Den caso di militar cu a ocasiona accidente fatal
ORANJESTAD (AAN): Manera DIARIO a publica, diahuebs tabatin e caso penal contra e Arubiano militar K.F.V. di 22 aña, kende ta wordo acusa cu riba 14 Juli 2023 a ocasiona un accidente fatal den Havenstraat cu consecuencia cu e homber M. Ruiz conoci como ‘Hawa’ a fayece.
DIARIO a publica un articulo cu tratamento di e caso y den e articulo aki ta publica e defensa di abogado mr. J.Tromp.
Fiscal a haya K.F.V. culpabel di a causa e accidente y a exigi 12 luna di prison, 3 aña sin rijbewijs y e auto BMW ta keda confisca.
Marechaussee mester a investiga: Abogado mr. J.Tromp a bisa Hues cu su cliente ta un militar y como tal ta cay bou leynan Hulandes y cu ta Polis Militar (Marechaussee) mester a haci investigacion. E abogado a expresa condolencia na famianan di e fayecido. E abogado a bisa Hues cu e leynan Hulandes ta otro y no por usa e resultado di test di Polis como prueba y mester declara K.F.V. liber. Den e caso aki ta Marechaussee mester a haci investigacionnan y no Polis.
Na opinion di mr. Tromp, e hecho cu Polis no a yama Marechaussee, esaki no por cay pa cuenta di K.F.V. E abogado a bisa Hues cu K.F.V. a bisa Polis cu e ta un militar pero Polis a sigui cu e investigacion.
Fayo di polis: E abogado a mustra cu Polis no a mustra K.F.V. su derecho pa bolbe haci test di cantidad di alcohol den rosea, pasobra e no ta di acuerdo cu e resultado. E ta haya cu Polis a faya den su obligacion. K.F.V. tabata haya cu e tabata den condicion pa core auto. E abogado a bisa Hues cu normal ta asina cu Polis ta describi e estado di e chofer.
Den e caso aki, Polis no ta bisa cu el a mira cu K.F.V. su wowonan ta core awa, e ta papia pisa, actua straño. Tampoco esnan cu tabata cun’e den auto, a bisa esey y cu e no tabata den estado pa core auto. E ta haya cu mester declara K.F.V. liber di e acusacion cu e tabata bou influencia di alcohol. E abogado ta haya cu no por prueba legalmente cu K.F.V. tabata core burachi. No por bisa cu ta door di influencia di alcohol, K.F.V. a ocasiona e accidente.
No tabatin pustamento: Na opinion di abogado, investigacion di Polis mes ta mustra cu K.F.V., cu excepcion di pasamento di un auto riba Boulevard, no tabata core cu velocidad halto y tampoco e Suzuki. E abogado ta haya cu no por papia cu tabatin pustamento di auto.
No sa kico exactamente a sosode: No ta asina cu K.F.V. a kita na man robez y dal contra e Suzuki. E tabata core riba e parti drechi di e caminda banda robez. E abogado ta haya cu no por bay condena K.F.V. riba e pensamento cu posiblemente K.F.V. a core riba e rail di Tram.
E abogado a bisa Hues cu no por bisa cu seguridad kico exactamente a sosode. Por tin otro posibilidadnan cu no por exclui. El a mustra cu den e procesverbaal di Polis ta papia di un tipo di investigacion cu lo mester a haci, pero esaki no a sosode.
E abogado a mustra riba diferente scenario cu por a ocasiona e accidente. El a mustra cu e chofer di e Suzuki lo por a perde control ora el a core riba e rail di Tram cu a pone e auto slip. E ta haya cu tin mucho duda kico realmente a pasa. E abogado ta haya cu mester declara K.F.V. liber.
Mr. Tromp a sigui bisa cu si Hues tog ta haya K.F.V. culpable, el a pidi un castigo condicional of trabao pa comunidad. El a mustra riba un sentencia di Corte den un caso similar caminda a duna trabao comunitario como castigo.
E abogado a bisa Hues cu K.F.V. ta lamenta loke a sosode y ta expresa condolencia na famia di e fayecido. Pa loke ta demanda di daño, e abogado ta haya cu hopi di e demandanan no tin relacion directo cu e fayecido. E abogado ta haya cu lo ta mihor pa haci un caso civil y declara e demanda no admisibel. E abogado tambe a pidi Hues pa debolbe e BMW 116i Hatchback na K.F.V. y pa no kita su rijbewijs pasobra e mester di su auto pa e sigui traha den cuartel militar.
Hues a sera tratamento di e caso y a bisa cu 2 Mei lo tin sentencia.
