ORANJESTAD (AAN): E barco Zr.Ms. Friesland lo tuma over e rol di barco di stacion den Region Caribe for di Zr.Ms. Groningen.
E barco di patruya a yega Caribe riba Diadomingo mainta 1 di Februari, y a stop pa un parada cortico na St. Maarten.
Awe Dialuna 2 di Februari, e barco Zr.Ms. Friesland lo nabega drenta Bahia Santa Ana na Willemstad. E barco lo patruya den e region den e proximo lunanan y tambe lo ta cla pa brinda asistencia di emergencia.
Zr.Ms. Groningen a conduci patruya frecuentemente rond di Islanan ABC durante ultimo lunanan. E barco di stacion a sirbi como wowo- y oreanan di Ministerio di Defensa riba laman den Caribe, vigilando e situacion di seguridad den e region. Tambe e barco a sostene Wardacosta di Caribe Hulandes y tabata cla pa brinda asistencia di emergencia. Mescos cu Zr.Ms. Groningen, Zr.Ms. Friesland tambe lo worde acompaña pa un helicopter di atake maritimo NH-90 for di Hulanda pa Caribe. Cu yudansa di un helicopter di atake maritimo, e barco por mira mas leu y reacciona mas lihe.
Marina Real di Hulanda tin cuater barco di patruya di clase “Holland”. E OPV nan aki (Barconan di Patruya riba Oceano-Ocean-Going Patrol Vessels) ta barconan cu por ser ubica na un forma flexibel pa monitor awanan costal. E helicopter di atake marítimo NH90 a regresa riba e barcp pa sostene operacionnan aereo.
Dor di mantene un barco di stacion den e region, Ministerio di Defensa ta contribui na pas y seguridad den Region Caribe.
