ORANJESTAD (AAN): E muher Jamaquino V.B.’(6) a scucha Hues confirma e exigencia di Fiscal esta 18 luna di prison, di cual 8 luna ta condicional.
MUHER A BISA POLIS CU E TIN DROGA DEN CAS
Hues a mustra cu V.B. a bisa cu e tabata haciendo cabey na Februari 2022 pa un persona y ora Polis a yega, el a bisa nan cu tin droga den cas. El a mustra cu den un camber cu el a huur un persona, a haya marihuana. Nan a detene y hib’e warda di Polis. Despues nan a bay sigui investiga e cas.
Hues a bisa cu e patruya tabata den vecindario y a mira movecionnan sospechoso. A mira dos auto para banda di otro. E auto para meymey caminda, e porta tabata habri. A mira un conoci di Polis, adicto, B., para banda di e otro auto. E chofer di e otro auto ta C. A mira B. duna C. placa. A sospecha cu aki lo ta trata di bendemento di droga. A dicidi di detene nan dos. Patras di un auto tabata sinta V.B., kende ta un conoci bendedor di droga y a detene tur tres. E ora ey V.B. a bisa nan cu e tin marihuana den su cas.
Segun Polis, V.B. a duna permiso pa drenta den su camber. E cas tin 3 camber. Den un di e cambernan, riba un cashi a haya un saco cu marihuana. Tambe a haya un balansa y pochi cu placa. Tambe a haya riba e cama un tas cu un bloki di marihuana.
En total e droganan a pisa 194,4 gram ta e bloki y ariba e cashi 1,4 gram. V.B. ta bisa cu esey no ta su camber sino e camber cu el a huur na un persona. Ta asina cu relaciona cu esaki, a dicidi di scucha e agentenan den Corte.
SCUCHA AGENTENAN
A dicidi di scucha e agentenan di Polis cu a haci investigacion. Fiscal a haci preguntanan na e agente G. E agente a splica cu V.B. no tabata vlecht cabey pa hende. Segun e agente, V.B. a bisa cu e tabatin marihuana den su cas. Agente S. tambe a splica con e investigacion a tuma lugar y cu e tabata dirigi e investigacion.
Agente M. tambe a splica con e investigacion a sosode. E tambe a bisa cu no tabatin ningun hende serca V.B. Hues despues a puntra V.B. y el a bisa cu e camber no ta di dje sino di otro hende. El a splica cu e dia ey net el a caba di vlecht cabey pa un homber y e homber a pag’e. E momento ey Polis a yega.
FISCAL
Fiscal ta haya cu a base di declaracionnan di testigonan, e ta conclui cu entre 2019 y 2022, V.B. tabata bende marihuana. V.B. ta wordo yama Sunshine. Despues di a scucha e agentenan, por conclui cu e detencion tabata legal.
Fiscal a splica cu e ta un procedura cu ora yega na un situacion, ta detene tur esnan eybanda pa determina kico realmente a sosode. Despues ta laga otronan cu no tin nada di haci cu e caso bay. Ta V.B. mes a bisa cu e tin marihuana na su cas y a mustra Polis cu e marihuana tabata den su camber. Fiscal a remarca cu si tabatin un persona ta vlecht cabey serca V.B., e tambe lo a wordo deteni. Esey no a sosode pasobra no tabatin hende. 195,8 gram di marihuana a keda confisca y ta destina pa bende. Fiscal ta considera esaki posecion di droga y bendemento.
Pa cu castigo el a tene cuenta cu ta promer biaha cu V.B. a cay sera y tin raport psycologo ta mustra cu e tin masha poco problema mental. Fiscal ta haya cu lo ta bon pa V.B. haya ayudo di Reclasering. Fiscal a exigi 18 luna di prison di cual 8 luna ta condicional cu un tempo di prueba 2 aña y bou guia di Reclasering. E balansa y placa lo mester keda confisca. E droga mester worde destrui.
ABOGADO
Mr. Griffith a bisa Hues cu e detencion no tabata legal. E ta haya cu mester tabatin un motibo di sospecho pero e no ta haya cu e agentenan a splica cu e forma di actua di V.B ta hustifica e detencion. Na opinion di e abogado, e agentenan ta menciona cu tras di e auto tabata sinta e conoci bendedor di droga V.B. Den Corte e agentenan no a menciona esey. Pesey e ta haya cu e detencion tabata ilegal.
A base di esey, tur e otro pruebanan ta ilegal. E abogado ta haya cu mester declara V.B. liber. El a sigui bisa cu no tin suficiente prueba cu ta mustra cu realmente V.B. tabata bende pa 3 aña largo. Tur e 5 testigonan a duna declaracion diferente. Ningun ta menciona e mesun periodo. El a pidi Hues pa debolbe e placa pasobra ta placa cu V.B. a gana door di vlecht cabey.
SENTENCIA
Hues a sera tratamento di e caso y a bisa cu ta dicta sentencia di biaha. Hues ta haya cu e detencion di V.B. no ta ilegal. Hues a bisa cu V.B. ta duna un declaracion y despues ta resulta otro. Mirando cu tabatin un transaccion di droga tabata tumando lugar y V.B. tabata sinta ey banda, esey ta motibo di sospechoso.
Hues a bisa cu ta V.B. mes a bisa Polis cu e tin droga den cas y a mustra Polis unda e droga ta. Hues ta haya legalmente proba cu V.B. tabata bende droga. Hues a conclui cu V.B. tabata bende pa 2 aña. Haya cu V.B. ta responsabel pa e droga haya.
Hues a bisa cu teniendo cuenta cu castigo cu Hof sa duna, e ta haya e castigo exigi pa Fiscal na su lugar. Hues a condena V.B., na 18 luna di prison di cual 8 luna ta condicional cu un tempo di prueba di 2 aña y bao guia di Reclassering. E placa ta keda confisca y e droga mester wordo destrui.
