E mucha di 16 aña a haya castigo combina
ORANJESTAD (AAN): Diabierna mainta e hombernan I.K.(23), J.K. (21) y e mucha D.J.(16) via video conference a scucha nan sentencia. E acusacionnan contra e trio aki ta cu riba 2 Mei 2022, nan a purba mata diferente persona y tabata den posesion di arma di candela. Fiscal ta haya cu ta I.K. ta esun cu a tira riba e cas na Pos Chiquito, caminda tres persona tabata na e cas.
EXIGENCIA DI FISCAL
Algun siman pasa tratamento di e caso a tuma lugar caminda Fiscal a exigi pa J.K., 18 luna di prison di cual 6 luna ta condicional y 3 aña di prueba.
Pa D.J., Fiscal ta haya cu mester tene cuenta cu e tabata menor di edad, 15 aña. Remarcabel ta cu sentencianan anterior no a yuda. Fiscal ta haya cu mester pone guia di Reclassering. Fiscal a exigi castigo hubenil di 18 luna di prison di cual 6 luna ta condicional cu 2 aña di prueba.
Fiscal a bisa cu pa I.K. e cos ta diferente. Drive by shooting riba un grupo di hende y mucha cu no tin nada di haci cu e asunto, ta hopi serio. Fiscal ta haya cu mester manda señal bon cla contra drive by shooting. El a exigi 10 aña di prison y pa ehecuta e 5 luna condicional pendiente.
SENTENCIA
Hues via video conference a bisa cu e ta haya legalmente proba e acusacion di tabatin arma di candela. Hues a bisa cu e ta haya cu e trio aki hunto tabatin arma di candela y bala. Hues a reacciona riba e defensa di abogado di J.K., kende a bisa cu e arma cu J.K. a cumpra no ta traha. Hues a bisa cu esey no ta relevante. Tampoco no ta relevante cu no a haya I.K. y D.J. cu arma. Pa cu D.J., Hues a bisa cu e ta haya legalmente proba e asalto riba un homber caminda D.J. a bay cu un grinder y marihuana.
ARMA TA TRECE INSEGURIDAD DEN PUEBLO
Constantemente por scucha Hues di Corte di Husticia ta mustra cu posesion di arma di candela, ta un delito hopi serio. Arma di candela ta trece inseguridad den pueblo. El a mustra cu dia 2 Mei 2022 a uza arma y danki Dios ningun hende a resulta herida.
CASTIGO COMBINA PA MUCHA
Hues a bisa cu e ta tene cuenta cu D.J. tabatin 15 aña dia cu e tiramento a sosode. Esey ta haci cu mester uza castigo hubenil. Hues tambe a tene cuenta cu raport di Reclassering pa D.J. Pa J.K., kende ta ruman di I.K., Hues a bisa cu e tabatin arma di candela. Hues a condena D.J. y J.K. na 18 luna di prison di cual 6 luna ta condicional cu un tempo di prueba di 3 aña. Hues bisa cu pa D.J. e ta pone e condicion cu D.J. mester cay bou guia di Reclassering.
NO KERE DECLARACION DI ACUSADO
Pa loke ta I.K., Hues a bisa cu e ta haya legalmente proba cu dia 2 Mei 2022, I.K. a tira diferente biaha riba un cas na Pos Chikito. Hues a splica cu riba e video di seguridad por a mira cu e casnan ta hopi pega cu otro y cu hendenan ta para den cura mes papia cu otro. El a bisa cu den Corte durante cu a pasa e video di seguridad, por a mira un auto pasa dilanti e cas cu bentana habri. Un braza color cla a sali y los tironan. Un tiro a dal contra un auto para ey banda. Un bala a dal den un cas tambe. Hues a mustra cu tin 4 persona a declara cu ta e chofer ta esun cu a tira. Tres di e testigonan a reconoce I.K. como esun cu a tira y tabata core e auto. I.K. a bisa cu e tabata core e auto. Esnan den auto, esta J.K. y D.J., a bisa cu ta I.K. a tira. I.K. ta bisa cu ta D.J. a tira. Na opinion di Hues, e no ta kere I.K. pasobra D.J. ta color scur y no ta un braza color scur a mira sino un braza color cla.
Hues a sigui bisa cu e no tin ningun motibo pa duda den declaracion di e testigonan. Riba dje tin video riba cellular di I.K. caminda ta scucha I.K. bisa cu el a caba los 4 tiro riba cas na Pos Chikito. Hues a mustra cu un bisiña cu tabata papiando cu e otro bisiña, a bisa cu un tiro a dal den su cas. Ta un drive by shooting a sosode.
Hues a bisa cu mescos cu Fiscal, e no ta haya proba intento asesinato. Si e ta haya proba intento di mata, mas biaha haci. Na opinion di Hues, tur hende sa cu tira den direccion di hendenan, nan por resulta herida y por muri. Sabiendo esey, tog I.K. a tira.
HENDE MESTER SINTI SIGUR NA SU CAS
Hues a remarca cu door di tiramento, hende no por sinti sigur na cas ta papia cu bisiña. Hues a enfatisa cu bo mester por sinti bo sigur unda cu bo ta, especialmente den bo cas. Aruba mester ta un isla safe pa tur hende. Hendenan por keda traumatisa cu tiramento.
8 AÑA PA TIRA RIBA CAS
Pa cu e castigo di I.K., caminda a bisa cu e ta tene cuenta cu den pasado caba I.K. a haya castigo pa maltrato severo y tog a sigui. El a haci e tiramento den su tempo di prueba. Hues a condena I.K. na 8 aña di prison y ta aproba e exigencia di Fiscal pa ehecuta e 5 luna di prison condicional. Esey ta nifica cu en total I.K. a haya 8 aña y 5 luna di prison.
Pa loke ta e demanda di daño di parti di mama di Ignacio, Hues a bisa cu e ta aproba e 500 florin pa daño inmaterial. Pa e daño material di pasashi pa a bay Hulanda, Hues a rechaza esaki.
