Lilian Prince: For di añanan 90 no ta ricibi datonan
ORANJESTAD (AAN): Lilian Prince di Koningin Wilhelmina Kanker Fonds (KWKF) a duna di conoce cu den e ultimo 10 añanan, no ta hayando un estadistica riba con e situacion di cancer ta na Aruba.
Ora cu Wilhelmina Fonds ta tende di esaki ta ora c'un persona ta bati na nan porta pa cierto yudanza. Tin biaha ta un yudanza cu no ta ni na cuminsamento, pero practicamente na final.
Ta algo cu e fundacion a keda traha riba dje, puntra con e situacion ta y nunca nan ta haya contesta, a remarca.
Segun Prince, nan a haya informacion te cuminsamento di añanan 90. Tin estadisticanan di hopi aña atras cu KWKF a inverti placa pa haci'e. "Ora cu a yega un cierto momento, a yega tira tur cos akiden. Un patholoog e tempo ey a manda tur cos akinan".
Por bisa cu for di añanan 90 te cu aworaki, KWKF no por a registra nada. Pero esunnan cu ta registr'e no kier duna informacion, Lilian Prince a indica.
El a sigui bisa cu e fundacion kier sa pa wak con nan ta sigui traha riba e tematica aki, pero nan no por hay'e.
"Nos ta den un isla den Caribe y hopi ta paga placa pa bin akinan pa tuma solo, pero nos mester ta consciente di dje, cu nos ta drumi lanta cu e solo aki. Nos tin cu cuida nos curpa. Den pasado e bieunan tabata cana cu caminda di kaki y tabata bay traha den cunucu cu nan sombre (...), camisanan manga largo (...) y tin ora ta pone lenso pa tapa pa e solo y asina mes hopi di nan tabata tin cancer di cuero", a expresa.cana b
Prince a agrega cu aworaki "nos ta sali dal un show den solo, unda cu nos tin cuida hopi p'e".
Hopi hende no ta consciente cu ora cu nan ta cana cu cierto heridanan ta kico ta bin, kico ta e consecuencia y ken kier culpa e ora ey?, a remarca. N' por culpa un instancia, n' por culpa gobierno, mester culpa bo mes!
Den e temporada aki tur hende ta fiesta, pero e consecuencia cu tin despues, e herida ey ta cana bay paden y e ora ey bo ta puntra bo mes: "dicon ami? pakico ami no a cuida. Ami mester cuida mi mes. Tur hende por haci loke nan kier, pero corda bon, despues no bisa Dios, pakico ami?", e representante di Wilhelmina Kanker Fonds a bisa.
