YMCA Dakota a ricibi treat di ‘Cupcakes di Speranza’ for di Aruba Bank 

ORANJESTAD (AAN): Aruba Bank a contribui na e iniciativa di “Cupcakes di Speranza” di G.L.W. Foundation dirigi pa Sr. George Winterdaal.

   E meta di e proyecto di e “Cupcakes di Speranza” ta pa yuda e hobencita Janelle Bislik cu donacion pa busca su salud den exterior y cumpra un rolstoel.

   Janelle tin un condicion cu yama Cerreblaire Hypoplastia Atrofie y esey ta nifica cu su celebro chiquito no ta desaroya manera ta y esaki ta afecta su parti motorico dus e no por cana ni papia.

   Cu e compra di e cupcake, Aruba Bank ta contribui pa recauda fondo pa Janelle.

   Riba dia di amor y amistad y pa yuda concientiza comunidad di e proyecto di “Cupcakes di Speranza”, Aruba Bank a haci donacion di cupcakes na tur lider y muchanan di YMCA Dakota.