ORANJESTAD (AAN): E di ocho edicion di Long Table Aruba, un evento culinario caritativo presenta pa Wind Creek Aruba hunto cu diferente partnernan local a
surpasa un biaha mas tur expectativa y a finalisa cu un gran sorpresa, marcando un otro momento importante den impacto pa nos comunidad y donacion pa Aruba. Un cena completamente na blanco pa 1000 persona balora na $60.000.
Desde anja 2017, Long Table Aruba a recauda mas di $495,000 pa organisacionnan local y ta un evento sumamente importante pa Wind Creek Aruba.
“Nos ta compronde e importancia di conecta cu e comunidad y nos ta desea di sostene organisacionnan local na e manera cu lo realmente ta beneficia e comunidad di Aruba,” “Long Table Aruba ta hopi mas cu un cena pa 1000 persona: e ta un simbolo di kico nos por logra hunto como comunidad,” asina Sr. Paul Gielen, Gerente General di Wind Creek Aruba a declara.
Sr. Gielen a splica cu e aña aki, a dicidi di reintroduci e “video contest”, invitando organizacionnan local pa comparti nan video di un minuut describiendo nan mision, impacto den comunidad y necesidadnan financiero.
Un total di 21 organizacion a participa den e competencia unda cu publico a vota online determinando e organizacionnan cu lo beneficia di e fondo di e evento di e aña aki.
Pa ocho aña largo, Long Table Aruba a demonstra e generosidad extraordinario na nos comunidad. “E video contest” e aña aki tawata mas significativo door di duna miembro di comunidad un bos directo den e proceso di seleccion, mientras cu ta pone enfasis riba e trabou inspirador cu organizacionnan local ta haci. Nos ta felicita e beneficiario nan di e aña aki y gradici cada bishitante, socio y boluntario cu ta sigui contribui pa haci e evento aki un éxito retundo”
Door di e concurso di votacion comunitario, cinco organizacion local a wordo selecciona como beneficiario di Long Table Aruba 2026 despues di a ricibi e cantidad mas halto di votonan. Long table su benta di ticket a genera $60,000 pa e organizacionnan aki y pa aumenta ainda mas e impacto, Wind Creek Aruba a agrega un donacion adicional di $40,000, elevando e total di donacion na $100,000. Como resultado, cada un di e cinco organizacionnan a ricibi $20,000 pa sigui sostene nan trabou valioso den nos comunidad.
E organizacionnan beneficiario ta:
Fundacion Pedal for Progress
Fundacion Respeta Mi
Fundashon Ultimo Deseo Aruba
Stichting CasMarie
Stichting ScubbleBubbles
Hunto, e organizacionnan aki ta representa un variedad di causa y iniciativa dedica na mehora e bida di habitantenan di Aruba, reflehando e spiritu di comunidad y compasion cu ta na curason di Long Table Aruba.
E anochi tabata un celebracion di solidaridad, generosidad y fortalecemento di e lazonan den nos comunidad. Ademas di brinda un experiencia culinario inolvidable, e evento a sirbi como plataforma pa lidernan comunitario conecta, comparti ideanan y colabora pa un futuro mihor pa Aruba.
Long Table Aruba no tabata posibel sin e gran sosten di diferente partner: MASHA DANKI di curason na tur esnan cu a contribui, cumpra nan ticket, yuda, y sostene e evento cu tanto amor tur aña.
