ORANJESTAD (AAN) – Ministerio Publico hunto cu Corte di Husticia a planea un dia pa asina trata e cantidad di casonan penal cu Ministerio Publico a cuminsa contra 19 hende cu a viola e toque de queda.
DIA SPECIAL PA E CASONAN
Informacion cu DIARIO tin ta mustra cu casonan aki ta di Maart 2020, April 2020 y Mei 2020. Mirando e cantidad di hendenan, na Corte di Husticia a planea un dia separa for di e dianan di casonan penal, pa asina atende e casonan aki.
Manera ta conoci, Ministerio Publico a duna un periodo pa asina esnan cu kier paga e multa di 1000 florin, por paga esaki. Hopi biaha, teniendo cuenta cu e situacion actual, por yega na un areglo di pago. Door cu tin hendenan no a bay Ministerio Publico pa paga, awor Ministerio Publico ta cuminsa un caso penal contra nan.
VIOLA DOS BIAHA
Ta asina cu tin 5 di e hendenan ta wordo persigui pa a haci dos biaha e violacion di toque de queda. Tin cu a haci uno den Maart 2020 y otro den April 2020. Tambe tin casonan caminda tin hende den e mesun luna esta April 2020 y tambe Mei 2020 a haci e violacion dos biaha.
PONE SALUD NA PELIGER
Recientemente den un caso di droga, tabatin un di e acusadonan cu tambe a wordo persigui pa viola toque de queda. Hues den su evaluacion di e caso a bisa cu e ta tene cuenta cu esnan cu ta viola e toque de queda ta poniendo salud di henter un comunidad na peliger.
Den mayoria di e casonan di viola toque de queda, Hues di Corte di Husticia ta tene debido cuenta cu e situacion actual cu e pandemia Covid ta causando caminda un gran cantidad di hende ta sin trabao. Envez di castigo di 1000 florin di multa, tanto Ministerio Publico como Corte di Husticia a opta pa duna castigo di trabao pa comunidad.
Lo ta interesante pa sa con Ministerio Publico y Hues di Corte di Husticia lo bay actua riba esnan cu a viola e toque de queda mas biaha. Lo ta bay tin mas dianan asina planea pasobra ainda falta e otro casonan di aña pasa y e aña aki.
