Wings of Hope di Aruba Airport Authority N.V. a contribui na Aruba DOET 2025

ORANJESTAD (AAN): Recientemente e team di Wings of Hope (WoH) di Aruba Airport Authority N.V. (AAA)

a partner cu Colegio Santa Filomena na San Nicolas como parti di Aruba DOET 2025 riba diabierna 16 di mei 2025.

            Aruba DOET ta e evento anual di boluntario mas grandi na Aruba. Tur aña, Wings of Hope ta participa na Aruba DOET y ta scoge un proyecto basa riba e Metanan di Desaroyo Sostenibel (SDGs) di Nacionnan Uni, e metanan di AAA y e contribucion y impacto riba e comunidad di Aruba.

            E aña aki WoH a scoge e renobacion di e speeltuin pa mucha na Colegio Santa Filomena na San Nicolas y a participa cu un total di 12 boluntario. Despues di a bishita e speeltuin, a bira mas cu cla pa e team di WoH cu e tabata un oportunidad pa haci un impacto hopi mas grandi pa e scol. Wings of Hope di AAA a acerca Arubaanse Wegenbouw Maatschappij (AWM) cu lo haci limpiesa y lo renoba e speeltuin y tambe lo instala ekipo nobo, espacio pa sombra y hekwerk di speeltuin pa sigura cu muchanan por hunga sigur den e area.

            Sherwin Williams (SW) a haci donacion di verf pa asina por verf henter e fachada di scol, banki y e palonan, pa asina e scol por tin un aspecto fresco, colorido y agradabel. Wings of Hope di AAA y e boluntarionan di Colegio Santa Filomena adicionalmente a pinta un fietspad riba e speeltuin principal di e scol pa encurasha e muchanan di scol pa core nan bicicleta pero tambe pa siña nan e reglanan di trafico mientras ta haci esaki. Adicionalmente, AAA a haci donacion di diferente ekipo deportivo pa promove actividad fisico di e studiantenan durante pauze.

            E team di AAA Wings of Hope ta gradici cada boluntario, partner y Colegio Santa Filomena pa e oportunidad di duna bek na un manera cu sigur lo beneficia e desaroyo, educacion y diversion di e muchanan di scol.