Homber D. a scucha su sentencia...
ORANJESTAD (AAN): Diabierna mainta e homber di inicial D. di 57 aña di Colombia, biba na Aruba, a presenta den sala di Corte pa scucha su sentencia.
Luna pasa tratamento di e caso a tuma lugar caminda Fiscal a exigi 6 aña di prison pa D., kende Fiscal ta haya culpabel di a abusa di dos mucha, M. y K. tempo e muchanan tabatin 8 pa 9 aña. Awor M. y K. tin 15 pa 16 aña.
Fiscal: Luna pasa Fiscal a bisa cu e ta acusa D. di abuso di e muchanan M. y K. entre 2015 y 2018. Ta asina cu D. ta desmenti. Fiscal ta haya cu pa satisface su gusto D., a abusa di e muchanan sin pensa ki consecuencia esaki tin pa e muchanan.
Fiscal a bisa cu na cas di e wela di e muchanan, unda e muchanan mester sinti nan mes sigur, D. tabata abusa di nan. Na opinion di Fiscal, esaki a afecta e muchanan cu lo por laga nan keda afecta. Fiscal a bisa cu comunidad ta preocupa cu casonan di abuso. Den e caso aki ta durante un periodo largo a abusa di dos mucha menor di edad. Fiscal a exigi 6 aña di prison.
Sentencia: Riba Diabierna mainta Hues a bisa cu mescos cu Fiscal y abogado, e no ta haya proba cu tabatin penetracion di e muchanan. Hues a declara D. liber di esey.
Hues a sigui bisa cu e ta haya legalmente proba cu D. a haci actonan inmoral cu e muchanan. Tambe cu D. a forza e dos muchanan di tene relacion cu otro. Hues a bisa cu e ta kere declaracion di e muchanan. El a bisa cu e dos muchanan nan declaracion ta mustra con D. a haci cu nan. Hues a bisa cu e hecho cu tin diferencia den declaracion no ta kita cu nan ta mustra kico a sosode di abuso.
Hues a sigui bisa cu e no ta mira motibo cu e muchanan a formula storia contra D., manera D. ta bisa. Hues ta haya cu tin prueba di sosten. Ademas e omo di K. a mira con e acusado D. tabata frega riba K. den cushina. Hues a rechaza e defensa cu no tin suficiente prueba.
Castigo: Pa cu e castigo, Hues a bisa cu e ta tene cuenta cu pa un periodo largo, D. a abusa di e muchanan. Hues ta haya cu D. a abusa di e confianza cu e muchanan mester tin den dje como e pareha di nan wela. Hues a bisa cu e ta tene cuenta cu sentencianan cu Hof a duna pa casonan similar. Tambe el a tene cuenta cu e edad di e muchanan y e periodo largo cu e abuso tabata sosode. Tur esakinan ta puntonan di peso pa aumenta e castigo.
Hues a condena D. na 5 aña y 6 luna di prison, kitando e tempo cu e ta sera den KIA. Hues a bisa cu e no por tuma un decision riba e cellular cu Polis a confisca cu lo tin pornografia di mucha den dje. Pa loke ta e demanda di daño, Hues a aproba 5 mil Florin y a pone medida di pago. Hues a bisa cu e resto di e demanda ta mucho complica pa trata den un caso penal y pesey ta declara e resto di e demanda no admisibel. Ta keda e chens cu e mayornan lo por cuminsa un caso civil.
