Hof a rechaza keho di abogado di Gobierno contra Hues
- Caso di FPNA vs. Gobierno y JOB Holding Management por sigui
- Un solo ‘remarke’ di Hues a crea mesora hopi duda
ORANJESTAD (AAN): Hof di Corte Superior riba Dialuna a tuma decision den e procedura di keho di parti di abogado di Gobierno, mr. Emerencia, contra e Hues cu tabata trata e caso sumario cu Fundacion Parke Nacional Aruba (FPNA) a cuminsa contra Gobierno di Aruba y J.O.B. Holding Management V.B.A. (JOB).
E caso sumario ta relaciona e prohibicion cu FPNA ta exigi pa Gobierno no prolonga e tereno “erfpacht” di Isla di Oro cu lo mester caduca 14 Februari 2026.
Discusion den Corte: Durante tratamento di e caso sumario 5 April 2024, Hues a puntra e abogado di Gobierno si Gobierno lo bay atene su mes na caduca e erfpacht riba 14 Februari 2026. E abogado di Gobierno a reacciona cu Gobierno tin e derecho di tuma decision si ta caduca of prolonga.
Riba esey, Hues a remarca cu el a yega di atende varios caso caminda Gobierno no ta mantene su mes na decisionnan haci. Ariba e remarke aki, e abogado di Gobierno a keha e Hues pasobra e ta haya cu ya e Hues a duna di conoce kico su opinion ta di e caso.
Hof a trata e keho: Relaciona cu e keho, tres Hues cu ta forma Hof a atende e caso, caminda a scucha e abogado di Gobierno y e otro partidonan tambe tabata presente.
Hof ta rechaza keho contra Hues: Dialuna Hof a duna di conoce su decision caminda e ta rechaza e keho di Gobierno contra Hues. Hof ta haya cu e remarke di Hues no ta mustra cu el a tuma un decision. Hof a instrui pa sigui cu e tratamento di e caso sumario manera e tabata.
