PHILIPSBURG: Gerencia di Windward Islands Airways International NV, esta Winair a haye obliga na cancela vuelonan pa Aruba y Curacao,
debi na problemanan cu nan partner operacional Air Antilles. Awor e vuelonan cu e avionnan Twin Otter so ta sigui, esta esnan cu ta bulando pa Saba, St. Eustatius, y St. Barths.
E avion cu nan ta lease di e tipo ATR-42 a wordo grounded riba ordo di Autoridad di Aviacion Civil Frances. E avion ATR-42 cu Winair ta usando, ta staciona na Aeropuerto di St. Maarten desde Diabierna caba pa wordo inspecciona.
Segun e corant The Daily Herald na St. Maarten, e aerolinea frances Air Antilles ta opera un total di 11 avion di Point-à-Pitre International Airport na Guadeloupe. Autoridad di Aviacion Civil a descubri cu e schedule pa mantenimento di e avionnan aki no a wordo respeta.
Aki ta unda e corant a haya copia di e carta cu Aviacion Civil a manda pa Air Antilles, indica cu desde comienzo di 2021, nan a nota ocho incumplimento significante pa cu e avionnan di ATR y Twin Otter, cu ta demostra cu e aerolinea su sistema di maneho no ta permiti pa verifica si ta cumpli cu e procedimentonan necesario pa sigura cu e avionnan ta cumpli pa ta haciendo vuelo, y e forma adecua di procedimentonan.
Resultado di esey ta cu e rutanan di Air Antilles entre Guadeloupe, Martinique, St. Maarten, Dominica, y islanan Caribense a wordo cancela te cu proximo aviso, mientras cu ta haciendo mantenimento di e avionnan aki.
E compania di Guadeloupe a bisa e corant cu nan ta haciendo tur cos na nan poder pa transporta pasaheronan afecta pa e interupcionnan aki, y cu por bin bek na un situacion normal lo mas pronto posible.
Winair ta calcula cu lo bay ta te dia 5 di September prome cu e avion cu nan ta lease lo por wordo usa un biaha mas. Nan ta usa esaki principalmente pa vuelonan entre St. Maarten y e islanan ABC (Aruba, Bonaire, y Curaçao). Toch nan ta buscando forma pa mira si e vuelonan aki por wordo ehecuta pa otro partnernan.
