabata su intension causa daño na e agente di Polis. Hues a remarca cu Jonathan K. a primi trot mientras cu e agente di Polis tin su man hinca den auto. Segun Jonathan K., e momento ey e no a pensa. E tabata hopi burachi.
Agente di polis a kibra man: Hues a bisa cu segun e agente M., ta Jonathan K. a gara su man y primi trot. Jonathan K. a bisa Hues cu e ta hura cu esey no ta berdad. Hues a bisa cu segun e agente e kier a coy e yabi di auto pero no a logra. El a sinti con Jonathan K. a gara su man gara y primi trot y bay riba un palo di luz.
Na un dado momento Jonathan K. a cuminsa stuur auto cu su dos mannan. Net promer cu el a dal contra palo di luz, e agente di Polis a los. Segun Jonathan K., e agente a tene e stuur di auto. E ta haya cu e agente por a lag’e bay y despues sigui su tras. Na opinion di Jonathan K., e agente a pone su bida y esun di Jonathan K. na peliger. Hues a mustra cu e agente M. a kibra su man na un forma hopi fastioso.
Posesion di arma: Hues a bisa cu Jonathan K. tabatin un revolver cu bala. Jonathan K. a admiti di tabatin e arma den auto. Despues Polis a haya e auto pero Jonathan K. no tabata tey. Un periodista a mustra Polis cu tabatin un arma benta na banda di caminda. Jonathan K. a bisa cu e no ta corda pero e arma ta di dje.
E auto su tire a rementa despues di a dal contra acera. Segun Jonathan K., e arma no ta di dje pero tabata den e auto. E no kier bisa di kende e arma ta pa no haya problema. El a bisa cu algun dia so e tabatin e arma.
Hues a bisa cu tin hende ta papia cu Jonathan K. lo tabata envolvi den un tiramento. Abogado mr. Carlo a reclama cu e acusacion ta papia di 1 Mei 2022 posecion di arma y nada mas. Hues a bisa cu e kier sa cuanto tempo Jonathan K. tabatin e arma.
Menaza dos hende: Hues a bisa cu na un club nocturno, Upstairs na The Village Mall, Jonathan K. a menaza 2 persona. Jonathan K. a splica cu e cu dos amigo tabata trip. Un auto a brake y e homber G. tabata discuti cu un otro persona. El a baha pa calma e asunto y despues a sigui bay. Nan a bay den Upstairs y eynan el a topa e homber G. atrobe. El a bisa Hues cu el a bisa G. cu e no conoce y pa evita problema. E homber G. a dal’e cu un boter na su boca. Jonathan K. a baha trapi tur rabia y a bolbe subi cu un arma pa topa cu G. pa spant’e pero G. no tabata tey mas.
Hues a bisa cu segun G., el a mira Jonathan K. subi flanel y el a mira e revolver. Jonathan K. a bisa Hues cu G. ta gaña pasobra e no tabatin e revolver cun’e. El a bisa cu e otro persona cu tabata cu G., a bisa cu ta un otro persona cu cabey rasta, a lanta flanel y mustra e revolver. Hues a bisa cu ta berdad. Despues Jonathan K. a haya e arma y a mustra e otro persona P. esaki. El a bisa cu e ora ey G. a bay caba.
Hues a bisa cu e personanan a declara cu Jonathan K. a laga sa cu e lo tira G. mata. Segun Jonathan K. e no a bisa nada. El a bisa cu e tabata rabia pasobra G. a dal’e cu boter na su boca y a bay pa spant’e cu e arma cu el a haya for di un amigo.
Hues a mustra cu Jonathan K. no mucho tempo pasa a worde condena na 4 luna di prison pa violencia. Tambe cu Jonathan K. a haya condena di 3 aña di prison pa un atraco.
Demanda di polis: Ta asina cu e agente M. a haci un demanda di daño total di 50 mil Florin. E agente a splica Hues cu el a haci ya caba 2 operacion y aki un aña, e lo mester haci otro operacion pa kita e plachinan y schroefnan na su man. Tambe mester wak con su curpa ta recupera di slanan cu el a sufri na pia. Te ainda no ta trahando. E no ta sigur si su man robez lo ta funciona completo.
Ainda falta e di tres operacion. El a bisa cu lo bay cuminsa traha back e luna aki, pero e lo no por bay traha riba caya sino paden. Segun M. el a keda mental afecta. No por bisa con e lo por sigui traha. E tin pensa cu e lo mester bay papia cu un psycologo. E tabata hopi depresivo.
Cana cu arma den club nocturno: Fiscal a bisa cu e ta haya legalmente proba menaza cu arma di candela di e hombernan G. y P. den club nocturno. Tabatin un incidente dilanti di e club nocturno y despues problema den e club nocturno. El a mustra cu P. a bisa cu Jonathan K. cu arma den man a puntra unda G. ta. Jonathan K. a busca e arma pa bay menaza G., despues cu G. a dal’e cu boter na boca.
Fiscal a remarca cu esey no ta forma di ta cana den un club nocturno cu un arma. El a sigui bisa cu Jonathan K. ta desmenti cu e arma ta di dje pero ta admiti di tabatin e arma cun’e.
Agente di Polis lastra 98 meter: Fiscal a cuestiona e forma con e agente di Polis a worde herida. El a bisa cu nan a actua despues di cu a haya notificacion cu tabatin un problema. A para Jonathan K. y ora a puntr’e si e tin arma, el a start auto y primi trot mientras cu agente M. a keda wanta na e auto ora e tabata kier a kita switch. Despues di a worde lastra un distancia di 98 meter, el a logra los. E auto a dal contra acera, dal contra un palo di lus y core bay.
- a tapa su cara cu man robez promer cu el a dal contra e palo di luz. Despues a haya e auto cu tire rementa y e arma benta un banda. Jonathan K. no tabata tey. Fiscal ta haya cu Jonathan K. kier a mata e agente di Polis. E ta haya cu ta Jonathan K. mes a hinca su mes den e situacion aki. Fiscal a señala cu Jonathan K. tin un carchi di castigo alarmante.
Fiscal a pidi pa confisca e auto cu Jonathan K. a usa como un arma y saca e arma di candela for di circulacion.
Pa loke ta e demanda di e agente M., cu ta alrededor di 50 mil Florin, Fiscal a bisa cu e agente no ta trahando y e no por exigi demanda pa cobra pa overtime pero si oranan di trabao. Fiscal a pidi pa aproba 5 mil Florin di daño material. El a bisa cu M. lo por cuminsa un caso civil pa haya e resto. E parti inmaterial, cu ta encera e man fractura y problema mental, Fiscal ta haya cu por aproba e 21 mil Florin. El a exigi pa aplica medida di pago y si Jonathan K. no paga, e lo mester bay 1 aña sera den prison.
Exigencia di Fiscal: Fiscal a mustra cu e agente di M. a resulta herida durante haciendo su trabao. Ningun momento por a spera cu algo asina lo sosode. Esaki a sacodi comunidad y a crea sentido di inseguridad. Esaki a sacodi Cuerpo Policial. Fiscal ta haya cu mester baha cu man duro contra esun cu ta actua contra trabao di Polis. E ta considera Jonathan K. un residivista di arma di candela. Fiscal a exigi 11 aña di prison.
Defensa di Abogado: Abogado mr. Carlo a bisa Hues cu Jonathan K. no tabatin arma den e club nocturno. Ta despues di cu G. a dal’e cu boter na boca, el a baha abao busca un arma di un otro persona pa bay spanta G. Despues di a sali for di e club nocturno, el a worde para door di Polis. El a para e auto y ora Polis a puntr’e si e tabatin arma, el a realisa cu e no a duna e persona e arma back. E ora ey el a start e auto pa core bay. E agente a tene e stuur y bira na man robez y Jonathan K. a bira na man drechi pa desvia pa no dal contra un muraya. E agente a los y dal contra un palo di luz.
E abogado a bisa Hues cu e no ta kere cu ta manera e agente ta bisa cu ta Jonathan K. a tene su man. Na opinion di mr. Carlo, esaki ta un accidente causa door di e luchamento na e stuur. E no ta haya cu por papia aki di cu Jonathan K. a purba mata e agente di Polis. El a menciona leynan penal caminda e ta mustra cu no por papia di intento di mata. El a bisa tambe cu no tin raport di dokter cu ta mustra cu ta herida severo.
E abogado ta haya cu e demanda di daño material mester worde declara no admisibel pasobra no tin ningun splicacion di dañonan. E ta haya cu e agente mester cuminsa un caso civil y no den un caso penal.
Hues a sera tratamento di e caso y dia 4 November 2022 lo tin sentencia.
