ORANJESTAD (AAN): Awe Hues ta dicta sentencia den e caso di asesinato cruel na Brazil caminda Pascual Brown (22) a bay na caso di su amigo Richi Henao Tavarez (20) y tir’e mata.
E lamentable incidente aki a sosode 12 di April 2021, caminda Richi tabata sinta den veranda hunto cu su pareha y Brown a yega tir’e den cabez.
Tratamente di e caso aki a sosode luna pasa caminda tin un raport di psychiater cu ta mustra cu Brown ta sufri di problema mental. Fiscal ta haya cu esey no ta motibo pa bisa cu Brown no ta culpable.
Fiscal a bisa Hues cu e ta haya cu premedita Brown a tira mata Richi. El a mustra cu Brown a sali for di Playa bay te Brazil. Na caminda el a haya un arma di candela. A dura 15 minuut promer cu el a yega na e cas. Fiscal ta haya cu Brown tabatin tur tempo pa para y bay bek. El a bay scondi na e cas pa no wordo mira. El a tira Richi mata y gebuk a core bay bek den auto.
Fiscal ta haya cu esaki ta un ehempel di asesinato sanger friu. El a señala cu tanto na Polis como den Corte, Brown tabata duna declaracion cu no ta cuadra cu e berdad.
Esey ta mustra cu e tabata sa cu el a haci malo y ta purba sconde esey. Na opinion di Fiscal, Brown a mata Richi lagando atras un mucha chikito. Fiscal ta tuma Brown na malo pa loke el a haci.
El a mustra cu Brown mes a bisa cu el a mira cu e partner di Richi a mir’e pero asina mes el a tira. Fiscal a remarca cu Brown no a mustra cu ta duel’e loke el a haci. Teniendo cuenta cu e raport di psychiater, el a exigi 16 aña di prison. DIARIO lo informa lectornan kico ta e decision di Hues.
