Women’s Club of Aruba recordando nan ‘Life Member’ Anna Geerman

ORANJESTAD (AAN): Sabiendo cu Señora Anna tabata lucha cu su salud pa añas caba, asina mes nan no kier a perde e kerida amiga y fiel miembro di Women’s Club of Aruba.

   Anna a keda instala como miembro di nos prestigioso Club na 1982 y desde e tempo ey, Anna a dedica su tempo liber na servicio di e comunidad di su isla stima. Su amor grandi pa nos hendenan di edad avansa a dun’e e oportunidad pa dedica como boluntario yudando den nos comision di Welfare cu den añanan 80/90 tabata tin proyecto pa mucha, esnan special, esnan den hospital, den prison y nos grandinan den cas di anciano.

   Ki dia cu ta Anna tabata bezig ta yuda den e comision di Safe the Earth, bishitando scolnan pa check limpiesa, paso den esey Anna no tabata haci falta.

   Si... y con Anna tabata participa na tur e proyectonan aki, si e mes no tabata core auto? Esaki ta danki na su amiga di curason Mena Anthony. Semper hunto pa por atende nos reunionnan general di miembrecia, reunionnan di tur e comisionnan cu e tabata forma parti di nan.

   E grupo di San Nicolas cu Anna tabata forma parti di dje, semper tabata bay hunto na Cas di nos Grandinan na San Nicolas y tambe na Savaneta pa hunga bingo of yuda cu varios fiesta cu WCA tabata organiza y of sponsor.

   Anna a haci e trabao di boluntario aki cu un amor inmenso, su caracter alegre y gracioso tabata trece felicidad pa esnan cu a conoc’e. E cariño cu e tabata refleha tabata contagioso y tabata laga bo sinti contento y su chistenan di bida tabata laga bo barica dolor di hari.

   Tur aña Anna y su amiganan di Lago Heights tabata traha hopi obra di man masha bunita y util pa nos Christmas Bazaar pa nos reunion general di december. Esaki a yuda trece fondo pa nos Club. Y tur aña e mes ta cumpra tur su regalonan di Pasco na nos Bazaar pa reparti pa su bisiña- y amiganan. Su amor pa otro tabata inmenso.

   Na aña 2017 Anna a ricibi su reconocimento pa bira Life Member, ya cu el a haci 40 aña como boluntario den WCA. El a ricibi esaki cu gran honor y gratitud y semper cu cariño y alegria.

   Anna tabata fiel na WCA, su cariño pa tur miembro tabata sincero y durante su añanan di salud delicado toch e tabata haci esfuerso pa bin topa cu su amiganan na reunion general y e tabata bay cas cu un curason yen di bida, ta manera e tabata haya un boost pa sigui bataya cu su enfermedad y cu forsa pa bay un aña mas.

   Anna a haya bishita na cas di e miembronan di Membership den luna di februari pa celebra su cumpleaño. El a pone nos hari cu su storianan di experiencia chistoso y gracioso manera semper. Anna a keda masha contento cu e bishita y a gradici tur pa e atencion.

   Na 2007 e grupo di Welfare a di WCA a forma un otro grupo di amiga, cu semper ta corda riba otro pa ayudo y no ta pensa riba nan mes. E grupo a consisti di 12 miembro cu ta topa segun turno 1 bes pa luna na cas di otro pa consenti y socialisa cu otro y e grupo a haya e nomber di The SelFish Group. Anna a gosa masha hopi mes cu su grupo y pa su turno a tuma e luna di mas bunita di aña, esta december, pa e por a prepara su cuminda di Pasco y consenti e otronan cu bunita regalo bao kerstboom. December 2024, e grupo a topa pa ultimo bes cu Anna. E grupo sigur a pensa cu e aña ‘ki lo topa atrobe, pero no cu e despedida aki di kerida Anna.

   Cu tristesa y dolor na curason, esnan di WCA ta tuma despedida di un boluntario special y ehemplar cu un curason grandi, semper alegre y cu un fieldad berdadero pa su Club stima. Anna, bo a bay pero nunca lubida. Drumi dushi den brasa di Papa Dios.

   Sincero condolencia na su yiunan Dulfo y Tuti, Rami y Shirley, tur otro famia y amistad, di parti di tur miembro di WCA. Hopi forsa den e dianan dificil boso dilanti. Su memoria bunita lo trece consuelo y un sonrisa riba nos cara. Ayo... amiga Anna, sosega na paz!