Mama di e victima a pordona e chauffeur promer cu a drenta sala pa scucha sentencia
- Hues no ta haya e chauffeur culpabel di a causa morto di e victima
ORANJESTAD (AAN): Diahuebs mainta e homber J.K. di 32 aña a presenta den sala di Corte pa scucha su sentencia den e lamentable caso di a dal un hoben mata cu auto banda di Euro Kitchen na Solito.
Mama a pordona Chauffeur: Den edificio di Corte a sosode algo cu masha poco ta sosode y a conmove tur cu tabata presente. Ta asina cu e mama di e victima, un dama masha humilde, a yega den e seccion di espera di sala di Corte y a puntra J.K. si e por papia cu ne. E abogado di J.K., mr. Carlo tabata para dilanti J.K. kende ta sinta. E abogado a bisa J.K. pa bay pero el a keda mira kico lo pasa. Por a nota cu J.K. tabata hopi nervioso y a bay para dilanti e señora.
E señora a bisa J.K. cu e no mester tin miedo pasobra e no ta bay haci’e nada. El a pidi J.K. pa dun’e su mannan. J.K. tabata duda hopi y e señora a coy su mannan tene y a bisa J.K., mi ta pordona bo. Bo no tin culpa di loke a sosode. Ta Dios su voluntad. E señora a keda mira J.K. pa un rato. Por a mira cu e palabranan aki a conmove tur hende presente.
Despues di un rato J.K. a bay sinta back y por a nota cu e palabranan di e señora a afect’e. Su wowonan tabata na awa y por a nota cu e no tabata sinti bon. A bisa J.K. cu algo masha grandi a caba di sosode. No ta normal cu un mama ta pordona un persona cu a mata su yiu cu auto. Tabata hopi bunita pa mira con e señora a haci tur esaki.
No culpabel di causa morto: Den sala di Corte, e mama di e victima a bay sinta te dilanti, un stoel na banda di J.K., mientras cu e traductor a sinta meymey pa asina pro traduci pa ambos na Papiamento kico e Hues Hulandes ta bisa. Hues a bisa cu J.K. ta worde acusa di a causa e accidente caminda e hoben homber Sanchez a fayece.
Hues a mustra cu Fiscal ta haya cu ta J.K. a causa accidente y abogado ta haya cu mester declara J.K. liber. Hues ta haya cu J.K. a core entre 50 y 60 km/h riba Kamerlingh Onnestraat caminda ta permiti pa core 80 km/h. Hues no ta haya cu J.K. mester a pone extra atencion pa hendenan cu ta cruza caminda. Tin negoshinan den cercania pero no pega cu caminda sino un poco mas leu.
Hues a sigui bisa cu importante ta tambe cu ta e victima a cruza caminda. E lamentable accidente aki a sosode anochi riba Kamerlingh Onnestraat, banda di e cruzada net despues di Euro Kitchen. E mucha a bay cruza caminda sin paga tino y e Chauffeur J.K. a dal e mucha mata cu auto.
Hues ta conclui cu J.K. a viola un regla di trafico y esey no ta suficiente pa culpa J.K. di a causa di accidente fatal. Hues a declara J.K. liber di a causa morto di e mucha.
No por bisa cu ta glasnan getint: Hues den su sentencia, tambe a duna su opinion riba e cuestionamento di Fiscal cu J.K. tabata core auto cu glasnan getint. Hues a bisa cu e pregunta ta si realmente e glasnan getint a contribui na e accidente aki. Na opinion di Hues, no por conclui esey. Lo mester haci mas investigacion pa determina si e coremento di auto cu glasnan getint, a yuda causa e accidente.
Sentencia: Hues ta conclui cu J.K. a viola un regla di trafico y esey no ta suficiente pa culpa J.K. di a causa e accidente fatal. Hues a declara J.K. liber di a causa morto di e mucha Sanchez.
Hues a bisa cu e ta haya J.K. culpable di e acusacion subsidiario esta di a core y dal e mucha mata. Hues a sigui bisa cu esey ta haci cu e castigo exigi cu Fiscal a exigi, no ta valido. Hues a condena J.K. na 30 ora di trabao pa comunidad y si no cumpli cu esaki, e lo mester bay 15 dia sera.
Hues tambe a condena J.K. pa paga daño per huicio. Di e demanda cu e mama a presenta, Hues a honra 8.710 Florin cu J.K. lo mester bay paga. Hues a bisa cu e resto di demanda ta mucho complica pa atende den un caso penal. E ta declara esey no admisibel y e señora mama lo por cuminsa un caso civil si e ta desea.
Hues a ordena tambe pa debolbe J.K. su auto bek.
