ORANJESTAD (AAN): Diabierna mainta e homber J.S.(19), via video conference a scucha su sentencia den un caso di tiramento.
E ta wordo acusa di intento di asesinato riba 25 April 2022 dilanti Jokers Night Club. El a tira diferente biaha riba diferente hende. Hues a confirma e exigencia di Fiscal esta 5 aña di prison.
Tabatin un evento di rap 25 April 2022 pa gangnan sera paz cu otro. A resulta cu tabatin pelea y tiramento pafor di e night club. J.S. ta wordo acusa di intencionalmente a tira riba e hombernan d S. y B. cu tabata scondi tras di e auto riba cual J.S. a tira. Tambe e ta wordo acusa di posecion di arma di candela. Den sala di Corte di Husticia a pasa e video di seguridad caminda por mira J.S. den e club nocturno y despues por mir’e cla cla cu despues di evento, J.S. ta tira diferente biaha mientras cu tabatin hopi hende tur rond.
Fiscal: Tratamento di e caso a sosode 30 September 2022, caminda Fiscal a bisa Hues cu e ta haya J.S. culpable di intento di mata. El a mustra cu tabatin hopi hende riba caminda e momento ey y e tiramento a sosode den zona habita. Fiscal a mustra cu net tras di e auto riba cual J.S. a tira, tin cas. Danki Dios ningun hende a muri y un hende a resulta herida na su man.
Arma di candela un problema serio: Fiscal a mustra cu arma di candela ta un problema serio na Aruba. El a mustra cu tabatin caso di tiramento entre gang di Bushiri y Jaburibari. Aña pasa tabatin e caso lamentable caminda un dama hoben a wordo tira mata. Pa cu e castigo, Fiscal a bisa cu e ta tene cuenta cu ta promer biaha cu J.S. ta cay den man di husticia pa un delito asina y cu e ta hopi jong. Fiscal a tuma na malo cu J.S. ta desmenti di a tira. El a exigi 5 aña di prison.
Sentencia: Hues a bisa cu e ta haya legalmente proba cu riba 25 April 2022, J.S. a purba mata hende door di tira diferente biaha riba diferente hende y tambe Hues ta haya J.S. culpable di posecion di arma di candela.
Pa cu e castigo Hues a tene na cuenta cu J.S. a tira diferente biaha riba hende. Na opinion di Hues, por papia di suerte cu ningun hende a resulta herida. E tiramento a sosode riba lugar publico. Hues ta haya cu e acusado no a demostra ningun momento cu e ta realisa cu el a pone bida di otronan na peliger. El a bisa tambe cu e hecho aki a causa un shock y panico den comunidad.
Hues a sigui bisa cu ta conoci cu victimanan di tiramento por keda pa basta tempo afecta. Hues a bolbe enfatisa cu usamento di arma di candela ta crea inseguridad y miedo den comunidad.
Castigo: El a tene cuenta tambe cu J.S. su edad hoben y cu ta promer biaha cu el a cay den man di husticia pa un delito asina. Hues a bisa tambe cu e ta tene cuenta cu J.S. tabata desmenti cu el a tira. Hues a confirma e exigencia di Fiscal y a condena J.S. na 5 aña di prison, kitando e tempo cu e ta sera den KIA.
