Distribucion di awa pa Noord y e area hotelero ta sigura
ORANJESTAD (AAN): Dialuna atardi Parlamentario Xiomara Maduro hunto cu colega Parlamentario Endy Croes tabata presente na Alto Vista pa asina por presencia e momento cu e trabaonan haci riba e tanki di awa di WEB Aruba NV a keda cla y traspasa oficialmente na e departamento encarga cu distribucion di awa.
Pa e ocasion importante aki WEB a haci un donacion na Parokia di Noord, y awo Misa Di Alto Vista lo conta cu un conexion gratis di awa. “Un gesto hopi bunita pa tur e fielnan y tur turista cu ta frecuenta e luga sagrado aki,” Maduro ta expresa.
Parlamentario Xiomara Maduro ta felicita y gradici WEB pa e trabaonan importante haci pa sigura bon distribucion di awa den e area di Noord, specialmente den e area hotelero. Ta un proyecto cu sigur ta na bienestar di Aruba su salubridad y economia. Maduro ta gradici tambe e personal amabel cu a duna rondleiding y brinda splicacion di e trabaonan haci na e tanki di awa na Alto Vista.
